រឿងដោះលែងវៀតណាមចូលកាប់ឈើត្រូវអាជ្ញាធរច្រានចោល
រតនគិរីៈ នគរបាលខ្មែរបានរងការចោទប្រកាន់ថា បានដោះលែងអ្នកកាប់ឈើជនជាតិវៀតណាម បីនាក់បន្ទាប់ពីបង់លុយ ៣ ពាន់ដុល្លារ ប៉ុន្តែនគរបាលបានបដិសេធហើយថា វៀតណាមទាំងបីនាក់នោះជាទាហានមិនមែនអ្នកកាប់ឈើទេ។
លោក ឆាយ ធី អ្នកសម្របសម្រួលអង្គការសិទ្ធិមនុស្សអាដហុក ខេត្តរតនគិរី បានឲ្យដឹងថា មន្រ្តីអាជ្ញាធរ ស្រុកអូរយ៉ាដាវ ម្នាក់បានផ្តល់ព័ត៌មានប្រាប់អាដហុកកាលពីម្សិលមិញថា កាលពីរសៀលថ្ងៃអាទិត្យ ទី៩ វិច្ឆិកា នគរបាលល្បាតព្រំដែនបានចាប់ជនជាតិវៀតណាម ចំនួន ៣ នាក់បន្ទាប់ពីពួកគេបានឆ្លងដែនចូលដីខ្មែរកាប់ឈើខុសច្បាប់នៅត្រង់ចំណុចព្រំដែនជាប់នឹងក្រុមហ៊ុន ឧកញ៉ា ទ្រី ភាព ស្ថិតនៅក្នុង ភូមិ ភិ ឃុំសេសាន ស្រុកអូរយ៉ាដាវ ខេត្តរតនគិរី។
លោក ឆាយ ធី បានបញ្ជាក់ថា៖ «សមត្ថកិច្ចនៅទីនោះ បានឃុបឃិតគ្នា ដោះលែងវៀតណាមទាំងបីនាក់នោះឲ្យត្រឡប់ទៅវិញជាថ្នូរនឹងប្រាក់ ៦០ លានដុងស្មើនឹង ៣ ពាន់ដុល្លារ ដោយមិនបានចាប់បញ្ជូន និងកសាងសំណុំរឿងមកតុលាការចាត់វិធានការតាមច្បាប់ឡើយ»។
ទាក់ទងទៅនឹងការចោទប្រកាន់នេះ លោក ងយ ដន អធិការនគរបាលស្តីទី ស្រុកអូរយ៉ាដាវ បានថ្លែងថា នគរបាលលោកពិតជាបានឃាត់ខ្លួនជនជាតិវៀតណាម បីនាក់មែន ប៉ុន្តែពួកគេមិនមែនជាអ្នកកាប់ឈើទេ។
លោកបន្តថា នគរបាលលោកបានទាក់ទងទៅនគរបាលវៀតណាម ដើម្បីសួរនាំពីរឿងចូលមកនោះ ហើយនគរបាលវៀតណាម បានអះអាងថា ជនជាតិវៀតណាម ទាំងបីនាក់នោះគឺជាទាហានវៀតណាមដែលស្លៀកពាក់ជាស៊ីវិល ដើម្បីចុះទៅល្បាតតំបន់ព្រំដែន ក្រែងលោមានអ្នកចូលកាប់ឈើក្នុងតំបន់ស។
លោក ងយ ដន បានបញ្ជាក់ថា៖ «ដោយមិនឃើញមានបទល្មើសអី យើងក៏ដោះលែងឲ្យគេទៅវិញទៅ ហើយគេក៏មិនមែនអ្នកកាប់ឈើទេ។
ចំពោះរឿងថា ឲ្យលុយដើម្បីដោះលែងនោះខ្ញុំអត់ដឹងទេ»។ លោកបានថ្លែងបន្ថែមថា បើមានវត្ថុតាងគ្រប់គ្រាន់ នោះនគរបាលនឹងចាត់ការបញ្ជូនទៅមន្រ្តីជំនាញ។ អង្គការអាដហុក កំពុងតែធ្វើការស្រាវជ្រាវពីករណីនេះ ដើម្បីធ្វើការអន្តរាគមន៍ទៅស្ថាប័នពាក់ព័ន្ធតាមនីតិវិធីច្បាប់។
នាពេលប៉ុន្មានសប្តាហ៍ចុងក្រោយនេះ ក្នុង ស្រុកអូរយ៉ាដាវ មានសេចក្តីរាយការណ៍ជាច្រើនទាក់ទងទៅនឹងការលួចឆ្លងដែនចូលកាប់ឈើខុសច្បាប់ក្នុងទឹកដីខ្មែរ ពីសំណាក់ជនជាតិវៀតណាម ដែលរួមមានទាំងរថយន្តនិងម៉ូតូសម្រាប់ដឹកជញ្ជូនឈើទាំងនោះផង។ ប៉ុន្តែមិនទាន់ឃើញមានជនសង្ស័យវៀតណាម ណាម្នាក់ត្រូវបានសមត្ថកិច្ចកម្ពុជា ចាប់ឃាត់ខ្លួនបញ្ជូនទៅតុលាការដើម្បីធ្វើការផ្តន្តាទោសនោះទេ៕
ប្រភពពី ភ្នំពេញប៉ុស្តិ៍
