ពុំមានសំណងសម្រាប់អាជីវករឆេះតូបនៅផ្សារចាស់ទេ
ភ្នំពេញៈ គណៈកម្មាការគ្រប់គ្រងផ្សារចាស់ ដែលត្រូវភ្លើងឆាបឆេះអស់ ៣០០ តូបកាលពីថ្ងៃច័ន្ទប្រាប់អាជីវកររងគ្រោះថា ពួកគេមិនទទួលបានសំណងអ្វីឡើយ ហើយត្រូវសាងសង់តូបលក់ដូរ ដោយខ្លួនឯងឡើងវិញ។
អ្នកតំណាងគណៈកម្មាការផ្សារចាស់ម្នាក់បានបញ្ជាក់មូលហេតុថា ការឆេះនេះគឺជាឧបទ្ទវហេតុ ដូច្នេះពុំមានសំណងត្រូវផ្តល់ទេ។ អាជីវករត្រូវសង់តូបខ្លួនឯងឡើងវិញ បើចង់ដំណើរការលក់ដូរកាន់តែលឿននោះ។
ផ្សារចាស់ដែលស្ថិតនៅកណ្តាលរាជធានីភ្នំពេញ ត្រូវអណ្តាតភ្លើងឆាបឆេះទាំងព្រឹកកាលពីថ្ងៃចន្ទ បណ្តាលឲ្យតូបលក់ដូរជាង ៣០០ ឆេះខ្ទេចក្នុងចំណោមតូបសរុប ៩១៤ តូប និងទំហំនៃការខូចខាតអាចមានដល់ជាង ១,៥ លានដុល្លារ។
ប៉ុន្មានម៉ោង ក្រោយពីអគ្គីភ័យនេះ ត្រូវបានពន្លត់ សាលារាជធានីភ្នំពេញបានចេញសេចក្តី ថ្លែងការណ៍មួយ ដោយបញ្ជាក់ថា ករណីនេះ បណ្តាលមកពីការឆ្លងចរន្តអគ្គិសនី (ទុស្សេខ្សែភ្លើង) ចេញពីតូបលេខ ០១ ចាស់ ដែលម្ចាស់តូបឈ្មោះ សៀន លី ភេទប្រុស អាយុ ៤៨ឆ្នាំ លក់ថង់ប្លាស្ទីកនៅក្បែរខ្លោងទ្វារចេញ-ចូលពីខាងកើតផ្សារ។
បន្ទាប់ពីកិច្ចប្រជុំជាមួយអាជីវកររងគ្រោះកាលពីម្សិលមិញ លោក យន់ ដារ៉ា ប្រធានគណៈកម្មាការផ្សារបានប្រាប់ ភ្នំពេញ ប៉ុស្តិ៍ថា សាលាក្រុងដែលជាម្ចាស់អចលនទ្រព្យផ្សារនេះ បានប្រាប់ម្ចាស់តូបឲ្យធ្វើការសាងសង់ឡើងវិញដោយខ្លួនឯង បើមិនដូច្នេះទេ អាជ្ញាធរត្រូវចំណាយពេលច្រើនណាស់។
លោកថ្លែងថា «យើងសូមស្នើឲ្យម្ចាស់អាជីវករទាំងអស់ដែលតូបរបស់ពួកគេបានឆាបឆេះដោយភ្លើងនោះ ត្រូវសាងសង់ដោយខ្លួនឯង។ ករណីភ្លើងឆេះនេះ គ្មាននរណាម្នាក់ចង់ឲ្យវាកើតឡើងទេ»។
អាជីវករមួយចំនួន មិនសប្បាយចិត្តចំពោះការមិនទទួលបានសំណង ប៉ុន្តែពួកគេត្រូវបានសាលាក្រុងបញ្ជាក់ថា ពួកគេអាចបន្តលក់នៅក្នុងផ្សារចាស់នេះទៀត ដោយមិនត្រូវបានបង្ខំឲ្យចាកចេញទេ។
អាជីវករម្នាក់ឈ្មោះ គឹម លី បាននិយាយថា «យ៉ាងហោចណាស់ ពួកយើងសប្បាយចិត្ត ដែលអាចសាងសង់តូបថ្មីនៅកន្លែងចាស់របស់ពួកយើង។ ផ្សារនេះមិនមានគម្រោងបណ្តេញពួកយើងចេញ ដើម្បី ធ្វើការអភិវឌ្ឍន៍ថ្មីនោះឡើយ»។ ប៉ុន្តែអាជ្ញាធរមិនត្រូវឲ្យម្ចាស់អាជីវករទាំងអស់ចេញទាំងស្រុងនោះទេ។
លោក គួច ចំរើន អភិបាល ខណ្ឌដូនពេញ បានថ្លែងឲ្យដឹងថា ក្រុមបោសសំអាតបានចេញ ប្រតិបត្តិការកាលពីម្សិលមិញ។ «យើងត្រូវសំអាតកំទេចកំណ ដែលឆេះសិន ដើម្បីវាយតម្លៃ ពីផលប៉ះពាល់នៃការឆេះនេះ ចំណែកឯ អាជីវករមួយចំនួនដែលមិនត្រូវបានភ្លើងឆេះតូប អាចលក់ដូរតាមធម្មតាបាន»។
ប្រភពពី ភ្នំពេញប៉ុស្តិ៍
