ពលរដ្ឋព្រមានធ្វើអត្តឃាតប្រឆាំងគម្រោងសង់ទំនប់វារីអគ្គិសនីសេសានក្រោម២
ពលរដ្ឋរងផលប៉ះពាល់ពីគម្រោងសាងសង់ទំនប់វារីអគ្គិសនីសេសានក្រោម២ ថានឹងខាំអណ្ដាតសម្លាប់ខ្លួន ប្រសិនបើគម្រោងនេះមិនបញ្ឈប់។ ការប្រកាសបែបនេះ ធ្វើឡើងក្នុងសន្និសីទកាសែតមួយនៅភ្នំពេញ បន្ទាប់ពីពួកគេបានដាក់ញត្តិសុំអន្តរាគមន៍ពីរដ្ឋសភា។
ការប្រកាសដាក់ជីវិតរបស់ក្រុមប្រជាពលរដ្ឋនៅពេលនេះ ខណៈពួកគេមិនទាន់ឃើញរដ្ឋាភិបាលមានចំណាត់ការណាមួយទៅលើក្រុមហ៊ុន ដែលវិនិយោគគម្រោងទំនប់វារីអគ្គិសនីសេសានក្រោម២។ អ្នកភូមិថា ប្រសិនបើទំនប់វារីអគ្គិសនីចេញជារូបរាងមែននោះ ប្រពៃណី ទំនៀមទម្លាប់ សាសនា ដីព្រៃ និងធនធានធម្មជាតិរបស់ពួកគេ នឹងរលាយបាត់អស់ ដែលធ្វើឲ្យពួកគេរស់ដូចស្លាប់។
ថ្លែងទាំងទឹកភ្នែកហូរសស្រាក់ លោក ដាំ សំណាង ជនជាតិដើមភាគតិចព្នង ដែលតំណាងឲ្យសហគមន៍ភូមិក្បាលរមាស ខេត្តស្ទឹងត្រែង ឲ្យដឹងថា នៅពេលទំនប់វារីអគ្គិសនីនេះដំណើរការ នឹងធ្វើឲ្យបាត់បង់អត្តសញ្ញាណ ទំនៀមទម្លាប់ ជំនឿ សាសនា និងជាពិសេស គឺផ្នូរដូនតា ដែលជាទឹកដីដូនតាដំបូងរបស់ជនជាតិដើមភាគតិច។ លោកបន្តថា ប្រសិនបើរដ្ឋាភិបាលនៅតែបន្តគម្រោងទំនប់វារីអគ្គិសនីសេសានក្រោម២នោះ លោក និងប្រជាសហគមន៍ផ្សេងទៀត នឹងខាំអណ្ដាតសម្លាប់ខ្លួន៖ «កូនចៅជំនាន់ក្រោយនឹងបាត់បង់ធនធាន និងមិនស្គាល់ធនធានទាំងអស់ហ្នឹងទេ។ សុំទោស! ខ្ញុំនិយាយអត់ចេញទេ ព្រោះថាទឹកដីនេះ គឺជាទឹកដីបុព្វបុរសរបស់ជនជាតិយើងខ្ញុំនៅក្នុងតំបន់ហ្នឹង»។
ប្រជាពលរដ្ឋចំនួន ១០សហគមន៍ ភាគច្រើនជាជនជាតិដើមភាគតិចព្នង ចារ៉ាយ គ្រឹង ព្រៅ និងជនជាតិភាគតិចឡាវ មកភ្នំពេញនៅថ្ងៃទី២៥ ខែវិច្ឆិកា ដើម្បីដាក់ញត្តិទៅរដ្ឋសភា សុំឲ្យប្រធានរដ្ឋសភា លោក ហេង សំរិន ធ្វើអន្តរាគមន៍លុបចោលគម្រោងទំនប់វារីអគ្គិសនីសេសានក្រោម២ ជាបន្ទាន់។ ក្នុងសន្និសីទកាសែតនោះ ពួកគេបានលើកបដាបង្ហាញថា ពួកគេមិនត្រូវការទំនប់វារីអគ្គិសនីសេសានក្រោម២ និងបង្ហាញរូបភាពទឹកលិចភូមិឋាន។ ពួកគេតំណាងឲ្យពលរដ្ឋ ៧០០គ្រួសារ ដែលរងផលប៉ះពាល់ក្នុងខេត្តក្រចេះ និងខេត្តរតនគិរី។
តំណាងជនជាតិភាគតិចព្នង មួយរូបទៀតមកពីសហគមន៍ភូមិវ៉ឺនសៃ ខេត្តរតនគិរី លោកស្រី ហ្វយ ស៊ុត និយាយថា កន្លងមកអាជ្ញាធរខេត្តបានចុះទៅសម្របសម្រួល និងផ្តល់សំណងដែរ ប៉ុន្តែជាសំណងដែលពលរដ្ឋមិនអាចទទួលយកបាន។ លោកស្រីអះអាងថា ប្រជាពលរដ្ឋមិនចង់ចាកចេញពីលំនៅឋានដែលកំពុងរស់នៅសព្វថ្ងៃនេះទេ។ ស្ត្រីរូបនេះលើកឡើងថា ប្រសិនបើទំនប់វារីអគ្គិសនីនេះនៅតែដំណើរការ អ្នកភូមិនឹងស្លាប់ដោយទឹកជំនន់ជាមិនខាន៖ «សុំឲ្យរាជរដ្ឋាភិបាលទាំងអស់គ្នាហ្នឹង សូមឲ្យពិចារណាផង ហីអន្លង់ត្រីយើងក៏នឹងបាត់ បឹងទន្លេសាបយើងក៏នឹងបាត់ទាំងមូល បើសិនគេធ្វើទំនប់ហ្នឹង។ វាមិនធម្មតាទេ គេបង្ហូរមកដាក់ពួកខ្ញុំហើយ ពួកខ្ញុំនៅត្រង់ណា ដីសម្បទានក្រុមហ៊ុនយកអស់ហើយ យើងទៅនៅដីគេបានអត់? គេមិនឲ្យយើងនៅទេចា៎! ហ្នឹងហើយបានពួកខ្ញុំទុក្ខកង្វល់ខ្លាំង។ ចង់ចុះមកជួបដល់រដ្ឋាភិបាលផ្ទាល់ ចង់ជួបជាមួយគាត់ ដើម្បីពិភាក្សាពីរឿងហ្នឹង»។
ទំនប់វារីអគ្គិសនីសេសានក្រោម២ ជាការចូលហ៊ុនគ្នារវាងក្រុមហ៊ុនប្រទេសកម្ពុជា រ៉ូយ៉ាល់គ្រុប (Royal Group) និងក្រុមហ៊ុនអគ្គិសនីវៀតណាម ឈ្មោះ អីវីអិន អ៊ីនធឺណេសិនណល យន់ស្តុក (EVN Int’l Joint Stock Company) និងក្រុមហ៊ុនចិន ឆៃណា ហាយដ្រូ ឡានឆាង អ៊ិនធឺណាសិនណល់ អ៊ិននើជី (China’s Hydrolancang International Energy) ចំណាយទុនសរុប ៧៨១លានដុល្លារសហរដ្ឋអាមេរិក និងផ្តល់ថាមពល ៤០០មេហ្គាវ៉ាត់។ ប៉ុន្តែទន្ទឹមគ្នានឹងនោះ របាយការណ៍សិក្សាស្រាវជ្រាវកាលពីឆ្នាំ២០១២ របស់ National Academy of Sciences បានបង្ហាញថា ទំនប់វារីអគ្គិសនីនេះនឹងបណ្ដាលឲ្យបរិមាណត្រី ៩,៣% ធ្លាក់ចុះ ហើយត្រីជាង ៥០ប្រភេទ ប្រឈមនឹងបាត់បង់ ធ្វើឲ្យផ្លាស់ប្ដូរប្រព័ន្ធជលសាស្ត្រ ប៉ះពាល់ធំបំផុតលើជីវម៉ាស ឬការរស់នៅផ្តុំគ្នារបស់ត្រីក្នុងទន្លេ ហើយអ្នកភូមិរស់នៅតាមបណ្តោយទន្លេរាប់ពាន់នាក់ រងផលប៉ះពាល់ដល់អាយុជីវិត ជីវភាពប្រចាំថ្ងៃ និងសុវត្ថិភាពស្បៀង ជាដើម។
នាយកប្រតិបត្តិវេទិកានៃអង្គការមិនមែនរដ្ឋាភិបាលស្ដីពីកម្ពុជា (NGO Forum) លោក តឹក វណ្ណារ៉ា ឲ្យដឹងថា កន្លងមកក្រុមអង្គការសង្គមស៊ីវិល បានទាមទារឲ្យក្រុមហ៊ុន និងរដ្ឋាភិបាល មានការពិភាក្សាជាមួយប្រជាពលរដ្ឋ ដើម្បីរកដំណោះស្រាយ និងទាមទារឲ្យផ្អាកបណ្ដោះអាសន្នសិន។ ទោះបែបនេះក្ដី លោក តឹក វណ្ណារ៉ា ថា ក្រុមហ៊ុនមិនទាន់មានការឆ្លើយតបណាមួយពីក្រុមអង្គការសង្គមស៊ីវិលនៅឡើយទេ៖ «ជារឿងសំខាន់ គឺជំរុញឲ្យមានការពិភាក្សាគ្នាបាទ! ត្រង់ទៅត្រង់មក ក្នុងន័យស្វែងរកដំណោះស្រាយរួមពាក់ព័ន្ធនឹងរឿងការអភិវឌ្ឍន៍ទំនប់សេសានក្រោម២»។
ឆ្លើយតបចំពោះការលើកឡើងរបស់ក្រុមប្រជាពលរដ្ឋ អ្នកនាំពាក្យក្រសួងបរិស្ថាន លោក សៅ សុភាព ឲ្យដឹងថា ក្រសួងមិនអាចលុបចោលគម្រោងទំនប់វារីអគ្គិសនីនេះបានទេ។ ប៉ុន្តែលោកថា ក្រសួងបរិស្ថាន នឹងបន្ថែមការត្រួតពិនិត្យទៅលើក្រុមហ៊ុនដែលវិនិយោគ៖ «យើងនឹងបន្តការតាមដានបញ្ហាអស់ហ្នឹង ហីយើងនឹងអឺ! អាហ្នឹងគឺយើងទើបតែទទួលបានព័ត៌មានដូចគ្នា។ ដូច្នេះយើងនឹងបន្តតាមដាន ហីនឹងធ្វើការហ្នឹងតទៅទៀតបាទ»។
បើតាមអ្នកនាំពាក្យក្រសួងបរិស្ថាន ដដែល កន្លងមកក្រសួងបរិស្ថាន បានស្រាវជ្រាវពីផលប៉ះពាល់នៃគម្រោងនេះ និងបានបញ្ជាទៅក្រុមហ៊ុន ត្រូវផ្តល់របាយការណ៍ដំណោះស្រាយរៀងរាល់បីខែម្តងមកក្រសួងបរិស្ថាន ប៉ុន្តែលោកថា ក្រុមហ៊ុនមិនបានផ្តល់ឯកសារត្រឹមត្រូវតាមក្រសួងចង់បានឡើយ។ គម្រោងទំនប់វារីអគ្គិសនីសេសានក្រោម២ មានផ្ទៃអាងស្តុកទឹកទំហំ ៣៣.៥៦០ហិកតារ ដែលពោរពេញដោយព្រៃឈើ។ គម្រោងនេះ នឹងត្រូវធ្វើឲ្យប្រជាពលរដ្ឋជិត ៤.៨០០នាក់ ជម្លៀសចេញពីលំនៅឋាន៕
ប្រភពពី វិទ្យុអាស៊ីសេរី
