បុរសម្នាក់សំងំលេបថ្នាំធ្វើអត្តឃាតនៅក្នុងបន្ទប់ផ្ទះសំណាក់យីហោ“២២២”
ខេត្តកណ្តាល ៖ បុរសម្នាក់សម្រេចចិត្តធ្វើអត្តឃាតដោយលេបថ្នាំ តែមិនសម្រេចនៅក្នុងផ្ទះសំណាក់យីហោ“២២២” គ្រាដែលជនរងគ្រោះបានមកជួលបន្ទប់ស្នាក់នៅមួយយប់ លុះដល់ពេលចេញទៅវិញ បែរជាលេបថ្នាំសម្លាប់ខ្លួន បង្កការភ្ញាក់ផ្អើលដល់ម្ចាស់ផ្ទះសំណាក់ដឹកយកទៅសង្គ្រោះនៅមន្ទីរពេទ្យទាន់ពេលវេលា ។
ករណីធ្វើអត្តឃាតមិនសម្រេចខាងលើនេះ បានកើតឡើងនៅវេលាម៉ោង១០និង៤០នាទី ថ្ងៃទី២០ ខែវិច្ឆិកា ឆ្នាំ២០១៤ នៅក្នុងបន្ទប់លេខ៦៤ ជាន់ទី៤ ស្ថិតក្នុងភូមិដើមមៀន សង្កាត់ដើមមៀន ក្រុងតាខ្មៅ ខេត្តកណ្តាល ។
ជនរងគ្រោះមានឈ្មោះ ឌី ម៉ុងដែន ភេទប្រុស អាយុ៣២ឆ្នាំ មានទីលំនៅក្នុងភូមិព្រែកអញ្ចាញ សង្កាត់ព្រែកឫស្សី ក្រុងតាខ្មៅ ខេត្តកណ្តាល ។
ករណីអត្តឃាតនេះពុំទាន់ដឹងពីមូលហេតុអ្វីពិតប្រាកដនៅឡើយទេ ប៉ុន្តែបើតាមសំដីសមត្ថកិច្ចដែលសាកសួរម្ចាស់ផ្ទះសំណាក់ បានប្រាប់ថា ជនរងគ្រោះបានមកជួលបន្ទប់ស្នាក់នៅមួយយប់ លុះជិតដល់ពេលវេលាកំណត់ដែលត្រូវចេញពីបន្ទប់ មិនឃើញជនរងគ្រោះប្រាប់ ដើម្បីស្នាក់នៅបន្តនោះទេ ។ ដោយមានការសង្ស័យ ម្ចាស់ផ្ទះសំណាក់បានឡើងទៅគោះទ្វារ តែមិនឮសំឡេងឆ្លើយតបនោះទេ រួចក៏យកកូនសោរចាក់ទ្វារ ស្រាប់តែឃើញជនរងគ្រោះដេកបែកពពុះមាត់នៅលើឥដ្ឋការ៉ូតែម្នាក់ឯង និងមានកញ្ចប់ដបថ្នាំ និងដបទឹកសុទ្ធនៅក្នុងបន្ទប់ ហើយធំក្លិនថ្នាំពុល ។ ពេលឃើញហេតុការណ៍ដូច្នេះ ម្ចាស់ផ្ទះសំណាក់បានរាយការណ៍ឲ្យសមត្ថកិច្ចភ្លាមៗ ដឹកជនរងគ្រោះត្រូវបានដឹកទៅសង្គ្រោះនៅមន្ទីរពេទ្យជ័យជំនះ ។ បច្ចុប្បន្ន កំពុងស្ថិតក្នុងស្ថានភាពសង្គ្រោះបន្ទាន់ សមត្ថកិច្ចពុំទាន់ដឹងពីមូលហេតុនៃការធ្វើអត្តឃាត ដោយផឹកថ្នាំពុលនេះទេ ។
បើតាមប្រភពក្រៅផ្លូវការប្រាប់ថា សង្ស័យមានវិបត្តិស្នេហា ទើបជនរងគ្រោះខ្វះការពិចារណាសម្រេចចិត្តធ្វើអត្តឃាត តែមិនបានសម្រេច ត្រូវសមត្ថកិច្ចនិងម្ចាស់ផ្ទះសំណាក់ដឹកជួយសង្គ្រោះបានទាន់ពេលវេលា ៕
____________
ប្រភពពីនគរវត្ត
