ខៃ ប្រសិទ្ធ រត់ឡើងយន្តហោះទៅអូស្រ្តាលីវិញទាំងភ័យខ្លាច
ភ្នំពេញៈ មានការអះអាងថា អតីតតារាសម្តែងជើងចាស់លោក ខៃ ប្រសិទ្ធ បានបញ្ចប់ដំណើរមកស្នាក់នៅស្រុកកំណើតរួមរស់ជួបជុំបងប្អូន និងម្តាយគ្មានថ្ងៃកំណត់ ជាមួយនឹងគម្រោងមនុស្សធម៌គ្មានព្រំដែន ជួយដល់កុមារកំព្រា ជនចាស់ជរាទីទាល់ក្រ និងអណ្តូងទឹកស្អាតនៅតាមតំបន់ដាច់ស្រយាលទាំងភិតភ័យ ក្រោយពេលមានការបាញ់ប្រហារលើឧកញ៉ាម្នាក់យ៉ាងសាហាវព្រៃផ្សៃនោះ។
យ៉ាងណា ការមកសម្ងំរស់នៅស្រុកខ្មែររបស់លោក ខៃ ប្រសិទ្ធ នោះមិនមានភាពបើកចំហឡើយ ដោយមានការបង្ហើបពីមិត្តភក្តិថា គាត់បារម្ភពីសុវត្ថិភាព ខ្លាចរងវាសនាដូចប្រពន្ធជាទីស្រឡាញ់ អ្នកនាង ពិសិដ្ឋ ពិលីកា។
អ្វីដែលរឹតតែធ្វើឲ្យគេកត់សម្គាល់ថា តារារូបនេះភិតភ័យតក់ស្លុតនោះ គឺនៅក្រោយមានការបាញ់សម្លាប់មនុស្សទាំងភ្នែកស្រស់ទៅលើឧកញ៉ាថៅកែស៊ីម៉ងត៍ រូបពេជ្រនោះ លោក ខៃ ប្រសិទ្ធ បានបង្ខំចិត្តរត់ឡើងយន្តហោះទៅអូស្ត្រាលីវិញទាំងភ្នែកនៅកញ្ចឹងកចោលគម្រោងមនុស្សធម៌ជាច្រើនទៀតនៅស្រុកខ្មែរ។
លោក សាវិន ហ្វីលីព ជាតារាភាពយន្តម្នាក់គត់ដែលទទួលបានការទុកចិត្តពីលោក ខៃ ប្រសិទ្ធ និងតែងរួមដំណើរជាមួយគ្នាគ្រប់ច្រកល្ហក បានប្រាប់មកភ្នំពេញ ប៉ុស្តិ៍ ថា៖ «បងសិទ្ធ ក្នុងដំណើរមករស់នៅស្រុកខ្មែរនេះ បើទោះជាមានការស្នើសុំពីអ្នកកាសែតក៏គាត់មិនហ៊ានឲ្យជួបដែរ ដោយសារតែគាត់តែងគិតពីសុវត្ថិភាពគាត់»។
អ្នកនាំពាក្យដែលជាដៃគូមនុស្សធម៌របស់លោក ខៃ ប្រសិទ្ធ បានបន្តថា៖«ពេលនេះ ខណៈមានហេតុការណ៍បាញ់ប្រហារលើលោក ឧកញ៉ា អ៊ឹង ម៉េងជឺ បង សិទ្ធ ដែលអារម្មណ៍គាត់នៅដិតដាមរឿងអតីតកាលនៅឡើយនោះ ហាក់ធ្វើឲ្យគាត់មានការភិតភ័យយ៉ាងខ្លាំង ពិសេសពីសុវត្ថិភាពផ្ទាល់ខ្លួនរបស់គាត់តែម្តង ដល់ថ្នាក់រត់ឡើងយន្តហោះយ៉ាងតក់ក្រហល់ត្រឡប់ទៅប្រទេសអូស្ត្រាលីវិញ»។
លោក ហ្វីលីព បានបញ្ជាក់ថា៖ «សូម្បីតែខ្ញុំជាមនុស្សស្និទ្ធនឹងគាត់ គាត់ទុកចិត្តបំផុតក៏សឹងតែមិនបានដឹងពីដំណើរវិលត្រឡប់ទៅអូស្រ្តាលី របស់គាត់ផង។ ខ្ញុំដឹង នៅពេលគាត់ឡើងយន្តហោះទៅហើយ»។
លោក ហ្វីលីព បានឲ្យដឹងថា លោក ខៃ ប្រសិទ្ធ បានទៅចោលគម្រោងរបស់ខ្លួនជាច្រើន។ លោករៀបរាប់ថា៖ «ក្រៅពីគម្រោងមនុស្សធម៌ជួយធ្វើសាលារៀននៅតាមតំបន់ដាច់ស្រយាល ដូចជា បាត់ដំបង សៀមរាប និងការសង់អណ្តូងទឹកស្អាតនោះ គាត់ត្រូវទៅជួបក្មេងស្រីនៅកោះកុង ដែលផ្ទុះមីនពិការជើងទាំងពីរ និងត្រូវទៅជួបក្មេងលួចដូងនៅព្រៃវែងម្តងទៀត តែពេលនេះគាត់អត់បានធ្វើទេ ព្រោះគាត់ទៅបាត់ហើយ»។
លោក ខៃ ប្រសិទ្ធ កាលពីដំបូងឡើយមានបំណងចង់បានក្មេងប្រុសម្នាក់ ដែលលួចដូងគេ ហើយត្រូវម្ចាស់គេចាប់ជ្រមុជទឹកនោះ យកទៅរស់នៅអូស្រ្តាលី តែនៅពេលមានសាលាអន្តរជាតិមួយ គេធានាចិញ្ចឹមហើយនោះ លោកក៏បានផ្តល់ជាជំនួយឧបត្ថម្ភផ្សេងៗវិញ។ ដោយឡែកក្មេងស្រីពិការជើងទាំងពីរនៅខេត្តកោះកុងដោយសារជាន់គ្រាប់មីននោះ លោកក៏ចង់ទៅជួប និងចង់សុំក្មេងនោះធ្វើកូនធម៌ ហើយចង់ឧបត្ថម្ភប្រាក់ចិញ្ចឹមរូបគេដែរ តែនៅពេលនេះមិនដឹងនៅឡើយ ព្រោះលោកបានឡើងយន្តហោះទាំងមិនបានប្រាប់។
នៅពេលសួរថា លោក ខៃ ប្រសិទ្ធ គាត់ឡើងយន្តហោះទៅអូស្រ្តាលីវិញបែបនេះ តើគម្រោងមនុស្សធម៌ទាំងឡាយនៅតែបន្ត ឬយ៉ាងណា? ហើយក្មេងៗដែលគ្រោងជួយនៅតែជួយឬយ៉ាងណានោះ លោក ហ្វីលីព បានប្រាប់ថា៖«រឿងនេះខ្ញុំក៏មិនទាន់ដឹងច្បាស់ដែរ ព្រោះចាំមើល បងសិទ្ធ គាត់គិតយ៉ាងណាដែរ ហើយក៏មិនដឹងថា ពេលខាងមុខ គាត់ហ៊ានចុះមកស្រុកខ្មែរទៀត ឬក៏អត់ទេ?»៕
_____________________
ប្រភពព័ត៌មានពី៖ ខ្មែរប៉ុស្តិ៍
ប្រភពព័ត៌មានពី៖ ខ្មែរប៉ុស្តិ៍
