បានខ្លួនហើយ ខាងប្រុសចង់ដោះដៃ ខាងស្រីប្តឹងចាប់ខ្លួនដាក់គុក
ខេត្តកណ្តាល ៖ រឿងរ៉ាវស្នេហារបស់យុវ័យមួយគូរត្រូវបែកប្រះឆា ដោយសារម្តាយខាងស្រីសម្រេចចិត្តទៅដាក់ពាក្យបណ្តឹងនៅនគរបាលមូលដ្ឋាន ដោយចោទថា យុវជនជាសង្សារកូនស្រីរបស់គាត់រំលោភកូនស្រីរបស់ខ្លួន តែរឿងនេះ គឺជនសង្ស័យនិងនារីរងគ្រោះបានស្រឡាញ់គ្នារយៈ៧ខែមកហើយ រហូតភាគីខាងប្រុសឡើងមកនៅផ្ទះខាងស្រី ហើយទិញម៉ូតូឲ្យខាងស្រីជិះ ស្រាប់តែរយៈពេលចុងក្រោយ ម្តាយខាងស្រីឃើញជនសង្ស័យមានសកម្មភាពប្លែក ក៏មកដាក់ពាក្យបណ្តឹងថាជាករណីរំលោភ ។
ក្រោយពីទទួលពាក្យបណ្តឹង នៅរសៀលថ្ងៃទី២៦ ខែវិច្ឆិកា ឆ្នាំ២០១៤ នគរបាលប៉ុស្តិ៍រដ្ឋបាលព្រៃពួច នៃអធិការដ្ឋាននគរបាលស្រុកអង្គស្នួល បានហៅជនសង្ស័យមកសាកសួរ ហើយឃាត់ខ្លួនតែម្តង ប៉ុន្តែការឃាត់ខ្លួននេះ ដោយសារជនសង្ស័យរួមភេទជាមួយអនីតិជន ។
ដោយឡែក ពាក់ព័ន្ធនឹងបណ្តឹងរំលោភដែលម្តាយស្ត្រីរងគ្រោះប្តឹងនោះ គ្រាន់តែជាចំណុចចាប់ផ្តើមនៃការទទួលពាក្យបណ្តឹងដើម្បីចាត់ការប៉ុណ្ណោះ បទល្មើសដែលត្រូវចោទ គឺជនសង្ស័យរួមភេទជាមួយអនិតិជន ។
ជនសង្ស័យមានឈ្មោះ នុប ឃីម ភេទប្រុស អាយុ២៦ឆ្នាំ មុខរបរជាកម្មករជំនាញបូមខ្សាច់ ស្នាក់នៅក្នុងការដ្ឋានបូមខ្សាច់ ភូមិអង្គរស្មី ឃុំព្រៃពួច ស្រុកអង្គស្នួល ខេត្តកណ្តាល ។ ក្មេងស្រីរងគ្រោះឈ្មោះ ស.ព.ផ.ន អាយុ១៤ឆ្នាំ យោងតាមសំបុត្រកំណើតមានទីលំនៅក្នុងភូមិអូរកំបុត្រ ឃុំព្រៃពួច ស្រុកអង្គស្នួល នៅក្បែរនឹងការដ្ឋានបូមខ្សាច់ ។
ប្រភពព័ត៌មានពីនគរបាលមូលដ្ឋានបានឲ្យដឹងថា ជនសង្ស័យ និងក្មេងស្រីរងគ្រោះបានមានទំនាក់ទំនងស្នេហាជាមួយគ្នាតាំងពីអំឡុងខែមសា ឆ្នា២០១៤ មកដល់ពេលនេះមានរយៈពេលជាង៧ខែ ។ ស្នេហារបស់ពួកគេទាំង២បានឈានទៅដល់ជ្រុលជ្រួសខុសប្រពៃណី ហើយភាគីខាងប្រុសបានមកស្នាក់នៅក្នុងផ្ទះខាងស្រី ប្រៀបដូចប្តីប្រពន្ធអ៊ីចឹង ។ សកម្មភាពស្នេហារបស់ពួកគេ ម្តាយខាងស្រីក៏បានដឹងដែរ តែមិនបានរារាំងនោះឡើយ ដោយសារភាគីខាងប្រុសបានទំនុកបម្រុងដល់គ្រួសារ ដើម្បីសម្រាលការលំបាកក្នុងជីវភាពប្រចាំថ្ងៃ រហូតដល់ភាគីខាងប្រុសផ្តល់ម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៤ ឲ្យគូស្នេហ៍របស់ខ្លួនជិះ ។
ប្រភពព័ត៌មានបានបន្តថា មកដល់រយៈពេលចុងក្រោយនេះ ភាគីខាងប្រុសបានមកសុំយកម៉ូតូទៅវិញ ដើម្បីជិះទៅធ្វើការ និងហាក់ដូចជាមានសកម្មភាពព្រងើយកន្តើយជាមួយយុវតីរងគ្រោះ ទើបធ្វើឲ្យស្ត្រីជាម្តាយនឹកក្នុងចិត្តថា ភាគីខាងប្រុសមានបំណងដោះដៃ ។ ក្រោយមក ស្ត្រីជាម្តាយបានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលព្រៃពួច ហើយត្រូវបានឃាត់ខ្លួនទៅតាមពាក្យបណ្តឹង ។
ក្រោយពីសមត្ថកិច្ចឃាត់ខ្លួន ម្តាយខាងស្រីមានបំណងដកពាក្យបណ្តឹងវិញ ដោយសារខាងប្រុសសុំរៀបការជាមួយ តែហួសពេលទៅហើយបណ្តឹងស្តីពីករណីរំលោភ ជារឿងមួយ ប៉ុន្តែរឿងដែលសំខាន់ គឺជនសង្ស័យរួមភេទជាមួយអនីតិជន ។
ពាក់ព័ន្ធករណីនេះដែរ លោកវរសេនីយ៍ទោ មាន សំណាង អធិការនគរបាលស្រុកអង្គស្នួល បានប្រាប់ឲ្យដឹងថា ការឃាត់ខ្លួនជនសង្ស័យ ធ្វើឡើងទៅតាមពាក្យបណ្តឹងរបស់ម្តាយខាងស្រី ក្រោយមកម្តាយខាងស្រីបានសុំដកពាក្យបណ្តឹងវិញ ព្រោះភាគីខាងប្រុសយល់ព្រមរៀបការជាមួយកូនស្រី ដើម្បីបញ្ចប់បញ្ហា ។ ការសម្រេចយ៉ាងណានោះ គឺស្ថិតនៅលើស្ថាប័នអយ្យការអមសាលាដំបូងខេត្តកណ្តាល ដោយសារករណីនេះជនសង្ស័យរួមភេទជាមួយអនីតិជន ប្រសិនបើខាងស្រីគ្រប់អាយុ ហើយមានការសម្របសម្រួលត្រូវរ៉ូវគ្នារបស់ភាគីទាំង២ សមត្ថកិច្ចអាចធ្វើការសម្រេបសម្រួលបាន តែក៏ត្រូវឆ្លងស្ថាប័នអយ្យការផងដែរ គ្រាន់តែថាស្រាលបន្តិច តែករណីនេះគឺរួមភេទជាមួយអនីតិជន ។
ទោះជាមានការសុំសម្របសម្រួលពីស្ត្រីជាម្តាយយ៉ាងណាក៏ដោយ ជនសង្ស័យមិនត្រូវបានសមត្ថកិច្ចដោះលែងនោះឡើយ គឺឃាត់ខ្លួនបញ្ជូនទៅកាន់ស្នងការដ្ឋាននគរបាលខេត្តកណ្តាល ដើម្បីកសាសំណុំរឿងបញ្ជូនទៅតុលាការខេត្តចាត់ការតាមនីតិវិធី ៕
______
ប្រភពពីនគរវត្ត
