គណៈកម្មការទី១០នៃរដ្ឋសភា គាំទ្រអង្គភាពប្រឆាំងអំពើពុករលួយ ក្នុងការរៀបចំបង្កើតច្បាប់ការពារប្រភព និងសាក្សី
រាជធានីភ្នំពេញ៖ គណៈកម្មការអង្កេត បោសសំអាត និងប្រឆាំងអំពើពុករលួយ ដែលជាគណៈកម្មការទី១០ នៃរដ្ឋសភា បានគាំទ្រអង្គភាពប្រឆាំងអំពើពុករលួយ ដែលបានរៀបចំសេចក្ដីព្រាងច្បាប់មួយដើម្បីការពារប្រភព ដែលជាអ្នករាយការណ៍ព័ត៌មាន និងសាក្សី ដែលទាក់ទងអំពើពុករលួយ ដើម្បីឲ្យការប្រយុទ្ធប្រឆាំងអំពើពុករលួយមានប្រសិទ្ធភាព។
ការគាំទ្រនេះ បានធ្វើឡើងនៅក្នុងជំនួបរវាងលោក ហូរ វ៉ាន់ ប្រធានគណៈកម្មការទី១០នៃរដ្ឋសភា ជាមួយលោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ (អ.ប.ព) កាលពីរសៀលថ្ងៃទី២៦ ខែវិច្ឆិកា ឆ្នាំ២០១៤ នៅវិមានរដ្ឋសភា។
លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយបានថ្លែងប្រាប់ ក្រុមអ្នកកាសែត បន្ទាប់ពីកិច្ចប្រជុំចប់ថា ជំនួបរវាងអង្គភាពប្រឆាំង អំពើពុករលួយ ជាមួយគណៈកម្មការទី១០ គឺជាជំនួបដំបូង ប៉ុន្តែជំនួបនេះទី១.ភាគីទាំងពីរបានពិភាក្សាគ្នាជុំវិញតួនាទីភារកិច្ច ដើម្បីធ្វើយ៉ាងម៉េចឲ្យអង្គភាពនីមួយៗ បំពេញភារកិច្ចរបស់ខ្លួនរៀងៗខ្លួន ស្របតាមច្បាប់របស់ខ្លួនឲ្យបានល្អត្រឹមត្រូវនៅក្នុងការងាររបស់ខ្លួន ហើយនេះជាបញ្ហាដែលនាំឲ្យយើងពិភាក្សាគ្នាយូរ ថាយើងត្រូវសហការគ្នាយ៉ាងម៉េច?គណៈកម្មការទី១០មានតួនាទីយ៉ាងម៉េច? អង្គភាពប្រឆាំងអំពើពុករលួយយ៉ាងម៉េច? ដូចជាការទទួលពាក្យប្តឹងជាដើម ថាការទទួលនោះត្រូវធ្វើយ៉ាងម៉េច? ហើយច្បាប់បានចែងច្បាស់ថា មានតែ អង្គភាពប្រឆាំងអំពើពុករលួយមួយគត់ ដែលមានសិទ្ធិស៊ើបអង្កេតលើបញ្ហាពុករលួយ ហើយស្ថាប័នផ្សេងទៀតដឹងពីបញ្ហាពុករលួយត្រូវប្តឹងទៅ អង្គភាពប្រឆាំងអំពើពុករលួយ មិនអាចយករឿងនេះទៅបើការស៊ើបអង្កេតដោយខ្លួនឯងទេ។
ទី២.គណៈកម្មការទី១០ បានគាំទ្រគំនិតរបស់ អង្គភាពប្រឆាំងអំពើពុករលួយ ក្នុងការបំពេញ ចំណុចខ្វះខាតផ្លូវច្បាប់ ដែលពាក់ព័ន្ធការប្រឆាំង អំពើពុករលួយ គឺឲ្យធ្វើសេចក្តីព្រាងច្បាប់មួយ ស្តីពីការការពារសាក្សី ការពារប្រភព ការពារអ្នករាយការណ៍។ ហើយបើគណៈកម្មការទី១០ គាំទ្រ នៅពេលច្បាប់នេះ មកដល់សភា និងមានការសហការល្អ លើបញ្ហានេះ។
ទី៣.អង្គប្រជុំក៏បានវាយតម្លៃថា អង្គប្រជុំទទួលបានលទ្ធផលផ្លែផ្កាល្អ ហើយអាចនាំមក នូវការសហការ បន្តបន្ទាប់ ទៅខាងមុខទៀតជាច្រើន។
ចំណែកលោក ហូរ វ៉ាន់ ប្រធានគណៈកម្មការទី១០ នៃរដ្ឋសភា បានថ្លែងថា នៅក្នុងជំនួបនេះយើងបានពិភាក្សាគ្នាលើគោលការណ៍ទូទៅ៖
ទី១.គោលការណ៍ សហប្រតិបត្តិការគ្នា រវាងគណៈកម្មការទី១០ និងអង្គភាពប្រឆាំង អំពើពុករលួយ និងបានយល់គ្នានូវ កិច្ចការជាច្រើន ដែលត្រូវសហការគ្នា ទៅថ្ងៃ ក្រោយ ពីព្រោះជាផលប្រយោជន៍ របស់ប្រទេសជាតិសង្គម។ ហើយគ្រាន់តែមានការប្លែកគ្នាបន្តិច គឺគណៈកម្មការទី១០ ប្រយុទ្ធប្រឆាំង អំពើពុករលួយ ក្នុងនាមអង្គការ នីតិប្បញ្ញត្តិ។ ចំណែកខាងលោក ឱម យ៉ិនទៀង ប្រយុទ្ធប្រឆាំង នៅក្នុងអង្គភាពប្រឆាំង អំពើពុករលួយ ដែលជាអ្នកអនុវត្ត និងប្រតិបត្តិភារកិច្ច ដោយផ្ទាល់។ ប៉ុន្តែយ៉ាងណា ក៏ដោយ ជាទិសដៅ ជាការសហការគ្នា ត្រូវមានការសហការគ្នាយូរអង្វែងតទៀត ដើម្បីជាផលប្រយោជន៍របស់សង្គម និងប្រទេសជាតិ។
ទី២.បានពិភាក្សាគ្នា អំពីបញ្ហាសាក្សី និងអ្នកផ្តល់ប្រភពព័ត៌មាន ជារួមគឺ គណៈកម្មការទី១០ នៃរដ្ឋសភា គាំទ្រឲ្យមានច្បាប់មួយ ដើម្បីការពារសាក្សី និងការពារប្រភព ដែលផ្តល់ព័ត៌មាន ពីព្រោះបញ្ហាពុករលួយ ជាបញ្ហាមួយដែលរស៊ើប ហើយក៏ជាបញ្ហាមួយ ដែលអាចបណ្តាល ឲ្យគ្រោះថ្នាក់ដល់អ្នក ដែលផ្តល់ព័ត៌មាន។ដូច្នេះបង្កើតច្បាប់នេះ ដើម្បីឲ្យប្រជាពលរដ្ឋ មហាជនទូទៅ នៅថ្ងៃក្រោយ អាចផ្តល់ព័ត៌មាន ហើយកាលណា ទទួលបានព័ត៌មានពិតច្រើន អង្គភាពប្រឆាំងអំពើពុករលួយ ក៏ដូចជាគណៈកម្មការទី១០ គឺមានភស្តុតាងមានហេតុផល ដើម្បីគាំទ្រ និងជម្រុញបញ្ហានេះ កុំឲ្យប្រជាពលរដ្ឋ មានការភ័យខ្លាចក្នុងបញ្ហានេះ។ ហើយគណៈកម្មការទី១០ ឯកភាព និងគាំទ្រលើអ្វី ដែលអង្គភាពប្រឆាំង អំពើពុករលួយ លើកពីបញ្ហាសាក្សី និងប្រភពអ្នករាយការណ៍។
ទី៣.ពិនិត្យជារួម ការងារទាំងអស់ ដែលធ្វើការជាមួយគ្នា ធម្មតាអង្គភាពពីរគឺ៖ ទី១.រដ្ឋសភា និងទី២.អង្គភាពប្រឆាំងអំពើពុករលួយ ហើយត្រូវសហការគ្នា ពីព្រោះវាមានបញ្ហាខ្លះ ដែលយើងត្រូវតែផ្តល់ព័ត៌មាន ឲ្យគ្នាទៅវិញទៅមក ពីព្រោះនៅថ្ងៃក្រោយ យើងត្រូវយកពាក្យបណ្តឹង ដែលកើតមានឡើង មកចាត់វិធានការ ដូច្នេះទាមទារ សហការគ្នាយូរអង្វែង តទៅមុខទៀត ជាមួយអង្គភាពប្រឆាំងអំពើពុករលួយ។
លោក ហូរ វ៉ាន់ បានបញ្ជាក់ដែរថា អ្វីធ្វើឲ្យមានការពិភាក្សាគ្នាបានយូនោះ គឺមិនមានអ្វីដែលខ្វែងគំនិតគ្នា ប៉ុន្តែគ្រាន់តែបញ្ហាខ្លះយើងត្រូវលើកឡើងឲ្យដឹងពីតួនាទី និងភារកិច្ចរៀងៗខ្លួន ហើយចង់ដឹងថា តើអង្គភាពប្រឆាំងអំពើពុករលួយហ្នឹង គាត់ឯករាជ្យទេ គាត់នៅក្រោមអំណាចណាមួយទេ? ហើយលោក ឱម យ៉ិនទៀង បានបញ្ជាក់ច្បាស់ហើយថា គាត់មិនស្ថិតនៅក្រោមនាយករដ្ឋមន្ត្រីដូចរដ្ឋមន្ត្រីនានាទេ និងបានបំពេញភារកិច្ចដោយឯករាជ្យ តាមសមត្ថកិច្ចរបស់គាត់ ហើយជាសមត្ថកិច្ចមួយ ដែលច្បាប់បានប្រគល់ជូនគាត់៕
ប្រភពពី Free Press Magazine
