ក្រុមការងារបច្ចេកទេសរបស់រដ្ឋាភិបាល ថៅកែរោងចក្រ និងសហជីព បញ្ចប់កិច្ចប្រជុំ ដោយមិនបានឯកភាព លើការតម្លើងប្រាក់ខែកម្មករ
ភ្នំពេញ: ក្រុមការងារបច្ចេកទេសត្រីភាគី ដែលមានសមាសភាពមកពីរដ្ឋាភិបាល ៩ រូប ភាគីថៅកែរោងចក្រ ៩ រូប និងមេដឹកនាំសហជីព ៩ រូប បានបញ្ចប់កិច្ចប្រជុំរយៈពេល ៧ ថ្ងៃ កាលពីព្រលប់ថ្ងៃព្រហស្បតិ៍ ទី៣០ ខែតុលា ឆ្នាំ២០១៤។ ប៉ុន្តែកិច្ចប្រជុំរបស់ក្រុមការងារបច្ចេកទេសចម្រុះ ត្រីភាគីនោះ មិនបានឯកភាព លើតួលេខរួម ស្តីពីការតម្លើងប្រាក់ខែកម្មករ សម្រាប់ឆ្នាំ២០១៥ នោះទេ។
តាមរយៈសន្និសីទកាសែត នៅពេលបិទបញ្ចប់កិច្ចប្រជុំ នៅទីស្តីការក្រសួងការងារ និងបណ្តុះបណ្តាលវិជ្ជាជីវៈ គឺភាគីទាំងបី មានតួលេខ ឬជំហររៀងខ្លួន។ សម្រាប់ភាគីតំណាងរដ្ឋាភិបាល កំណត់យកលេខ ១២១ ដុល្លារ។ ភាគីថៅកែរោងចក្រ រក្សាជំហរតម្លើងប្រាក់ខែកម្មកររោងចក្រកាត់ដេរ ត្រឹម ១១០ ដុល្លារ។ រីឯភាគីសហជីព កំណត់តួលេខ ១៤០ ដុល្លារ។
ប៉ុន្តែតំណាងរដ្ឋាភិបាល បានប្រកាសថា ក្រុមការងារបច្ចេកទេស សម្រេចយកតែតួលេខពីរប៉ុណ្ណោះ ដើម្បីបញ្ជូនទៅកាន់គណៈកម្មការប្រឹក្សាការងារ ដែលជាយន្តការត្រីភាគី ប្រជុំសម្រេចលើការតម្លើងប្រាក់ខែកម្មករ។ នោះគឺតួលេខ ១១០ ដុល្លារ ដែលជាជំហររបស់ភាគីថៅកែរោងចក្រ និងតួលេខ ១២១ ដុល្លារ ដែលជាជំហររបស់រដ្ឋាភិបាល។
ជាការកត់សម្គាល់ គណៈកម្មការប្រឹក្សាការងារ ដឹកនាំដោយលោកអ៊ិតសំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដោយមានការចូលរួមពីភាគីរដ្ឋាភិបាល ភាគីថៅកែរោងចក្រ និងភាគីសហជីពកម្មករ នឹងជួបប្រជុំគ្នា ដើម្បីសម្រេចចុងក្រោយ លើការតម្លើងប្រាក់ខែកម្មកររោងចក្រកាត់ដេរ នៅក្នុងវិច្ឆិកា។ កម្មកររោងចក្រកាត់ដេរសព្វថ្ងៃ ទទួលបានប្រាក់ខែអប្បបរមា ចំនួន ១០០ ដុល្លារ៕ ប្រភព ៖ CEN
