នាយករដ្ឋមន្ត្រីអូស្ត្រាលីរងនូវការបង្ខំឲ្យបញ្ជូនបុគ្គលិកសុខាភិបាលទៅទ្វីបអាហ្វ្រិក
រដ្ឋាភិបាលអូស្ត្រាលីកំពុងប្រឈមនឹងការរិះគន់ជាច្រើន ជុំវិញករណីដែលប្រទេសនេះ មិនបញ្ជូនបុគ្គលិកសុខាភិបាលរបស់ខ្លួនទៅទ្វីបអាហ្វ្រិក ដើម្បីជួយប្រយុទ្ធនឹងជំងឺអេបូឡា។
មន្ទីរពេទ្យរបស់សហរដ្ឋអាមេរិកសម្រាប់ដាក់នៅតាមសមរភូមិ ដែលមានគ្រែសម្រាប់អ្នកជំងឺ២៥នាក់ នឹងបើកដំណើរការព្យាបាលបុគ្គលិកសុខាភិបាលអន្តរជាតិ ដែលឆ្លងមេរោគអេបូឡានៅពេលឆាប់ៗខាងមុខនេះ។
រដ្ឋមន្ត្រីការបរទេសអូស្ត្រាលីបាននិយាយថា ស្ថានភាពនៅអាហ្វ្រិកខាងលិចមានគ្រោះថ្នាក់ណាស់ចំពោះបុគ្គលិកសុខាភិបាលអូស្ត្រាលី (រូបភាពពី៖ www.bbc.com)
ស្ត្រីអ្នកនាំពាក្យផ្នែកការងារសុខភាព លោកស្រី Catherine King ថ្លែងថា ពេលនេះមិនមានការលើកលែងទោសឲ្យរដ្ឋាភិបាលអូស្ត្រាលីទេ ជុំវិញករណីដែលប្រទេសនេះមិនបញ្ជូនបុគ្គលិកសុខាភិបាលទៅទ្វីបអាហ្វ្រិកនោះ។
ជាយូរមកហើយ ប្រទេសអូស្ត្រាលីបានបដិសេធមិនបញ្ជូនបុគ្គលិកសុខាភិបាលរបស់ខ្លួនទៅកាន់ទ្វីបអាហ្វ្រិក ដោយថ្លែងថា ខ្លួនមិនមានលទ្ធភាពជម្លៀស និងព្យាបាលពួកគេទេ បើសិនជាពួកគេឆ្លងមេរោគអេបូឡានោះ។
ទោះយ៉ាងណាប្រទេសអូស្ត្រាលីបានផ្ដល់ប្រាក់៨លានដុល្លារអូស្ត្រាលី ដល់សេវាកម្មជួរមុខ និងប្រាក់៤០លានដុល្លារអូស្ដ្រាលីផ្សេងទៀត ដល់អង្គការសុខភាពពិភពលោក ហើយមិនបានបដិសេធឈប់បន្តជំនួយនោះទេ។
ប្រទេសសៀរ៉ាឡេអូន និងអង្គការលើកលែងទោសអន្តរជាតិ បានថ្កោលទោសការសម្រេចចិត្តរបស់រដ្ឋាភិបាលអូស្ត្រាលី ដែលបានផ្អាកជាបណ្ដោះអាសន្ន មិនឲ្យពលរដ្ឋកាន់លិខិតឆ្លងដែនមកពីប្រទេសមានឆ្លងជំងឺអេបូឡានៅទ្វីបអាហ្វ្រិក ចូលទៅប្រទេសខ្លួន ថាជាការរើសអើង។
មកដល់ពេលនេះ មនុស្សជិត៥០០០នាក់បានស្លាប់ដោយជំងឺអេបូឡា ហើយចំនួនអ្នកឆ្លងមេរោគនេះសរុបមានច្រើនជាង១៣៧០០នាក់ ភាគច្រើនបំផុតនៃអ្នកឆ្លងជំងឺទាំងនោះស្ថិតនៅក្នុងទ្វីបអាហ្វ្រិក ដូចជានៅប្រទេសលីបេរី សៀរ៉ាឡេអូន និងប្រទេសហ្គីនៀ៕ ប្រភព ៖ VOD
