គណបក្សប្រជាជនកម្ពុជា ឆ្លើយតបជាមួយគណបក្សសង្គ្រោះជាតិ
ភ្នំពេញ: នៅថ្ងៃទី១២ ខែវិច្ឆិកា ឆ្នាំ២០១៤នេះ គណបក្សសង្គ្រោះជាតិ បានចេញសេចក្ដីថ្លែងការណ៍មួយ ដែលបានធ្វើការចោទប្រកាន់ដោយគ្មានមូលដ្ឋានត្រឹមត្រូវ មកលើគណបក្សប្រជាជនកម្ពុជា ថា បានរំលោភលើស្មារតី នៃកិច្ចព្រមព្រៀងរវាងគណបក្សទាំងពីរ កាលពីថ្ងៃទី២២ ខែកក្កដា ឆ្នាំ២០១៤ ទាក់ទងនឹងករណីដែលស្ថាប័នមានសមត្ថកិច្ចឃុំខ្លួនមន្ត្រីមួយរូបរបស់គណបក្សសង្គ្រោះជាតិ និងមនុស្សមួយចំនួនទៀត។
គណបក្សប្រជាជនកម្ពុជា សូមបញ្ជាក់ថា ករណីឃុំខ្លួនមនុស្សខាងលើនេះ គឺជាចំណាត់ការតាមផ្លូវច្បាប់របស់ស្ថាប័នមានសមត្ថកិច្ច ក្នុងសំណុំរឿងដែលពាក់ព័ន្ធនឹងអំពើប្រព្រឹត្តបទល្មើសធ្ងន់ធ្ងររបស់បុគ្គលទាំងនោះ គឺពុំមានទាក់ទងអ្វីដល់ការអនុវត្តកិច្ចព្រមព្រៀងរវាងគណបក្សប្រជាជនកម្ពុជា និងគណបក្សសង្គ្រោះជាតិឡើយ។
គណបក្សប្រជាជនកម្ពុជា សង្ឃឹមថា គណបក្សសង្គ្រោះជាតិ នឹងមានការប្រុងប្រយ័ត្នក្នុងការធ្វើសេចក្ដីថ្លែងការណ៍ជាសាធារណៈឲ្យបានត្រឹមត្រូវ និងមានផលប្រយោជន៍ដល់សភាពការណ៍ជាតិ។ គណបក្សប្រជាជនកម្ពុជា បញ្ជាក់ជាថ្មីនូវឆន្ទៈក្នុងការអនុវត្តយ៉ាងពេញលេញនូវស្មារតី នៃកិច្ចព្រមព្រៀងរវាងគណបក្សទាំងពីរ ដើម្បីស្ថិរភាព វឌ្ឍនភាព និងភាពសុខដុមរមនា នៃសង្គមជាតិយើង៕ ប្រភព ៖ CEN
