មិនគួរឲ្យជឿ ថ្មទូរសព្ទថ្មីប្រើពេលត្រឹម៣០វិនាទីប៉ុណ្ណោះអាចសាកពេញ
ការបញ្ចូលថ្មទូរសព្ទគឺជាបញ្ហាមួយសម្រាប់អ្នកប្រើប្រាស់ Smartphone បច្ចុប្បន្ន ព្រោះសឹងថា គ្រប់ពេលពួកគេមិនសូវនៅឆ្ងាយពីឧបករណ៍កម្សាន្តដ៏សម្បូរបែបមួយនេះទេ។ ជុំវិញ បញ្ហានេះក្រុមហ៊ុន StoreDot ដែលវិនិយោគដោយមហាសេដ្ឋីរុស្ស៊ីម្ចាស់ក្លិបបាល់ទាត់ Chelsea លោក Roman Abramovich កំពុងអភិវឌ្ឍបច្ចេកវិទ្យាថ្មថ្មីបំផុតដែលអាចបញ្ចូលពេញប្រើពេលត្រឹម ៣០ វិនាទីប៉ុណ្ណោះ។
ក្រុមហ៊ុនខាងលើនិយាយថា ថ្មគំរូនាពេលបច្ចុប្បន្ននេះគឺមិនអាចដាក់លើ Smartphone កើតនៅឡើយព្រោះមានទំហំធំបន្តិច។ តែក្រុមហ៊ុនរំពឹងថា នឹងអាចកែច្នៃថ្មរបស់ពួកគេឲ្យបានស្ដើង និងប្រើនៅលើ Smartphone បាននៅឆ្នាំ ២០១៦ ខាងមុខ។
ស្ថាបនិក និង ជានាយកប្រតិបត្តិរបស់ក្រុមហ៊ុន StoreDot លោក Doron Mysersdorf បាននិយាយថា៖ “ផលិតផលប្រភេទថ្មីនេះ មិនធ្លាប់មានក្រុមហ៊ុនអភិវឌ្ឍនាពេលកន្លងមកទេ”។ បច្ចេកវិទ្យាថ្មីនេះគឺជាប្រភេទបច្ចេកវិទ្យា “nanodots” ដែលផ្សំឡើងពីម៉ូលេគុល bio-organic peptide ដែលអនុញ្ញាតអោយឲ្យស្រូបទាញថាមពលបានយ៉ាងលឿនចូលទៅក្នុងថ្ម។
លោក Zack Weisfeld ដែលជាអ្នកវិភាគទូរសព្ទបានប្រាប់ទៅគេហទំព័រ Techmistory ថា” យើងរស់នៅក្នុងពិភពដែលជួបប្រទះបញ្ហាថ្មខ្លាំង ហើយអ្នកប្រើប្រាស់តែងរត់ទៅរកកន្លែងសាកថ្មទូរសព្ទជានិច្ច។ StoreDot គឺជាក្រុមហ៊ុនមានសមត្ថភាពអាចដោះស្រាយបញ្ហាដ៏ធំនេះបាន”។
តែអ្វីដែលជាបញ្ហាចំពោះអ្នកប្រើប្រាស់វិញគឺថា ការបន្ថែមថ្មដ៏ពិសេសមិនធ្លាប់មាននេះនឹងបន្ថែមតម្លៃ Smartphone របស់ដល់ទៅ ១៧៥ ដុល្លារទៀត។ តាមការឲ្យដឹងវាអាចសាកថ្មបាន ១៥០០ដង គឺមានន័យថាវាអាចប្រើបានក្នុងរយៈពេលប្រហែល ៣ ឆ្នាំ។
ថ្លៃបន្តិចមែន តើសម្រាប់អ្នកមានលុយចូលចិត្តដេញស៊េរីទូរសព្ទប្រហែលជាមិនមានបញ្ហាទេ។ សំខាន់គឺពួកគេមិនខ្វល់ឈឺក្បាលហាលថ្ងៃនឹងបញ្ហាថ្មតទៅទៀត។
រង់ចាំសមិទ្ធផលនេះមកដល់ទីផ្សារទាំងអស់គ្នា!
