អាមេរិក៖ ពួកសកម្មប្រយុទ្ធរដ្ឋឥស្លាម IS ជាច្រើនរយនាក់ត្រូវបានសម្លាប់
ក្រសួងការពារជាតិអាមេរិក ប្រកាសថាកងទ័ពអាកាសរបស់អាមេរិក បានវាយប្រហារចំគោលដៅជាច្រើន ទៅលើពួកសកម្មប្រយុទ្ធរដ្ឋឥស្លាម នៅព្រំដែនប្រទេសស៊ីរី និងអុីរ៉ាក់ដោយបានសម្លាប់ក្រុមប្រដាប់អាវុធខុសច្បាប់ជាច្រើនរយនាក់។
ទីបញ្ជាការកងទ័ពអាមេរិក នៅក្រុងវ៉ាស៊ិនតោននិយាយថា ការវាយប្រហាររបស់កងទ័ពអាមេរិក បានធ្វើឲ្យពួកកម្មសកម្មប្រយុទ្ធ មិនអាចរុលមករកសមរភូមិជាច្រើនទៀតបាន ហើយធ្វើឲ្យកងទ័ពអុីរ៉ាក់ ចាប់ផ្ដើមដណ្ដើមយកទីតាំងរបស់ក្រុមប្រដាប់អាវុធទៀតផង។
ផ្សែងខ្មួលខ្មាញនៅលើដំបូលអគារ នៅប្រទេសស៊ីវី បន្ទាប់ពីមានការវាយប្រហារតាមដែនអាកាស ពីកងទ័ពអាមេរិក (រូបថតពី៖ Reuters)
ទីបញ្ជាការកងទ័ពអាមេរិក បញ្ជាក់ទៀតថា ជាមួយគ្នានេះមូលដ្ឋានរឹងមាំរបស់ពួកសកម្មប្រយុទ្ធ នៅតាមព្រំដែនស៊ីរី ជាពិសេសនៅទីក្រុង Kobane រងការវាយប្រហារយ៉ាងខ្លាំង ពីសំណាក់កងទ័ពអាកាសអាមេរិកកាលពីថ្ងៃពុធ ដោយធ្វើឲ្យក្រុមនេះមិនអាចពង្រីកទីតាំងខ្លួនបានឡើយ។
ប៉ុន្តែប្រធានាធិបតីអាមេរិក បារ៉ាក់អូបាម៉ា ដែលបានជួបប្រជុំជាមួយមេបញ្ជាការសម្ព័ន្ធមិត្ត ចំនួន២០ប្រទេស ដែលសហការគ្នាប្រឆាំងពួកសកម្មប្រយុទ្ធ មានប្រសាសថា គេត្រូវ ប្រើពេលវេលាច្រើនទៀត ទើបដឹងថាប្រតិបត្តិការបានជោគជ័យកម្រិតណា។
តាមរបាយការណ៍សម្ងាត់អាមេរិក ពួកសកម្មប្រយុទ្ធរដ្ឋឥស្លាម IS មានកម្លាំងរបស់ខ្លួនពី១៥០០០នាក់ ទៅ២០០០០នាក់ហើយ ក្នុងនោះមកពីបណ្ដាប្រទេសនៅអាស៊ី ចំនួន ១០០០នាក់៕ ប្រភព ៖ VOD
