៧ ចំណុចអតិថិជនតែងតែប្រៀបធៀប iPhone 6 និង 6 Plus
ក្រោយពីធ្វើការសម្ពោធនូវទូរស័ព្ទ iPhone 6 និង iPhone 6 Plus កាលពីថ្ងៃទី១៩ ខែកញ្ញាកន្លងទៅនេះ ក្រុមហ៊ុន Apple បានប្រឈមនឹងរលកបោកបក់ជាច្រើនពិសេសពាក្យរិះគន់ពីភាពទន់ងាយកោងនៃទូរស័ព្ទស៊េរីចុងក្រោយនេះ។
ទោះជាយ៉ាងណាក្ដី ក្រុមហ៊ុន Apple បានបំបែកកំណត់ត្រារបស់ខ្លួនដោយអាចលក់បានទូរស័ព្ទ១០លានគ្រឿងក្នុងរយៈពេល៣ថ្ងៃដំបូង និងថែមទាំងអួតទៀតថា ខ្លួនអាចលក់ច្រើនជាងនេះបើនៅស្ដុកមានផលិតផលទូរស័ព្ទទាំងពីរខាងលើ។
នារីម៉ូដែលលើកបង្ហាញទូរស័ព្ទ iPhone 6 Plus និង iPhone 6។ រូបថត AFP
ជាមួយនឹងការសម្ពោធម៉ូដែលទាំងពីរក្នុងពេលតែមួយ អ្នកគាំទ្រ Apple ជាច្រើនអាចរារែកមិនដឹងថាត្រូវជាវ iPhone 6 អេក្រង់៤,៧អ៊ិញ ឬក៏ iPhone 6 Plus អេក្រង់៥,៥អ៊ិញ។
ខាងក្រោមនេះគឺជាចំណុចទាំង៧ដែលអ្នកជំនាញចងក្រងទាក់ទិននឹងការប្រៀបធៀបពីអតិថិជនជារួម។
១. iPhone 6 Plus ធំពេក មិនអាចកាន់ប្រើដោយដៃតែម្ខាងនោះទេ។ វាមានលក្ខណៈដូចជាពពួកថេប្ល៊ិតដែលត្រូវដាក់លើតុមុននឹងប្រើដៃចុចច្រើនជាង។ តែ iPhone 6 បំពេញលក្ខខណ្ខជាទូរស័ព្ទដៃ និងមានទំហំធំល្មមស្រួលកាន់។
២. iPhone 6 Plus អាចឲ្យអ្នកប្រើប្រាស់មើលអេក្រង់គ្រប់កម្មវិធីដោយដាក់វាផ្ដេកមិនថាជាកម្មវិធីអ៊ីមែល ឬផ្ញើសារនោះទេ។ វាធំល្មម និងស័ក្ដិសមសម្រាប់អ្នកចូលចិត្តមើលរូបភាពផ្ដេក ខណៈដែល iPhone 6 មិនមានលទ្ធភាពធ្វើដូច្នោះឡើយ។
៣. បើប្រៀបធៀបរវាង iPhone 6 និង iPhone 6 Plus ម៉ូដែលធំមានកាមេរ៉ាគុណភាពល្អជាង ជាពិសេសក្នុងករណីថតរូបទីងងឹតដែលខ្វះពន្លឺ។ iPhone 6 Plus ក៏មានសមត្ថភាពទប់លំនឹងរូបភាពបានល្អជាងនៅពេលថតរូប និងវីដេអូផងដែរ។
៤. ត្បិតតែអេក្រង់ធំពិតមែនតែ iPhone 6 Plus កាន់ថ្មបានយូរជាង ពោលគឺវាអាចប្រើបានលើស១ថ្ងៃប្រសិនបើសាកថ្មពេញ។
៥. iPhone 6 Plus មានដង់ស៊ីតេរូបភាព៤០១ភីកសែលក្នុង១អ៊ិញ ខណៈ iPhone 6 មានត្រឹមតែ៣២៦ភីកសែលក្នុង១អ៊ិញ។ ប៉ុន្តែភ្នែកមនុស្សធម្មតាសឹងមិនអាចសម្គាល់ពីភាពខុសគ្នានេះឡើយ។
៦. iPhone 6 Plus មានកម្រាស់៧,៩មិល្លីម៉ែត្រ ពោលគឺក្រាស់ជាងiPhone 6 ចំនួន១មិល្លីម៉ែត្រ។
៧. iPhone 6 Plus (16G) តម្លៃប្រមាណ១០១០ដុល្លារ រីឯ iPhone 6 មានតម្លៃ៨៥០ដុល្លារ៕ ប្រភព ៖ ភ្នំពេញប៉ុស្តិ៍
