បុរសម្នាក់ញៀនអ៊ីនធឺណិតដោយសារ Google Glass
នេះជាករណីដ៏ចម្លែកមិនធ្លាប់មាន នោះគឺការញៀននឹងអ៊ីនធឺណិតរបស់បុរសម្នាក់ក្រោយប្រើ Google Glass ងុបងល់ពេក។
បុរសរូបនោះ បានប្រើប្រាស់ឧបករណ៍អេឡិចត្រូនិកនេះ ១៨ ម៉ោងក្នុងមួយថ្ងៃ ដោះចេញតែពេលគេង និងងូតទឹកប៉ុណ្ណោះ។ ចាប់តាំងពីទិញមករយៈពេល ២ ខែគឺគេប្រើដូចនេះរហូត។ ការញៀនបែបនេះ ធ្វើឲ្យរូបគេសូម្បីតែគេងក៏យល់សប្ដដូចឃើញខ្លួនឯងមើលតាមកញ្ចប់ Google Glass រហូតដែរ។ ពេលដោះចេញ បុរសរូបនោះហាក់មានអារម្មណ៍មិនស្រណុកនោះឡើយ។
អត្តសញ្ញាណរបស់បុរសញៀនអ៊ីនធឺណិតរូបនេះមិនត្រូវបានបញ្ចេញឲ្យដឹងឡើយ។
ការញៀនអ៊ីនធឺណិតដែលបណ្ដាលមកពីឧបករណ៍អេឡិចត្រូនិកដូចជា Smartphone និងកុំព្យូទ័របានក្លាយជាប្រធានបទពិភាក្សាដ៏ក្ដៅគគុកក្នុងចំណោមអ្នកជំនាញចិត្តវិទ្យាក្នុងសម័យបច្ចេកវិទ្យាដែលកំពុងតែដើរទៅមុខយ៉ាងលឿននេះ។ តែនេះជាករណីដំបូងដែលរកឃើញពិតប្រាកដពាក់ព័ន្ធនឹងការប្រើ Device ខាងលើហួសហេតុពេក។
លោកវេជ្ជបណ្ឌិត Andrew Doan ប្រធានផ្នែកស្រាវជ្រាវការញៀន និងការព្យាបាលនៃ កម្មវិធីញៀនជាតិស្រវឹង និងការព្យាបាលរបស់នាវិកអាមេរិក (Sarp) បានប្រៀបធៀបការញៀនអ៊ីនធឺណិតទៅនឹងស្រាដូច្នោះដែរ។
លោកបញ្ជាក់ដូច្នេះ៖ ”មនុស្សជាច្រើនគិតថា ជាតិស្រវឹងមិនមែនជាបញ្ហាទេ ហើយពួកគេរិះគន់ទៅលើមនុស្សជាអ្នកធ្វើវា។ តែឆ្លងកាត់រយៈពេលជាក់លាក់មួយអ្នកនឹងដឹងថា វាពិតជាកើតមានពិតប្រាកដមែន”៕
ប្រែសម្រួល៖ សីហា
ប្រភព៖ theguardian
