ទំនាក់ទំនងជិតស្និទ្ធរវាង GMAC និងស្ថាប័នរដ្ឋគឺជាដើមចមនៃការដំឡើងប្រាក់កម្មករកាត់ដេរមានការលំបាក
សមាគមកាត់ដេរសម្លៀកបំពាក់កម្ពុជា(GMAC) កំពុងផ្តល់មូលនិធិដល់មន្ត្រីរាជការជាន់ខ្ពស់ និងបានផ្តល់ជំនួយរាប់ពាន់ដុល្លារដល់ក្រសួងនានា។ នេះបើយោងតាមការបង្ហាញនៅក្នុងរបាយការណ៍ហិរញ្ញវត្ថុរបស់ GMAC។
ឯកសារដែលកាសែតកម្ពុជាចុងសប្តាហ៍ទទួលបាន បានបង្ហាញពីការងឿងឆ្ងល់ថា តើទំនាក់ទំនងរវាងតំណាងរោងចក្រកាត់ដេរសម្លៀកបំពាក់ ដែលកំពុងចរចាប្រាក់ឈ្នួលអប្បបរមារបស់កម្មកររោងចក្រកាត់ដេរមួយនេះ ជាមួយនឹងរដ្ឋាភិបាលជិតស្និទ្ធកម្រិតណា?
អ្នកដែលទទួលបានផលប្រយោជន៍ពីវិភាគទានរបស់តំណាងរោងចក្រកាត់ដេរសម្លៀកបំពាក់នេះ និងសមាគមរោងចក្រកាត់ដេរសម្លៀកបំពាក់កម្ពុជាខ្លួនឯង បានទាត់ចោលចំពោះទង្វើខុសឆ្គងនេះ ដោយប្រភពមួយបានឲ្យដឹងថា លោកជឿជាក់ថា អត្ថប្រយោជន៍របស់លោកគឺជាផ្នែកមួយនៃតួនាទីទទួលខុសត្រូវផ្នែកសង្គមរបស់ក្រុមហ៊ុន។
កម្មករ កម្មការិនីកំពុងចេញពីធ្វើការនៅក្នុងរោងចក្រមួយនៅជាយក្រុងភ្នំពេញកាលពីពេលថ្មីៗនេះ។ ម៉ៃ វីរៈ
របាយការណ៍ហិរញ្ញវត្ថុប្រចាំខែសីហារបស់ GMAC បានផ្តល់ព័ត៌មានលម្អិតស្តីពីការទូទាត់ឡើងវិញនូវទឹកប្រាក់ចំនួន ៣៥០ដុល្លារនៅ Cambodian Country Club សម្រាប់លោក សុខ សុភ័ក្ត្រ អគ្គនាយកនៃនាយកដ្ឋានពាណិជ្ជកម្មអន្តរជាតិប្រចាំក្រសួងពាណិជ្ជកម្ម។
ក្លិបនេះ គឺជាកម្មសិទ្ធិរបស់លោក Van Sou Ieng ប្រធានសមាគម GMAC មានសណ្ឋាគាររមណីយដ្ឋានមួយកន្លែង ភោជនីយដ្ឋានពីរកន្លែង និងសកម្មភាពកីឡាជាច្រើនទៀត រាប់ចាប់ពីកីឡាវាយកូនបាល់ រហូតមជ្ឈមណ្ឌលប្រណាំងសេះ។
លោក សុភ័ក្ត្រ បានថ្លែងអះអាងថា សមាគម GMAC បានមករកគាត់ដើម្បីពិភាក្សាអំពីសមាជិកភាព និងបានប្រាប់ថា ប្រាក់នោះមិនមែនជាប្រាក់សំណូកទេ ដោយសារលោកពុំបានស្នើសុំអ្វីតបស្នងមកវិញឡើយ។
លោកបានបន្តឲ្យដឹងថា៖ «សមាគម GMAC គ្រាន់តែប្រាប់ខ្ញុំថា វាជាមូលនិធិទទួលខុសត្រូវផ្នែកសង្គមរបស់ក្រុមហ៊ុន មូលនិធិសកម្មភាពកីឡាតែប៉ុណ្ណោះ»។
លោកបានថ្លែងបន្តថា៖ «បើខ្ញុំចូលរួម វាគឺជាព្រឹត្តិការណ៍សង្គម ពុំមានអ្វីទាក់ទងនឹងសេដ្ឋកិច្ចឬពីបញ្ហានេះ ឬបញ្ហានោះអ្វីទេ។ បើអ្នកមានមិត្តហើយអ្នកអញ្ជើញគាត់ពិសាកាហ្វេ អ្នកជជែកគ្នា មនុស្សគ្រប់គ្នាមានសិទ្ធិជជែកពិភាក្សាគ្នា»។
ដោយមានក្តីបារម្ភថា សមាជិកភាពដែលបានចំណាយប្រាក់របស់លោកនេះ អាចត្រូវបានចាត់ទុកថាជាជម្លោះផលប្រយោជន៍នោះ លោក សុភ័ក្ត្រ បានឲ្យដឹងថា ចាប់តាំងពីសារព័ត៌មានកម្ពុជាចុងសប្តាហ៍បានទាក់ទងមករូបលោកនោះ លោកបានប្រាប់ថា សមាគម GMAC បានដកឈ្មោះលោកចេញពីបញ្ជីឈ្មោះរបស់ពួកគេ។
ផ្ទះជួលតូចៗដែលកម្មករ កម្មការិនីជួលស្នាក់នៅ។ ម៉ៃ វីរៈ
លោកអគ្គនាយករូបនេះ បានឲ្យដឹងថា មានមន្ត្រីរដ្ឋាភិបាលផ្សេងទៀតជាច្រើន ក៏បានចុះឈ្មោះនៅ the country club នេះតាមរយៈសមាគម GMAC ហើយតំណាងខាងរោងចក្រខ្លួនឯងក៏បានទទួលស្គាល់ថា យ៉ាងហោចណាស់មានចំនួន៥រូបដែរ។
របាយការណ៍ហិរញ្ញវត្ថុនេះក៏បានបង្ហាញផងដែរពីការចំណាយជាសាច់ប្រាក់ចំនួន៥ពាន់ដុល្លារឲ្យក្រសួងពាណិជ្ជកម្មដែរ។
លោក Ken Loo អគ្គលេខាធិការរបស់សមាគម GMAC បានប្រាប់កម្ពុជាចុងសប្តាហ៍ថា ថវិកានេះគឺបានចំណាយដើម្បីជួយដល់កងទ័ពដែលប្រចាំការនៅខេត្តព្រះវិហារតាមព្រំដែនថៃ។
ការផ្តល់ជំនួយនេះ បានធ្វើឡើងជាកិច្ចឆ្លើយតបនឹងលិខិតមួយកាលពីថ្ងៃទី២៩ ខែកក្កដារបស់លោក អ៊ុក ប្រជារដ្ឋលេខាធិការក្រសួងពាណិជ្ជកម្ម ដែលបានផ្ញើមកលោកឧកញ៉ា ឬធុរជនមានអំណាចដែលជាប្រធានក្រុមហ៊ុន រោងចក្រ និងសហគ្រាសនានា។
លោក Loo បានប្រាប់ កម្ពុជាចុងសប្តាហ៍ថា៖ «វាជាលិខិតផ្លូវការមួយរៃអង្គាសជំនួយ ហើយយើងធ្វើបែបនេះជាញឹកញាប់ នៅពេលដែលមានសំណើជាផ្លូវការ ហើយវាមិនមែនជាថវិកាសម្រាប់ក្រសួងនេះនោះទេ»។
យោងតាមលោក Loo បានឲ្យដឹងទៀតថា ការស្នើសុំរបស់ក្រសួងរដ្ឋាភិបាលនានា បានកើតឡើងជាប្រចាំ ហើយសមាគម GMAC នឹងធ្វើតាមសំណូមពរ ដរាបណាមានលិខិតផ្លូវការ ហើយវាមិនមែនជាវិភាគទានផ្ទាល់ទៅក្រសួងនោះទេ។
នេះគឺជាភ័ស្តុតាងបញ្ជាក់ពីការផ្តល់ជំនួយជាអាវយឺតចំនួន១ពាន់លានដុល្លាររបស់សមាគម GMAC ដែលមានបង្ហាញនៅក្នុងរបាយការណ៍ហិរញ្ញវត្ថុរបស់ខ្លួននៅខែសីហា ផ្ញើជូនក្រុមប្រឹក្សាអភិវឌ្ឍន៍កម្ពុជា ដែលលោក Loo បានលើកឡើងថា ជំនួយនេះគឺផ្តល់ជូនតាមការស្នើសុំ។
លោកបានថ្លែងបន្តថា៖ «យើងពុំដែលគាំទ្រចំពោះសំណើណាមួយសម្រាប់គណបក្សនយោបាយជាក់លាក់ណាមួយទេ ដោយសារយើងពុំគាំទ្រគណបក្សនយោបាយណាមួយដោយផ្ទាល់ឡើយ តែបើសំណើនោះវា...ចេញមកពីក្រសួង ដោយចាត់ទុកជាផ្នែកនៃសកម្មភាពរបស់ពួកគេ ហើយវាមិនមែនជាការប្រកាន់បក្ខពួកនិយមនោះ វាអាចនឹងក្លាយជាការប្រកាន់បក្ខពួកនិយម ដែលត្រូវលើកឡើង តែវាមិនមែនជារឿងដែលយើងត្រូវលូកដៃចូលនោះទេ»។
កាលពីឆ្នាំមុន សមាគម GMAC បានអមដំណើរជាមួយនឹងក្រសួងការងារ និងនាយកដ្ឋានអង្គរក្សរបស់លោក ហ៊ុន សែន ក្នុងដំណើរទស្សនកិច្ចពីរផ្សេងគ្នាទៅកាន់ខេត្តព្រះវិហារ ដោយមានជំនួយ ដូចជា មី និងសម្លៀកបំពាក់ផ្តល់ជូនកងទ័ពរដ្ឋាភិបាលជាភ័ស្តុតាងមួយដែលលោក Loo អះអាងថា អង្គភាពរបស់លោកពុំបានផ្តល់ឲ្យក្រសួងតែមួយនោះទេ។
លោក Loo បានថ្លែងបន្តថា ដូចជាវិភាគទានរបស់សមាគម GMAC ផ្តល់ឲ្យអង្គការមនុស្សធម៌អ៊ីចឹងដែរ ដូចជាអង្គការកាកបាទក្រហម និងអង្គការ CARE ពោលគឺជាវិភាគទានរបស់អង្គភាពនេះផ្តល់ជូនរដ្ឋាភិបាលនៅពេលដែលត្រូវការ។
លោកបានបដិសេធថា ជំនួយរបស់សមាគម GMAC បានបង្កើតឲ្យមានផលប្រយោជន៍មិនស្មើភាពលើអ្នកដែលពុំបានផ្តល់ជំនួយ ឬថា អង្គភាពរបស់ លោកប្រើប្រាស់ប្រព័ន្ធគាំទ្រសង្គមនៅកម្ពុជា។
លោកបានលើកឡើងថា៖ «ជំនួយគឺជំនួយ នរណាម្នាក់ដែលពុំបានផ្តល់ប្រាក់ នឹងត្រូវមានទោសទេ? តើពួកគេអាចមានទោសកម្រិតណា?»។
លោកបានបន្តថា៖ «សំណើសុំជំនួយ បានកើតឡើងគ្រប់ពេល និងគ្រប់ក្រសួង នានានៅកម្ពុជា»។
លោក ពេជ្រ ពិសី អគ្គនាយកកម្មវិធីតម្លាភាពអន្តរជាតិ បានថ្លែងថា វាគឺជារឿងធម្មតានៅកម្ពុជាហើយដែលក្រសួងនានាស្នើសុំជំនួយពីវិស័យឯកជន ដើម្បីបញ្ជូនបន្តទៅឲ្យសាធារណជន ហើយប្រាប់ថាជាអំណោយផ្តល់ជូនក្រសួង»។
លោក ពិសី បានបន្តឲ្យដឹងថា ការផ្តល់ជំនួយដល់ក្រសួង ឬកាដូដែលផ្តល់ជូនរដ្ឋមន្ត្រី មិនមែនជារឿងខុសច្បាប់ទេ តែវាគឺជាកាតព្វកិច្ចផ្នែកសីលធម៌ ដែលចាំបាច់ត្រូវអនុវត្ត ហើយតម្លាភាពកាន់តែប្រសើរនឹងធានាបាននូវជំនឿទុកចិត្តកាន់តែខ្លាំង។
លោកមានប្រសាសន៍ថា៖ «រាល់ចម្ងល់របស់សាធារណជនព្រួយបារម្ភ ការដោះដូរប្រាក់រវាងវិស័យឯកជន និងរដ្ឋាភិបាល អាជ្ញាធរពាក់ព័ន្ធ គប្បីត្រូវស៊ើបអង្កេតពីបញ្ហានោះ»។
អ្នកដែលធ្វើការទាក់ទងនឹងការចរចាពីប្រាក់ឈ្នួលអប្បបរមានាពេលបច្ចុប្បន្ន រិះគន់កាន់តែខ្លាំងចំពោះទំនាក់ទំនងដ៏ជិតស្និទ្ធរវាងរដ្ឋាភិបាល និងសមាគម GMAC។
គណៈកម្មាធិការប្រឹក្សាយោបល់ការងារ ដែលត្រូវបានបង្កើតឡើងដោយតំណាងរោងចក្រចំនួន៧រូប តំណាងរដ្ឋាភិបាលចំនួន៧រូប និងតំណាងសហជីពចំនួន៧រូប ត្រូវមានការបកស្រាយពីការដំឡើងប្រាក់ឈ្នួលលើកក្រោយ ដោយសេចក្តីជូនដំណឹងនឹងត្រូវប្រកាសនៅខែក្រោយនេះ។ អង្គភាពពាក់ព័ន្ធនីមួយៗ ត្រូវរក្សាឯករាជភាពរបស់ខ្លួនម្នាក់ៗ។
លោក Joel Preston អ្នកផ្តល់ប្រឹក្សាប្រចាំមជ្ឈមណ្ឌលអប់រំច្បាប់សម្រាប់សហគមន៍ដែលអង្គការរបស់លោក អនុវត្តកម្មវិធីគាំទ្រពលករ តែបម្រើជាភ័ស្តុតាងនៃដំណើរការផ្នែកតូច បានថ្លែងថា ជំនួយនិងអំណោយដែលផ្តល់ជូនរដ្ឋាភិបាលគឺការសម្ងាត់ដែលត្រូវលាតត្រដាង។
កម្មករ កម្មការិនីរោងចក្រកាត់ដេរបានដើរដង្ហែក្បួនដើម្បីទាមទារដំឡើងប្រាក់ខែអប្បបរមាចំនួន១៧៧ ដុល្ហារក្នុងមួយខែកាលពីដើមខែនេះ។ ហុង មិនា
លោកបានថ្លែងបន្តថា៖ «វាល្បីល្បាញខ្លាំងណាស់ថា ដំណើរការចរចាត្រីភាគីនៅក្នុងការចរចាពីប្រាក់ឈ្នួលនេះ ជាក់ស្តែងមានតែពីរភាគីប៉ុណ្ណោះ ហើយឯកសារទាំងនេះ បង្ហាញថា ភាគីមួយក្នុងចំណោមភាគីទាំងពីរនោះគឺអ្វី? ទំហំនៃការចរចាមានទំនោរខ្លាំងចំពោះផលប្រយោជន៍របស់ភាគីនោះ»។
លោក Loo អគ្គលេខាធិការសមាគម GMAC បានថ្លែងថា ការចរចាប្រាក់ឈ្នួលពុំបានរងឥទ្ធិពលដោយសារជំនួយរបស់សមាគម GMAC ទេ ជាពិសេស ជំនួយទាំងនោះ បានបង្ហាញថា ជាជំនួយដែលផ្តល់ឲ្យក្រសួងពាណិជ្ជកម្ម មិនមែនក្រសួងការងារទេ។
លោកបានថ្លែងបន្តថា៖ «វាមិនមែនជាផ្នែកមួយនៃការពិចារណារបស់យើង ដោយសារមានជំនួយផ្សេងទៀត ដែលផ្តល់ជូនរដ្ឋាភិបាលគ្រប់ពេល»។
លោកបានថ្លែងបន្តថា៖ «វាមិនមែនជាផ្នែកមួយនៃការពិចារណារបស់យើង ដោយសារមានជំនួយផ្សេងទៀត ដែលផ្តល់ជូនរដ្ឋាភិបាលគ្រប់ពេល»។
លោកមានប្រសាសន៍ទៀតថា៖ «ជំនួយដែលផ្តល់ជូនក្រសួងពាណិជ្ជកម្ម មិនពាក់ព័ន្ធនឹងបញ្ហាអ្វីទាំងអស់ ខ្ញុំពិតជាមិនឃើញមានអ្វីទាស់ខុសចំពោះការផ្តល់ជំនួយនេះទេ»។
លោក Loo បានរៀបរាប់ដោយពុំបានផ្តល់ព័ត៌មានលម្អិតថា ចំពោះសមាជិកភាពក្នុងក្លិបហាត់ប្រាណវិញ វាគឺជាផ្នែកមួយនៃផែនការចំណាយ ដែលធ្វើឲ្យតម្លៃសេវារបស់អតិថិជនកាន់តែទាប ដើម្បីចូលរួមនៅក្នុងក្លិប country club របស់លោក Van Sou Ieng ប្រធានសមាគម GMAC។
លោកថ្លែងថា «យើងគ្រាន់តែធ្វើប័ណ្ណសមាជិកភាពថ្មី ហើយវាមានតម្លៃថោកជាងមុនប៉ុណ្ណោះ»។
ព័ត៌មាននេះ បានធ្វើឲ្យលោក ស៊ុន ចាន់ថុល រដ្ឋមន្ត្រីក្រសួងពាណិជ្ជកម្មភ្ញាក់ផ្អើលយ៉ាងខ្លាំង។
លោក ចាន់ថុល បានឲ្យដឹងតាមរយៈអ៊ីមែលថា៖ «ខ្ញុំពុំបានដឹងពីការស្នើសុំឲ្យសមាគម GMAC ឬការចំណាយលើសមាជិកភាពរបស់ក្រសួងពាណិជ្ជកម្មនេះទេ»។
រដ្ឋមន្ត្រីរូបនេះ បានណែនាំឲ្យសារព័ត៌មាន កម្ពុជាចុងសប្តាហ៍សាកសួរព័ត៌មានពីនាយកខុទ្ទកាល័យរបស់លោក ដែលពុំអាចសុំការបំភ្លឺពីបញ្ហានេះបាន៕ BP
