ប៊ុន ផៃលីន សង្សារធានាយកទៅប្រទេសអូស្ត្រាលី
ភ្នំពេញៈ បន្ទាប់ពីបង្ហាញភាពសិចស៊ីធ្វើឲ្យទស្សនិកជនក្តៅសាច់មួយឆាវ ស្រាប់តែពេលនេះតារាចម្រៀងនិយមយកដើមទ្រូងធ្វើជាដើមទុនច្បាមយកប្រជាប្រិយភាពលើវិថីសិល្បៈ កញ្ញា ប៊ុន ផៃលីន បានទៅដល់ដែនដីទីក្រុងមែលប៊ន ប្រទេសអូស្ត្រាលី តាមរយៈការធានារបស់បុរសជាគូស្នេហ៍បាត់ទៅហើយ។
តាមការទូរស័ព្ទមកកាន់ភ្នំពេញ ប៉ុស្តិ៍ កាលពីថ្ងៃអាទិត្យទី១៩ ខែតុលាកន្លងមកនេះ នាង ប៊ុន ផៃលីន បានប្រាប់ថា៖ «ខ្ញុំបានមកដល់ទឹកដីអូស្ត្រាលី បានរយៈពេល១០ថ្ងៃហើយ ពេលនេះអផ្សុកណាស់មិនដឹងដើរទៅណាទេ បើមិនដែលស្គាល់គេ ហើយក៏វង្វេងទៀតនោះ»។
តារាចម្រៀងនាង ប៊ុន ផៃលីន។ រូបថត សហការី
ទាក់ទិននឹងដំណើរទៅអូស្ត្រាលីដោយភាពស្ងាត់ស្ងៀមនេះ ស្រីស្រស់ប្រែសម្ផស្សពីនារីរោងចក្រ មកជាតារានាង ផៃលីន បានប្រាប់ថា៖ «ខ្ញុំមកនេះ មិនមែនតាមការធានារបស់សមាគមសិល្បៈណាមួយ ដើម្បីយកមកសម្តែងនោះទេ គឺម្ចាស់ស្នេហ៍ខ្ញុំជាអ្នកធានាដាច់មុខមក តែខ្ញុំក៏នឹងត្រៀមឡើងឆាកសិល្បៈជាហូរហែដែរ»។
ការទៅដល់ដែនកោះអូស្ត្រាលីនេះ ប៊ុន ផៃលីន បានឲ្យដឹងថា នោះជាដំណើរស្វែងយល់ចិត្តគ្នាជាមួយសង្សារ មិនមែនរូបនាងរើបង្វេចមករស់នៅអូស្ត្រាលីនោះទេ។
នាងបាននិយាយថា៖«ម្ចាស់ស្នេហ៍គាត់ធានាមក ទីមួយដើម្បីផ្តល់ឱកាសស្វែងយល់ចិត្តថ្លើមគ្នាទៅវិញទៅមក ដ្បិតថាគាត់មិនមានពេលវេលាគ្រប់គ្រាន់សម្រាប់ចុះមកស្រុកខ្មែរ និងមួយទៀតចង់ឲ្យខ្ញុំបានមកស្គាល់ប្រទេសអូស្រ្តាលីនេះផង ហើយពេលមកដល់ទីនេះក៏ឆ្លៀតទទួលការងារសម្តែងខ្លះៗទៅ ដើម្បីបានស្គាល់បងប្អូនខ្មែរនៅទីនេះខ្លះទៀត»។
បើទោះជានាង ប៊ុន ផៃលីន មានចេតនា ប្រាប់ពីដំណើរដែលនាំឲ្យនាងមានវាសនាស្គាល់ដែនកោះអូស្ត្រាលីជាលើកដំបូង ដោយសារទឹកចិត្តម្ចាស់ស្នេហ៍នាងក៏ដោយ ប៉ុន្តែនាងបែរជាបដិសេធមិនបរិយាយពីឈ្មោះម្ចាស់ស្នេហ៍នាង ហើយមិនរំពឹងចំណងស្នេហ៍នេះផ្តល់ឲ្យនាងទទួលបានភាពកក់ក្តៅនិងទទួលបានសុភមង្គលពិតសម្រាប់អនាគតដែរ។
នាងប្រាប់ថា៖«ខ្ញុំក៏អរគុណគាត់ដែរ ដែលបាននាំឲ្យខ្ញុំស្គាល់ប្រទេសអូស្រ្តាលី។ តែមិនទាន់គិតថាគាត់ជាអនាគតនោះដែរ ដរាបណា ឪពុកម្តាយខ្ញុំមិនទាន់ទទួលបានជំនូនបណ្ណាការពីគាត់នោះ»។
ប៊ុន ផៃលីន និយាយថា៖ «ស្រ្តីខ្មែរទោះយ៉ាងណាចាំបាច់ត្រូវគោរពប្រពៃណីទំនៀមទម្លាប់ដូនតាដែរ មានចាស់ទុំចូលដល់មេបាខាងស្រីសិនដែរ តែបើពេលនេះយើងទើបចាប់ផ្តើមចិត្តនិងចិត្តតែពីរនាក់ក៏មិនទាន់រំពឹងថាយ៉ាងម៉េចដែរចាំបាច់ត្រូវការឲ្យមានជំនូនពីមេបាខាងប្រុសជូនដល់ដៃមេប៉ាខាងស្រីសិន»៕ប្រភព ពី Postkhmer
