AirAsia បង្កើនជើងហោះហើរទៅកាន់ខេត្តសៀមរាប
ក្រុមហ៊ុនអាកាសចរណ៍ AirAsia ដែលមានជើងហោះហើរភ្ជាប់ពីខេត្តសៀមរាប និង ក្រុងបាងកក បានប្រកាសកាលពីដើមសប្តាហ៍នេះពីគម្រោងបន្ថែមជើងហោះហើរភ្ជាប់តំបន់ទាំងពីរឲ្យបាន ៣ដងក្នុងមួយថ្ងៃចាប់ពីខែធ្នូ ២០១៤ នេះតទៅ។
បច្ចុប្បន្នក្រុមហ៊ុននេះកំពុងដំណើរការហោះហើរភ្ជាប់ខេត្តសៀមរាប និងបាងកក ដោយមានពីរជើងក្នុងមួយថ្ងៃ។
លោកស្រី ផនពុន រ៉ាតាណាពិតាគុល ប្រធានផ្នែកទីផ្សារក្រុមហ៊ុន AirAsia បានលើកឡើងក្នុងសេចក្តីប្រកាសព័ត៌មានរបស់ក្រុមហ៊ុនថា ក្រុមហ៊ុនបានសម្លឹងឃើញពីសក្តានុពលនៃប្រតិបត្តិការជើងហោះហើរភ្ជាប់ទីក្រុងសៀមរាមហើយ ហេតុដូច្នេះក្រុមហ៊ុនក៏សម្រេចបន្ថែមជើងហោះហើរមួយជើងទៀត ដើម្បីឆ្លើយតបនឹងកំណើនតម្រូវការសេវានេះ។
អ្នកស្រីលើកឡើងថា ចាប់តាំងក្រុមហ៊ុនបានផ្តើមដំណើរការនៅកម្ពុជាចាប់តាំងពីដើមឆ្នាំ២០១៣ មក ក្រុមហ៊ុនបានដឹកជញ្ជូនភ្ញៀវសរុប ១៦ ម៉ឺននាក់រហូតមកទល់ពេលនេះ។ ក្នុងចំណោមភ្ញៀវទាំងអស់ គឺ៨០ភាគរយជាភ្ញៀវដែលធ្វើដំណើរទៅក្រុងសៀមរាប។
យន្តហោះរបស់ក្រុមហ៊ុន AirAsia ដែលបានចុះចតនៅព្រលានយន្តហោះអន្តរជាតិភ្នំពេញលើកដំបូងកាលពីដើមខែតុលា ឆ្នាំមុន។ រូបថត ភ្នំពេញប៉ុស្តិ៍
លោកស្រីថ្លែងថា៖«យើងរំពឹងថា ការបន្ថែមជើងហោះហើរនេះនឹងជួយឆ្លើយតបតម្រូវការដែលកំពុងកើនឡើង ហើយវានឹងផ្តល់ដល់ភ្ញៀវនូវជម្រើស និងពេលវេលាធ្វើដំណើរដ៏ល្អមួយ»។ លោកស្រី រ៉ាតាណាពិតាគុល បានលើកឡើងថា ការបន្ថែមជើងហោះហើរនេះនឹងជួយឲ្យក្រុមហ៊ុន អាចបម្រើការភ្ជាប់ជើងហោះហើរជាមួយបណ្តាញរបស់ក្រុមហ៊ុនកាន់តែល្អជាងមុន។
លោកស្រីអះអាងថា៖ «យើងពិតជាមានការសប្បាយរីករាយនិងមានកិត្តិយសក្នុងការប្រកាសបន្ថែមជើងហោះហើរពីសៀមរាប-បាងកកនេះ»។
សៀមរាបដែលជាគោលដៅទេសចរណ៍ដ៏មានសក្តានុពលមួយរបស់កម្ពុជាតែងបានទទួលចំនួនភ្ញៀវទេសចរកើនឡើងជាប្រចាំរៀងរាល់ឆ្នាំ។ គិតចាប់ពីខែ មករា ដល់ ខែកញ្ញាឆ្នាំនេះ ខេត្តសៀមរាបទទួលបានភ្ញៀវទេសចរបរទេសចូលទស្សនាប្រមាណ១,៧៤ លាននាក់ គឺកើនឡើងជាង១០ភាគរយក្នុងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យភ្ញៀវទេសចរពីមន្ទីរទេសចរណ៍ខេត្តសៀមរាប។ ក្នុងចំណោមភ្ញៀវទេសចរបរទេសចូលទស្សនាខេត្តសៀមរាបទាំងអស់ ភ្ញៀវជនជាតិកូរ៉េមានចំនួនច្រើនជាងគេ បន្ទាប់មក ចិន ជប៉ុន វៀតណាម ថៃ និង អាមេរិក។
លោក ឆឺយ ឆន អនុប្រធានមន្ទីរទេសចរណ៍ខេត្តសៀមរាបបានប្រាប់កាសែតកម្ពុជាចុងសប្តាហ៍ពីម្សិលមិញថា ការបន្ថែមជើងហោះហើររបស់ក្រុមហ៊ុនអាកាសចរណ៍ដើម្បីធ្វើដំណើរភ្ជាប់សៀមរាបគឺជាការល្អខណៈដែលចំនួនភ្ញៀវទេសចរបរទេសចូលមកខេត្តសៀមរាបតែងមានកំណើនជារៀងរាល់ឆ្នាំ។
លោកបន្ថែមថា៖ «ការបន្ថែមជើងហោះហើរនេះឆ្លុះបញ្ចាំងឲ្យឃើញថាទេសចរបរទេសកំពុងចាប់អារម្មណ៍ខេត្តយើងកាន់តែខ្លាំងឡើង ហើយក៏ទុកចិត្តសេវាកម្ម និងសន្តិសុខរបស់យើងផងដែរ»។
លោក ហូ វណ្ណឌី សហប្រធានក្រុម ការងារទេសចរណ៍វិស័យឯកជន បានប្រាប់កម្ពុជាចុងសប្តាហ៍កាលពីម្សិលមិញថា ការបង្កើនវិធីតភ្ជាប់តំបន់គោលដៅទេសចរណ៍របស់កម្ពុជាទៅប្រទេសថៃគឺជាការល្អដែលនឹងផ្តល់អត្ថប្រយោជន៍កាន់តែច្រើនឡើងសម្រាប់លំហូរភ្ញៀវទេសចរបរទេសចូលមកកម្ពុជា។
លោកអះអាងថា ប្រទេសថៃត្រូវបានចាត់ទុកជាប្រទេសសំខាន់ និងទាក់ទាញជាងគេខាងវិស័យទេសចរណ៍ក្នុងតំបន់អាស៊ី ដែលមានភ្ញៀវទេសចរបរទេសចូលទស្សនាចន្លោះពី ២៥ ទៅ ២៧ លាននាក់ក្នុងមួយឆ្នាំៗ។ ដូច្នេះការបង្កើនផ្លូវ តភ្ជាប់ពីទីក្រុងបាងកក មកសៀមរាបនឹងរួមចំណែកធ្វើឲ្យភ្ញៀវទេសចរមកកម្ពុជាកើនឡើងផងដែរ ដែលនឹងផ្តល់ឱកាសល្អសម្រាប់ប្រតិបត្តិករដែលមានអាជីវកម្មទាក់ទងនឹងវិស័យទេសចរណ៍ផងដែរ។
លោកថ្លែងថា៖ «ខេត្តសៀមរាបគួរណាស់បន្តការអភិវឌ្ឍហេដ្ឋារចនាសម្ព័ន្ធ ហើយស្ថាប័នផ្នែកឯកជន និងរដ្ឋត្រូវតែធ្វើការសហការគ្នាឲ្យបានល្អដើម្បីផ្តល់សេវាកាន់តែប្រសើរដល់ភ្ញៀវទេសចរ។ តាមរយៈការផ្តល់សេវាកម្មល្អ យើងរំពឹងថា ចំនួនភ្ញៀវទេសចរមកប្រទេសយើងនឹងបន្តកើនឡើងថែមទៀត»។
រដ្ឋមន្ត្រីក្រសួងទេសចរណ៍ កាលពីម្សិលមិញបានអំពាវនាវឲ្យវិនិយោគិនវិនិយោគលើការសាងសង់សណ្ឋាគារ និងភោជនីយដ្ឋាននៅខេត្តសៀមរាប បន្ថែមទៀត ដើម្បីទទួលភ្ញៀវទេសចរដែលបន្តកើនឡើង។
ថ្លែងក្នុងពិធីបើកសម្ពោធព្រឹតិ្តការណ៍ពិព័រណ៍ម្ហូបអាហារ និងសណ្ឋាគារកាលពីដើមខែនេះ លោក ថោង ខុន បានលើកឡើងថា ខេត្តសៀមរាប កំពុងខ្វះបន្ទប់សណ្ឋាគារសម្រាប់ភ្ញៀវទេសចរជប៉ុន និងកូរ៉េ ខណៈចំនួនភ្ញៀវចិនកើនឡើងច្រើននៅរដូវភ្ញៀវច្រើន (High Season)។
លោកថ្លែងថា៖ «យើងឃើញតួលេខភ្ញៀវទេសចរជប៉ុន និងកូរ៉េ ឆ្នាំនេះតិចជាងឆ្នាំមុន។ ខ្ញុំបានសិក្សាពីបញ្ហានេះហើយបានរកឃើញថា ភ្ញៀវភាគច្រើនមិនអាចកក់សណ្ឋាគារបាន។ យើងខ្វះបន្ទប់សម្រាប់ពួកគាត់ ហើយភ្នាក់ងារទេសចរជប៉ុនបានលើកឡើងត្រង់ៗថា ពួកគេមិនអាចកក់សណ្ឋាគារសម្រាប់ស្នាក់នៅក្នុងខេត្តសៀមរាប បាន»។
លោកបានឲ្យដឹងទៀតថា៖ «ខ្ញុំសូមយកឱកាសនេះស្នើឲ្យវិស័យឯកជនវិនិយោគសង់សណ្ឋាគារបន្ថែមទៀតនៅខេត្តសៀមរាប។ ភ្ញៀវមកច្រើនណាស់ យើងត្រូវការបន្ទប់ និងភោជនីយដ្ឋានបន្ថែម»។
ជាមួយគ្នានេះដែរ លោក ថោង ខុន ថ្លែងថា គិតត្រឹមខែឧសភា ឆ្នាំ២០១៤ នេះ ការវិនិយោគលើវិស័យទេសចរណ៍មានចំនួន ៤៣ភាគរយនៃទំហំវិនិយោគសរុបដែលមាននៅក្នុងប្រទេសកម្ពុជា៕ប្រភព ពី Postkhmer
