កំពូលតម្កល់ទោសលោកហេង ពៅឲ្យជាប់គុក១៦ឆ្នាំ
ការកំពូលបានសម្រេចតម្កល់សាលដីការបស់សាលាឧទ្ធរណ៍ ឲ្យលោក ហេង ពៅ អតីតស្នងការនគរបាលរាជធានីភ្នំពេញ ជាប់ពន្ធនាគារ១៦ ឆ្នាំ និងគូកន ៤ នាក់ទៀតឲ្យជាប់ពន្ធនាគារក្នុងម្នាក់ៗ១៥ ឆ្នាំ ក្រោមការចោទប្រកាន់ពីបទ«ប៉ុនប៉ងនិងសមគំនិតមនុស្សឃាតដោយគិតទុកជាមុន» ទៅលើនាយឧត្តមសេនីយ៍ផ្កាយ៤លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេសដែលប្រព្រឹត្ត កាលពីអំឡុងឆ្នាំ ២០០៣។
ជាមួយគ្នានេះ តុលាការកំពូលបានសម្រេចលើកលែងការចោទប្រកាន់ ឈ្មោះ ព្រំ សោភារិទ្ធ ភេទប្រុស អាយុ ៤៥ ឆ្នាំ អតីតនាយរងនគរបាលព្រហ្មទណ្ឌកម្រិតស្រាលរាជធានីភ្នំពេញ។
លោក ហេង ពៅ នៅតុលាការកំពូលកាលពីថ្ងៃទី ២១ ខែតុលា។ ហុង មិនា
លោក យូរ ឧត្តរា ចៅក្រមជំនុំជម្រះ បានប្រកាសសាលដីកា កាលពីម្សិលមិញថា៖ «តុលាការកំពូលសម្រេចតម្កល់ទោសជនជាប់ចោទឈ្មោះ ហេង ពៅ អាយុ ៥៧ ឆ្នាំ ដាក់ពន្ធនាគារ១៦ឆ្នាំ ដដែល ពីបទសមគំនិតប៉ុនប៉ងមនុស្សឃាតដោយគិតទុកជាមុន។ ចំណែកឯជនជាប់ចោទឈ្មោះ លី រ៉ាស៊ី ភេទប្រុសអាយុ៤៥ឆ្នាំ ហង្ស វុទ្ធីហៅ យមរាជ ភេទប្រុស អាយុ៤៥ ឆ្នាំនិងឈ្មោះ ហង្ស វុត្ថា ហៅ ម៉ូវ អាយុ ៤៣ ឆ្នាំ (ប្អូនប្រុសបង្កើតរបស់ ហង្ស វុទ្ធី) ដាក់ពន្ធនាគារម្នាក់ៗ១៥ឆ្នាំពីបទប៉ុនប៉ងមនុស្សឃាត ដោយគិតទុកជាមុន»។
សំណុំរឿងនេះ សាលាដំបូងរាជធានី កាលពីឆ្នាំ ២០០៦ និងសាលាឧទ្ធរណ៍កាលពីឆ្នាំ ២០១០ បានសម្រេចផ្តន្ទាទោសឈ្មោះ ហេង ពៅ ដាក់ពន្ធនាគារ ១៦ ឆ្នាំ។ ចំណែកឯ លី រ៉ាស៊ី ហង្ស វុទ្ធី ហង្ស វុត្ថា អំ សំខេង (បានស្លាប់នៅក្នុងពន្ធនាគារ) និងឈ្មោះ ព្រំ សោភារិទ្ធ ដាក់ពន្ធនាគារ ម្នាក់ៗ១៥ ឆ្នាំ។
ទោះជាយ៉ាងណា លោក ហេង ពៅ បានចាត់ទុកការសម្រេចនេះថា ជារឿងអយុត្តិធម៌យ៉ាងខ្លាំងសម្រាប់រូបលោក។ លោកគូសបញ្ជាក់ថា៖ «រឿងរ៉ាវខាងលើនេះ គឺជាការប្រឌិតឡើងដោយលោកម៉ក់ ជីតូ (ប្រធាននាយកដ្ឋានកណ្តាលយុត្តិធម៌ក្រសួងមហាផ្ទៃ)ដើម្បីទម្លាក់កំហុស និងធ្វើបាបរូបខ្ញុំ»។
លោក ហេង ពៅ បាននិយាយទៀតថា៖ «ឥឡូវនេះ ខ្ញុំអស់ជំនឿលើប្រព័ន្ធតុលាការកម្ពុជា...ខ្ញុំនឹងដាក់ពាក្យប្តឹងទៅឧត្តមក្រុមប្រឹក្សា នៃអង្គចៅក្រម និងរដ្ឋសភាដើម្បីឲ្យគេសើរើរឿងក្តីរបស់ខ្ញុំទាំងអស់នោះឡើងវិញ។ ខ្ញុំក៏នឹងសុំឲ្យឧត្តមក្រុមប្រឹក្សានៃអង្គចៅក្រម និងរដ្ឋសភា ធ្វើការសើរើផងដែរ ពីរឿងក្តីរបស់លោក ម៉ក់ ជីតូ ដែលត្រូវបានតុលាការបិទមិនចាត់ការ»។
ចំណែកឯជនជាប់ចោទឈ្មោះ ហង្ស វុត្ថា បាននិយាយថា លោក ម៉ក់ ជីតូ បានប្រាប់លោកថា«បើចង់រួចខ្លួនត្រូវឆ្លើយដាក់ ហេង ពៅ ទៅ» ហើយបន្ទាប់ពីលោកប្រកែក លោកត្រូវបានគេដាក់ខ្នោះជើងជិត១ឆ្នាំ និងមិនឲ្យនរណាជួបទាំងអស់។
លោក ហេង ពៅ ដែលអស់អំណាចត្រូវបានចោទប្រកាន់ចំនួន១៦ករណី ដែលសុទ្ធតែជាបទល្មើសព្រហ្មទណ្ឌ ហើយបើរាប់បញ្ចូលទោសទាំងអស់របស់លោក រួមទាំងលើកនេះទៀត លោកត្រូវជាប់ពន្ធនាគារចំនួន១០៣ ឆ្នាំ។
លោក ម៉ក់ ជីតូ មិនអាចទាក់ទង ដើម្បីសុំការបំភ្លឺជុំវិញការចោទប្រកាន់របស់ទណ្ឌិតទាំងពីរនាក់នេះបានឡើយ កាលពីថ្ងៃសុក្រម្សិលមិញ៕ប្រភព ពី Postkhmer
