រដ្ឋាភិបាលអាចនឹងដំឡើងប្រាក់ខែ១លានរៀលដល់មន្ត្រីរាជការនៅឆ្នាំ២០១៨
រដ្ឋាភិបាលបានប្រកាសថា ប្រាក់ខែមន្ត្រីរាជការស៊ីវិល អាចនឹងត្រូវដំឡើងឲ្យដល់ ១លានរៀល(២៥០ដុល្លារ)នៅក្នុងឆ្នាំ ២០១៨ គឺជាចំនួនដែលធ្លាប់បានសន្យាផ្តល់ឲ្យដោយគណបក្សប្រឆាំងប្រសិនបើខ្លួនឈ្នះឆ្នោត និងក៏ជាចំនួនដែលក្រុមអង្គការសង្គមស៊ីវិលបានធ្វើការទាមទារតាំងពីយូរមកហើយផងដែរ។
យ៉ាងណាក្តី ក្រុមអង្គការសង្គមស៊ីវិលចង់ឲ្យមានការដំឡើងប្រាក់ខែភ្លាមៗដើម្បីជួយស្រោចស្រង់ជីវភាពមន្ត្រីរាជការ ដែលកំពុងដុនដាបដោយសារទំនិញគ្រប់ប្រភេទហក់ឡើងថ្លៃ ជាជាងអូសបន្លាយពេលវេលារហូតដល់ឆ្នាំ២០១៨ ដែលជាឆ្នាំបោះឆ្នោត ជ្រើសរើសតំណាងរាស្ត្រអាណត្តិទី៦។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានបង្ហាញឯកសារសេចក្តីព្រាងច្បាប់ថវិកាជាតិឆ្នាំ ២០១៥ ដែលបានអនុម័តដោយកិច្ចប្រជុំគណៈរដ្ឋមន្ត្រី ក្រោមអធិបតីលោកនាយករដ្ឋមន្ត្រីហ៊ុន សែន កាលពីថ្ងៃសុក្រម្សិលមិញថា ការដំឡើងប្រាក់ខែ១លានរៀល ជូនមន្ត្រីរាជការនៅឆ្នាំ២០១៨ គឺរដ្ឋាភិបាលបានដាក់ចេញវិធានការជាច្រើនដូចជា លុបបំបាត់មន្ត្រីរាជការ«ខ្មោចសា្លប់»និង«ខ្មោចរស់»។
ក្រុមមន្ត្រីរដ្ឋាភិបាល នៅក្នុងកិច្ចប្រជុំមួយនៅទីស្តីការគណៈរដ្ឋមន្ត្រីកន្លងមក។ ម៉ៃ វីរៈ
ឯកសារនោះ បង្ហាញតាមបណ្តាញហ្វេសប៊ុកលោក ផៃ ស៊ីផាន ថា ថវិកាសម្រាប់ចំណាយឆ្នាំ ២០១៥ នឹងត្រូវបានបង្កើនការចំណាយលើប្រាក់បៀវត្សរ៍ចំពោះមន្ត្រីរាជការដែលមានពី៤០ភាគរយនៃចំណាយចរន្តសរុប ឲ្យបានដល់៤៨,៦២ ភាគរយ សើ្ម៦,៤ភាគរយនៃGDP។ លោក ផៃ ស៊ីផាន បានប្រាប់ភ្នំពេញប៉ុស្តិ៍ថា៖ «រដ្ឋាភិបាលមានជំនឿខ្លាំងថានឹងអាចផ្តល់ឲ្យបាន២៥០ដុល្លារ»។
រដ្ឋាភិបាល បានសម្រេចដំឡើងប្រាក់ខែកាលពីខែកញ្ញាថ្មីៗនេះ ជូនដល់គ្រូបង្រៀន ដែលមានប្រមាណ១១ម៉ឺននាក់មុនគេ ដោយគ្រូបង្រៀនត្រូវទទួលបានប្រាក់ខែសរុប ចាប់ពី១៣០ដុល្លាររហូតទៅដល់ជាង២០០ដុល្លារ។
គណបក្សសង្គ្រោះជាតិ ដែលតែងតែទទូចឲ្យរដ្ឋាភិបាលដំឡើងប្រាក់ខែដល់មន្ត្រីរាជការឲ្យបានយ៉ាងតិចមួយលានរៀល ដើម្បីឲ្យពួកគាត់អាចរស់នៅបានក្នុងកម្រិតជីវភាពសមរម្យនោះបានសាទរចំពោះចំណាត់ការរបស់រដ្ឋាភិបាល។
លោក សុន ឆ័យ តំណាងរាស្ត្រគណបក្សសង្គ្រោះជាតិបានថ្លែងថា ការដំឡើងនេះជា«ភាពវិជ្ជមានដ៏ប្រសើរ» របស់រដ្ឋាភិបាល ប៉ុន្តែលោកថា មន្ត្រីរាជការគួរតែទទួលបានការដំឡើងប្រាក់ខែនេះ នៅមុនឆ្នាំ២០១៨ ដោយគ្រាន់តែរដ្ឋាភិបាលធ្វើការកែទម្រង់នូវការចំណាយទាំងឡាយឲ្យបានត្រឹមត្រូវ។ ចំណែក លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យចង់ឲ្យមានការដំឡើងប្រាក់ខែភ្លាមៗ។
លោកនិយាយថា៖ «វាដូចជាអូសបន្លាយយូរពេកបើចាំដល់២០១៨...ព្រោះបើយើងអូសបន្លាយ នោះការប្រកួតប្រជែងក្នុងតំបន់ មិនអាចទៅរួចឡើយ ព្រោះការអប់រំក៏សំខាន់លើប្រាក់ខែ ឯក្រសួងផ្សេងៗសំខាន់លើការរៀបចំអភិបាលកិច្ច។ បើប្រាក់ខែទាប អាចធ្វើឲ្យគាត់នៅតែប្រព្រឹត្តអំពើពុករលួយ»។
លោក កៅ ពឿន ប្រធានសមាគមមន្ត្រីរាជការកម្ពុជាឯករាជ្យ ក៏យល់ស្របដូចលោក រ៉ុង ឈុន ដែរ ដោយថ្លែងថា ៖ «ទោះបីជាមានការដំឡើងប្រាក់ខែជាបន្តបន្ទាប់នាពេលកន្លងមក ក៏ប្រាក់ខែមន្ត្រីរាជការនៅតែតិចតួច ដែលធ្វើឲ្យពួកគាត់ មិនអាចផ្តល់សេវាសាធារណៈល្អជូនពលរដ្ឋ។ ពួកគាត់នឹងនៅតែបន្តប្រព្រឹត្តអំពើពុករលួយ»។
លោកបញ្ជាក់ថា៖ «អ៊ីចឹងពួកគេនៅតែមិនអាចធ្វើឲ្យប្រជាពលរដ្ឋមានជំនឿកក់ក្តៅលើសេវារបស់រដ្ឋឡើយ»៕ប្រភព ពី Postkhmer
