កម្មកររោងចក្រ CWKH ប៉ះគ្នាមួយប្រាវ ជាមួយសមត្ថកិច្ច តែមិនមានអ្នករបួសនោះទេ
ភ្នំពេញ:
កម្មកររោងចក្រ CWKH ប្រមាណជាង ៣០០ នាក់ បានមកឈររារាំង
នៅខាងមុខរោងចក្រ ដោយមិនឲ្យកម្មករផ្សេងទៀត ចូលធ្វើការ
ដើម្បីបង្ខំឲ្យភាគីរោងចក្រ រកដំណោះស្រាយជូនតំណាងពួកគេទាំង ១៥ នាក់
ដែលរោងចក្រ បានបញ្ឈប់ពីការងារនោះ ឲ្យចូលធ្វើការវិញ។ហេតុការណ៍នោះ បានកើតឡើង កាលពីព្រឹកថ្ងៃទី២ ខែតុលា ឆ្នាំ២០១៤ ហើយរោងចក្រនេះ មានទីតាំងស្ថិតនៅក្នុងភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ។
ក្រោយពីមានករណីនេះ កើតឡើងភ្លាម គេបានឃើញកម្លាំងចម្រុះចុះទៅអន្តរាគមន៍។ ក្រោយមក ក៏កើតមានការប្រទាញប្រទុងគ្នា រហូតដល់មានការប៉ះទង្គិចគ្នាមួយប្រាវ ជាមួយសមត្ថកិច្ចផងដែរ។
ប៉ុន្តែហេតុការណ៍នោះ មិនបង្កឲ្យមានរបួសស្នាមអ្វីនោះទេ ទើបក្រុមកម្មករ ព្រមបើកឲ្យកម្មករដទៃទៀត ចូលធ្វើការតាមធម្មតាបាន។
បើតាមកម្មការិនី ឈ្មោះ ស្រីភណ្ឌ បានឲ្យដឹងថា មូលហេតុដែលក្រុមកម្មករនាំគ្នាមកឈររារាំងកម្មករដូចគ្នា មិនឲ្យចូលធ្វើការនេះ ដើម្បីបង្ខំឲ្យខាងភាគីរោងចក្រ ព្រមទទួលយកតំណាងរបស់ពួកគេ ចំនួន ១៥ នាក់ ដែលរោងចក្រ បានបញ្ឈប់ កាលពីពេលថ្មីៗនេះ ឲ្យបានចូលធ្វើការងារវិញ៕ H/N
ប្រភពពី CEN
