ព្រៃឈើនៅតំបន់ អភិរក្សក្នុងស្រុកសៀមប៉ាង កំពុងមានការកាប់បំផ្លាញ
ស្ទឹងត្រែង៖
គម្របព្រៃស្រោងនៅតំបន់អភិរក្សសំខាន់ៗជាច្រើនក្នុងស្រុកសៀមប៉ាង
បានដួលរលំរាបដល់ដីដោយរណាយន្ត
រាប់ពាន់គ្រឿងដើម្បីអូសទាញផលពីដើមឈើព្រៃឆ្លងទៅប្រទេសជិតខាង ។
សកម្មភាពទាំងនេះ
បានក្លាយជាទុក្ខព្រួយដ៏ធំក្នុងសហគមន៍ជនជាតិដើមភាគតិច
ថែមទាំងជាការបាត់បង់យ៉ាងធ្ងន់ធ្ងរនូវពពួកសត្វព្រៃកម្រក្នុងដែនដី
ភូមិភាគឦសាននេះ។ប្រភពព័ត៌មានពីប្រជាពលរដ្ឋនៅស្រុកសៀមប៉ាង បានឱ្យដឹងនាពេលថ្មីៗនេះថា គម្របព្រៃឈើស្រោងក្នុងតំបន់អភិរក្សនៅស្រុកសៀមប៉ាង កំពុងត្រូវបានកាប់បំផ្លាញដោយរណារយន្តរាប់ពាន់គ្រឿងរបស់ក្រុម ឈ្មួញទុច្ចរិត ក្នុងនោះតំបន់ព្រៃឈើស្រោងនៅឧទ្យានជាតិវីរជ័យ ជាគោលដៅចុងក្រោយបង្អស់ដែលត្រូវកាប់បំផ្លាញដើម្បីយកឈើប្រណីតទៅ លក់បានថ្លៃកប់ពពក។
ប្រជាសហគមន៍នៅស្រុកសៀមប៉ាងនិយាយថា នៅតំបន់អភិរក្សសំខាន់ៗនោះមានធនធានធម្មជាតិព្រៃឈើធំៗដែលមាន អាយុកាលរាប់រយឆ្នាំជាប្រភេទធ្នង់ បេង នាងនួន និងមិនរាប់បញ្ចូលប្រភេទឈើមួយចំនួនទៀតឡើយ។ ការកាប់បំផ្លាញព្រៃឈើធំៗទាំងនោះ កំពុងបង្កឱ្យមានការប៉ះពាល់ដល់ដើមឈើតូចៗដែលមិនអាចស្រោចស្រង់ បាន។ ការបាត់បង់គម្របព្រៃឈើស្រោងទាំងនោះ នឹងបង្កផលប៉ះពាល់យ៉ាងខ្លាំងដល់ទំនៀមទម្លាប់ និងការរស់នៅអាស្រ័យលើផលព្រៃឈើ និងសត្វព្រៃ ហើយការបាត់បង់គម្របព្រៃស្រោងនោះ ពពួកសត្វព្រៃកម្ររាប់រយរាប់ពាន់ក្បាលបានរត់ទៅប្រទេសជិតខាងអស់ ដែរ ដោយសារប្រទេសគេមានព្រៃឈើជាជម្រក។
ជាក់ស្តែង ពេលនេះមានសកម្មភាពយ៉ាងគំហុកនៃការកាប់បំផ្លាញព្រៃក្នុងឧទ្យាន ជាតិវីរជ័យចេញមកតាមច្រកអូរសាម៉ង អូរចិនទុក បន្តមកតាមអូរឃ្លៀងរហូតដល់ព្រំដែនឡាវក្នុងភូមិសាស្ត្រអូរបាសូត្រ ដែលមានចម្ងាយជាង១គីឡូម៉ែត្រពីទីតាំងនគរបាលវរការពារព្រំដែនស្រែ ចម្ប៉ាជាប់ព្រំដែនកម្ពុជា-ឡាវ និងជាតំបន់ទិញលក់ឈើដ៏ធំបំផុតផងដែរ។ ចំណែកឈើធ្នង់ត្រូវបានដឹកតាមរថយន្តឆ្ពោះទៅប្រទេសវៀតណាម។ តាមការឱ្យដឹងពីក្រុមអ្នកផ្តល់ព័ត៌មាននៅស្រុកសៀមប៉ាងរាយការណ៍ បន្តមកថា អ្នកប្រព្រឹត្តសកម្មភាពកាប់បំផ្លាញព្រៃឈើ និងដឹកជញ្ជូនទៅធ្វើអាជីវកម្មនោះត្រូវបានស្គាល់ស្ទើរតែជាទូទៅ ប៉ុន្តែមិនដឹងហេតុអ្វីក៏ក្រុមឈ្មួញទាំងនោះនៅតែអាចប្រព្រឹត្ត បទឧក្រិដ្ឋបែបនេះបាន។
ក្រុមឈ្មួញទាំងនេះបានដឹកជញ្ជូនឈើតាមទូកទៅប្រទេសឡាវ ដោយឆ្លងកាត់ការបង់លុយរាប់ក្បាលទូក។ ជាមួយគ្នានេះ បានលេចចេញព័ត៌មានពីក្រុមសមត្ថកិច្ចដែលទទួលបានផលប្រយោជន៍និយាយថា មានថ្ងៃខ្លះពេលដែលទឹកទន្លេជន់ខ្លាំង ទូកដឹកឈើឆ្លងកាត់ ក៏មានច្រើន អាចបានប្រាក់រហូតដល់៨លានរៀលក្នុងមួយស្ថាប័ន ប៉ុន្តែចំនួនលុយនេះគឺយកឱ្យមេកោយស្ទើរអស់ពីខ្លួនទៅហើយ ទុកតែបន្តិចបន្តួចសម្រាប់ដូរបាយប៉ុណ្ណោះ៕
ព្រៃឈើនៅតំបន់អភិរក្សក្នុងស្រុកសៀមប៉ាង កំពុងមានការកាប់បំផ្លាញប្រភពពី Free Press Magazine
