មន្រ្តី​គណ​បក្ស​សង្រ្គោះ​ជាតិ​ នៅ​ថ្ងៃ​អង្គារ​នេះ​​ឲ្យ​ដឹងថា​គណបក្ស​ប្រឆាំង​នឹង​ទទួល​បាន​​អាជ្ញាប័ណ្ណ​ទូរទស្សន៍​មួយ​ ដែលគណបក្ស​មាន​គោល​បំណង​​ផ្តល់​ព័ត៌មានបែប​​វិជ្ជា​ជីវៈ​ និង​មាន​ប្រយោជន៍​ដល់​ប្រជា​ពលរដ្ឋ​កម្ពុជា។

អ្នក​នាំពាក្យ​គណបក្សសង្រ្គោះជាតិ​ លោក យឹម សុវណ្ណ មាន​ប្រសាសន៍​ថា​ មក​ដល់​ពេល​នេះ គណបក្សសង្រ្គោះជាតិ បាន​សហការ​ជាមួយ​ក្រុមហ៊ុន​ឯក​ជន​មួយ​ ដោយ​ដាក់​ពាក្យ​ទៅ​ក្រសួង​ពាណិ​ជ្ជកម្ម​ ដើម្បី​ពិនិត្យ​ និង​ចុះបញ្ជី​ក្រុម​ហ៊ុន។ លោកបន្តថា​​ទូរទស្សន៍​មួយនេះនឹងត្រូវ​ដាក់​ឈ្មោះ​ថា​ប្រព័ន្ធផ្សព្វផ្សាយ​ឯក​រាជ្យ​របស់កម្ពុជា (Cambodian Independent Media) ដែល​នឹង​មាន​វិជ្ជាជីវៈ ក្រមសីលធម៌ និងផ្តល់ព័ត៌មានពិតប្រាកដ និង​មាន​​​ប្រយោជន៍​ដល់ប្រជាពលរដ្ឋ ដូច​ជា​ការ​លើក​តម្កើង​បញ្ហា​សិទ្ធិមនុស្ស និងលទ្ធិប្រជាធិបតេយ្យជាដើម។លោកបន្តថា ទូរទស្សន៍មួយនេះនឹង​មិន​ធ្វើ​ដូចទូរទស្សន៍​ក្នុង​ស្រុក​ភាគ​ច្រើនដែល​ជាទូរទស្សន៍​របស់គណបក្ស​ប្រជាជនកម្ពុជា។​ លោក​មានប្រ​សាសន៍​ថា​ទូរទស្សន៍​មួយ​នេះ​នឹង​មិន​និយាយ​ពី​គណបក្សសង្រ្គោះជាតិ​ច្រើន​នោះ​ទេ ហើយ​​នឹង​មាន​កម្ម​វិធី​កំសាន្ត​ច្រើ​ន​។

លោក យឹម សុវណ្ណ ឲ្យ​ដឹង​ទៀត​ថា​បន្ទាប់​ពី​ការ​ចុះ​បញ្ជី​នៅក្រសួង​ពាណិជ្ជ​កម្ម គណបក្ស​សង្រ្គោះជាតិ នឹង​ដាក់​លិខិត​ទៅ​លោក​នាយករដ្ឋមន្រ្តីផ្ទាល់​ ដើម្បី​សុំ​អាជ្ញា​ប័ណ្ណ​ក្នុង​ការ​បើក​ទូរទស្សន៍ ក្រោម​កិច្ចព្រម​ព្រៀង​នយោបាយ​រវាង​គណបក្ស​ប្រឆាំង​ និង គណបក្សប្រជា​ជនកម្ពុជា កាល​ពី​ថ្ងៃ​ទី​២២​ខែ​កក្កដា។លោកបន្តថា​រហូត​មកដល់​ពេល​នេះ គណបក្ស​​មិនទាន់​បាន​រៀបចំ​ជាធន​ធានមនុស្ស​នៅឡើយ​ទេ ដោយ​ទុកឲ្យ​ក្រុមហ៊ុនឯកជន​ជា​អ្នក​ចាត់ចែង។​ ​

​កន្លងទៅ លោកនាយក​រដ្ឋមន្ត្រីបាន​ថ្លែងថា​លោក​យល់ព្រម​ឲ្យ​គណបក្ស​សង្គ្រោះ​ជាតិ​មាន​ទូរទស្សន៍ តែ​ត្រូវ​សុំ​អាជ្ញា​ប័ណ្ណ​តាមរយៈ​ក្រុមហ៊ុន​ឯកជន​។ ​លោកនាយក​រដ្ឋមន្ត្រី ហ៊ុន សែន អះអាងថា ការដែល​លោក​មិន​ព្រម​ផ្តល់​អាជ្ញាប័ណ្ណ​ឲ្យ​គណបក្ស​សង្គ្រោះ​ជាតិ​ដោយ​ផ្ទាល់​នោះ ព្រោះ​ខ្លាច​គណបក្ស​ផ្សេង​ទៀត​សុំ​បង្កើត​ទូរទស្សន៍​ផ្ទាល់​ខ្លួន​ដែរ​៕

ប្រភពពី vodhotnews.com