ចាប់ខ្លួននៅពេលអ្នកតវ៉ាហុងកុងចាប់យកជំរំបាតុកម្មមកវិញ
ពួកបាតុករគាំទ្រលទ្ធិប្រជាធិបតេយ្យនៅហុងកុងបានប៉ះទង្គិចជាមួយប៉ូលិសកាលពីថ្ងៃសៅរ៍ នៅពេលពួកគេចូលកាន់កាប់ជំរំបាតុកម្មមួយដែលទើបតែត្រូវប៉ូលិសបណ្តេញចេញកាលពីមួយថ្ងៃមុន ដោយនាំអោយមានការចាប់ខ្លួនមនុស្សជាច្រើននាក់និងរារាំងដល់កិច្ចពិភាក្សារបស់រដ្ឋាភិបាលជាមួយបាតុករ។
ប៉ូលិសបានដេញពួកអ្នកប្រឆាំងតវ៉ាដែលប្រើឆត្រដើម្បីការពារខ្លួនពីការបាញ់ម្សៅម្ទេសនិងការវាយនឹងដំបង នៅផ្លូវធំមួយក្នុងសង្កាត់ម៉ុងកុក តែត្រូវបានបង្ខំអោយដកថយនៅពេលថ្ងៃចាប់ផ្តើមរះ ដែលជាហេតុនាំអោយមានការស្រែងហ៊ោពីហ្វូងបាតុករ។
ពួកសកម្មជនបានរួសរាន់សង់ជម្រកតង់បណ្តោះអាសន្នឡើងវិញនៅតំបន់មួយដែលប៉ូលិសទើបបានបើកអោយមានចរាចរណ៍ឡើងវិញកាលពី២៤ម៉ោងមុននេះ នៅពេលមនុស្សរាប់ពាន់នាក់ទៀតធ្វើការអង្គុយក្រាញនៅជំរំមួយអស់ពេលជិត៣សប្តាហ៍មកហើយ។
ប៉ូលិសហុងកុងបាននិយាយនៅក្នុងសេចក្តីថ្លែងការណ៍កាលពីថ្ងៃសៅរ៍ថាខ្លួនបានចាប់ខ្លួនមនុស្ស២៦នាក់នៅក្នុងការប្រឈមមុខជាមួយហ្វូងមនុស្សមួយដែលបានរីកធំដល់ចំនួន៩.០០០នាក់នៅត្រឹមម៉ោង៣ជិតភ្លឺ និងប៉ូលិស១៥នាក់បានរងរបួស។
វាជាយប់ទី៣ជាប់គ្នាដែលអំពើហិង្សាបានផ្ទុះឡើងក្រោយពីស្ងប់ស្ងាត់អស់ពេលកន្លះខែ ជាការវិវត្តន៍មួយដែលអាចបំផ្លាញផែនការពិភាក្សារវាងរដ្ឋាភិបាលនិងក្រុមបាតុកម្មទាមទារលទ្ធិប្រជាធិបតេយ្យពេញលេញ។
ចិនដែលជាអាណាព្យាបាលលើហុងកុង បានសំរេចថា បេក្ខជនស្នងតំណែងពីមេដឹកនាំហុងកុងបច្ចុប្បន្នត្រូវតែឆ្លងកាត់ការត្រួតពិនិត្យសំរេចពីគណៈកម្មាធិការមួយដែលគាំទ្ររដ្ឋាភិបាលក្រុងប៉េកាំង សំរាប់ការបោះឆ្នោតនៅឆ្នាំ២០១៧ តែពួកបាតុករហុងកុងបានច្រានចោលដោយចាត់ទុកវាជាលទ្ធិប្រជាធិបតេយ្យក្លែងក្លាយ៕ ប្រភព ៖ CEN
