ស៊ូ ដាណេ ផ្ញើសារពីអាមេរិកកុំឲ្យជឿសុះ ម៉ាច រឿងតារាខ្មែរពួននៅស្រុកគេ
ភ្នំពេញ: ប្រធានសមាគមសិល្បៈ លោក សុះ ម៉ាច ធ្លាប់បានប្រាប់បណ្តាញសារព័ត៌មានថា មន្ត្រីស្ថានទូតអាមេរិកបានទាក់ទងមកសមាគមសិល្បៈ សូមពិភាក្សារឿងតារាខ្មែរដែលចេញទៅច្រៀងនៅអាមេរិកហើយគេចវេះមិនត្រឡប់មកស្រុកវិញ។ លោក សុះ ម៉ាច បានលើកឡើងថា ទង្វើអ្នកសិល្បៈមួយចំនួនតូចនោះហើយ បានបង្កផលប៉ះពាល់ខ្លាំងដល់សិល្បករផ្សេងក្នុងការចេញទៅច្រៀងនៅក្រៅប្រទេស។
តារាចម្រៀង និងគ្រូរបាំ កញ្ញា ស៊ូ ដាណេ។ រូបថត សហការី ប្រធានសមាគមសិល្បៈខ្មែរលោក សុះ ម៉ាច។ ហុង មិនា
ប្រតិកម្មតបនឹងការលើកឡើងរបស់ប្រធានសមាគមដ៏មានប្រជាប្រិយអាណត្តិទី៣នេះ អ្នកចម្រៀងស្រីមួយដែលមានឈ្មោះល្បីមធ្យម និងពេលនេះកំពុងមានវត្តមានច្រៀងសម្តែងនៅទឹកដីមហាអំណាច និងអះអាងថា មានស្ពុនស័រធានារយៈពេលមួយឆ្នាំពេញ កញ្ញា ស៊ូ ដាណេ បានផ្ញើសារមកភ្នំពេញប៉ុស្តិ៍ ដោយប្រាប់ថា៖ «ចង់ប្រកាសដល់មិត្តសិល្បករមួយចំនួន ជាពិសេស លោក សុះ ម៉ាច ដែលជាប្រធានសមាគមសិល្បៈកុំឲ្យយល់ច្រឡំថា ពួកខ្ញុំកំពុងលួចនៅសម្តែងខុសច្បាប់។ ខ្ញុំមានស្ពុនស័រត្រឹមត្រូវនិងដើរតាមច្បាប់ជានិច្ច»។
ដាណេ ដែលអះអាងថា ជាបុគ្គលិកធ្វើការនៅមន្ទីរវប្បធម៌និងវិចិត្រសិល្បៈបានលើកឡើងការពារភាពស្អាតស្អំរបស់ខ្លួនថា៖ «សូមកុំយកលេសថាសិល្បករសម្ភាសធ្លាក់ព្រោះតែពួកនាងខ្ញុំ ដែលមានអ្នកចម្រៀងបីនាក់ អៀង ចាន់ថាវី ម៉េង ប៊ុនលី»។
ជាមួយគ្នានោះ កញ្ញា ស៊ូ ដាណេ បានឲ្យដឹងថា ក្រុមហ៊ុនដែលធានា នាង និងអ្នកចម្រៀងពីរដួងទៀតគឺ កញ្ញា អៀង ចាន់ថាវី និងលោក ម៉េង ប៊ុនលី នោះឈ្មោះក្រុមហ៊ុន KEA khmeranterinment ដែលជាស្ពុនស័រមួយនាំតារាមកសម្តែងនៅអាមេរិក បានរយៈពេលយូរ។
ដាណេបានប្រាប់ឲ្យដឹងថា នាងចេញពីស្រុកខ្មែរមកសម្តែងនៅអាមេរិកតាំងពីដើមឆ្នាំ២០១៤ ហើយនឹងវិលត្រឡប់ទៅកម្ពុជាវិញនៅដើមឆ្នាំ២០១៥។ កាលដែលស្ពុនស័រធានារយៈពេលយូរដល់ទៅមួយឆ្នាំនោះ ត្រូវបានអ្នកចម្រៀងវ័យ២៩ឆ្នាំ មានកំណើតនៅខេត្តកំពង់ធំ ស្រុកបារាយណ៍អះអាងថា៖ «ដោយសារតែខ្ញុំមានទេពកោសល្យច្រើន ទាំងការសម្តែង ច្រៀងបុរាណ សម័យ។ កត្តាមួយទៀតនោះ ខ្ញុំនៅអាមេរិកពេលនេះ ធ្វើជាគ្រូបង្រៀនរបាំបុរាណដល់កូនខ្មែរ នៅទីនោះដោយស្ម័គ្រចិត្ត»។
ស៊ូ ដាណេ បញ្ជាក់ថា គោលដៅសំខាន់សម្រាប់នាងនៅទឹកដីមហាអំណាចគឺកិត្តិយសកេរ្តិ៍ឈ្មោះ ដូច្នេះហើយបានជាកញ្ញាចែករំលែកពេលវេលាទៅបង្រៀនរបាំបុរាណដល់កូនខ្មែរនៅទីនេះ។
កញ្ញាបានថ្លែងរបៀបការពារខ្លួនថា៖ «មិនសំដៅដូចគេថា មកអាមេរិកដើម្បីរកប្តីនោះទេ»។
កាលពីអំឡុងពីរបីខែមុននេះ លោក សុះ ម៉ាច ប្រធានសមាគមសិល្បៈខ្មែរ បានប្រាប់សារព័ត៌មានថា អាមេរិកបានរឹកបន្តឹងតារាខ្មែរទៅសម្តែងនៅទីនោះ ហើយក៏កំពុងតែតាមចាប់បញ្ជួនតារាខ្មែរ ដែលទៅសម្តែងហើយមិនវិលមកស្រុកវិញ។ លោកថា ស្ថានទូតអាមេរិកប្រចាំនៅកម្ពុជាក៏បានទាក់ទងមកសមាគមសិល្បៈលើប្រធានបទនេះដែរ។
ថ្លែងតបនឹងសំឡេងលើកឡើងបែបនេះ កញ្ញា ស៊ូ ដាណេ បានប្រកាសទៀតថា៖ «កុំឲ្យសិល្បករខ្មែរយល់ច្រឡំនាំគ្នាគាំទ្រ សុះ ម៉ាច រឿងនេះមិនត្រូវឡើយ គាត់ចូលទៅប្ដឹងទូតសោះថា ទូតហៅគាត់ចូល»។
ប៉ុន្តែនាងមិនបានបរិយាយថា លោក សុះ ម៉ាច ចូលទៅប្តឹងស្ថានទូតអាមេរិក ក្នុងចេតនាអ្វីជាក់លាក់នោះទេ ដោយនាងបែរជានិយាយថា៖ «រឿងនេះនិយាយត្រង់ខ្ញុំដឹងតាមគេ គ្រាន់តែខ្ញុំមិនចង់ឲ្យអ្នកដែលមានមាត់ចេះតែនិយាយនឹងច្រណែនឈ្នានីស ខ្ញុំនៅសម្តែងយូរ ខ្ញុំចេះច្រើន ច្រៀង សម្តែង របាំ»។
តបនៅការបើកកកាយ របស់កញ្ញា ស៊ូ ដាណេ ដែលកំពុងមានទីផ្សារនៅអាមេរិកនោះ ប្រធានសមាគមសិល្បៈខ្មែរ លោក សុះ ម៉ាច បានថ្លែងទាំងសំណើចថា៖ «រឿងនេះ ដូចពាក្យចាស់តែងតែលើកថា គោដំបៅខ្នងក្អែកហើររំលងរំសាយកន្ទុយ»។
ប្រធានសមាគមសិល្បៈរូបនេះបាននិយាយទៀតថា លោកមិនដែលដឹងថា កញ្ញា ស៊ូ ដាណេ នេះចេញទៅច្រៀងនៅអាមេរិកពីពេលណា មានរយៈពេលប៉ុនណា ហើយរឿងកន្លងមកលោកក៏មិនដែលភ្ជាប់ឈ្មោះនាងថា ជាអ្នកសិល្បៈខ្មែរដែលគេចវេះនៅអាមេរិកមិនមកវិញនោះដែរ។
លោកបញ្ជាក់ចំៗថា៖ «ខ្ញុំលើកតែតារាចម្រៀងពីរដូង អ្នកនាង ហង្ស ពិសី និង ស៊ុន សុម៉ាលី។ ដោយឡែក ដាណេ មិនមានមែន ព្រោះគាត់ចេញទៅក៏មិនមែនតាមសមាគមទើបយើងមិនបានលើកមកនិយាយ»។
តបនឹងការប្រកាសរបស់ ដាណេ ថា កុំជឿរូបលោក លោក សុះ ម៉ាច បានប្រាប់ដោយពាក្យសម្ដីទន់ភ្លន់ទៅកញ្ញា ស៊ូ ដាណេ វិញថា៖ «ក្នុងនាមខ្ញុំជាប្រធានសមាគម មានតែសប្បាយចិត្ត ដែលមានសិល្បៈខ្មែរយើងបានចេញទៅសម្តែងនៅក្រៅប្រទេសចុះរឿងអីខ្ញុំច្រណែន»។
លោកអះអាងថា មិនបានទៅដាក់ពាក្យប្តឹងនៅស្ថានទូតអាមេរិកទេ គឺមន្ត្រីស្ថានទូតបានទាក់ទងមករូបលោក តែបានជួបតែខាងរដ្ឋបាល។
លោកថ្លែងទៀតថា៖ «ម្សិលមិញនេះ ខ្ញុំក៏បានសរសេរលិខិតសុំទោសនូវការខកខាននេះ នឹងស្នើសុំជួបជាថ្មី ដើម្បីដោះស្រាយនិងសុំការយោគយល់ជាថ្មី ដើម្បីឲ្យមានភាពងាយស្រួលក្នុងការធានាសិល្បៈទៅសម្តែងនៅទីនោះវិញ»៕ ប្រភព ៖ភ្នំពេញប៉ុស្តិ៍
