នគរបាលឃាត់ខ្លួនសង្ឃក្លែងក្លាយ២នាក់ ដើររៃអង្គាសលុយធ្វើបុណ្យកឋិន បញ្ជូនទៅតុលាការ
ខេត្ដសៀមរាប ៖ សង្ឃក្លែងក្លាយ២នាក់ដើររៃអង្គាសប្រាក់ពីប្រជាពលរដ្ឋតាមភូមិ ត្រូវបានកម្លាំងនគរបាលព្រហ្មទណ្ឌកំរិតស្រាលនៃស្នងការដ្ឋានខេត្តសៀមរាប ធ្វើការឃាត់ខ្លួនទៅតាមពាក្យបណ្តឹងរបស់ព្រះចៅអធិការវត្ត និងប្រជាពលរដ្ឋនៅស្រុកពួក ខេត្តសៀមរាប ខណៈពេលកំពុងធ្វើសកម្មភាពដើរបិណ្ឌបាត្រ ដោយភូតកុហកថា យកបច្ច័យទៅធ្វើបុណ្យកឋិន ។ ហេតុការណ៍ឃាត់សង្ឃក្លែងក្លាយ២នាក់នេះ ធ្វើឡើងនៅថ្ងៃទី១៧និង១៨ខែតុលា ស្ថិតនៅចំណុចផ្សារលើធំថ្មី នៅក្នុងភូមិដកពោធិ៍ សង្កាត់ស្លក្រាម ក្រុងសៀមរាប ។ សមត្ថកិច្ចនគរបាលព្រហ្មទណ្ឌកំរិតស្រាល បានប្រាប់នៅព្រឹកថ្ងៃទី២០ ខែតុលាថា បន្ទាប់ពីមានពាក្យបណ្តឹងពីចៅអធិការវត្ត និងប្រជាពលរដ្ឋនៅស្រុកពួក កម្លាំងសមត្ថកិច្ចបានធ្វើការតាមដានរហូតដល់ឈានឃាត់ខ្លួនជនសង្ស័យទាំង២នាក់បានជាបន្តបន្ទាប់ ខណៈពេលដែលពួកគេកំពុងធ្វើសកម្មភាពដើររៃអង្គាសយកលុយដាក់ហោប៉ៅ នៅម្តុំផ្សារលើធំថ្មី ។ សមត្ថកិច្ចបានបន្តថា ជនសង្ស័យទាំង២នាក់នោះមានឈ្មោះ ឈុន វណ្ណី ភេទប្រុស អាយុ៤៣ឆ្នាំ មុខរបរមិនពិតប្រាកដ មានស្រុកកំណើតភូមិត្រពាំងស្រែ ឃុំត្រពាំងស្រែ ស្រុកមេសាង ខេត្តព្រៃវែង បច្ចុប្បន្នស្នាក់នៅមិនពិតប្រាកដ និងម្នាក់ទៀតឈ្មោះ ជា យ៉ាន ភេទប្រុស អាយុ៣១ឆ្នាំ ស្រុកកំណើតភូមិត្រពាំងអំពិល ឃុំជ្រៃវៀន ស្រុកព្រៃឈរ ខេត្តកំពង់ចាម បច្ចុប្បន្ន ស្នាក់នៅភូមិបន្ទាយចាស់ សង្កាត់ស្លក្រាម ក្រុងសៀមរាប មុខរបរជាងសំណង់ ។ សមត្ថកិច្ចបន្ថែមថា បន្ទាប់ពីធ្វើកំណត់ហេតុរួច កម្លាំងនគរបាលព្រហ្មទណ្ឌកំរិតស្រាលបានកសាងសំណុំរឿងបញ្ជូនទៅតុលាការនៅថ្ងៃទី១៩ ខែតុលា ឆ្នាំ២០១៤ ដើម្បីចាត់ការតាមនិតិវិធីច្បាប់ ។ គួរកត់សំគាល់ថា នៅក្នុងតំបន់ទេសចរ ខេត្តសៀមរាប គេតែសង្កេតឃើញមានមានអ្នកសុំទានជាច្រើននាក់ មកពីតាមបណ្ដាខេត្ដផ្សេងៗ ដែលដើរសុំទានតាមទីសាធារណៈ ដែលបណ្ដាលឲ្យប៉ះពាល់ និងខូចមុខមាត់ដល់តំបន់ទេសចរ ដែលអ្នកសុំទានទាំងនោះដើរ តួជាអ្នកចាញ់បោកគេទៅធ្វើការនៅប្រទេសថៃ ប៉ុន្ដែធាតុពិតជនទាំងនោះគ្រាន់ជាល្បិចកលដើម្បីឲ្យគេអាណិតប៉ុណ្ណោះ ជាក់ស្ដែងនៅតំបន់កំសាន្ដអង្គរឃ្យុងយូ និងតំបន់ផ្សារចាស់ ជាដើម ៕
________________________
ប្រភពព័ត៌មានពី៖ នគវត្ត
ប្រភពព័ត៌មានពី៖ នគវត្ត
