យុត្ថារ៉ា ឆានី និងប្រពន្ធថៅកែអចលនទ្រព្យឲ្យគេច្រឡំ
ភ្នំពេញៈ ស្ត្រីដ៏ស្រស់ស្អាតម្នាក់ ដែលគេស្គាល់ច្បាស់ថា ជាភរិយារបស់លោកអគ្គនាយកក្រុមហ៊ុនអចលនទ្រព្យ ប៊ុណ្ណា រៀលធីគ្រុប បានសម្តែងកាយវិការកៀកកិត ហើយបានសរសេរប្រកាសនៅលើហ្វេសប៊ុកថា ខ្លួនជិតរៀបការជាមួយលោក យុត្ថារ៉ា ឆានី ហើយ។
ការសរសេរលើទំព័របណ្តាញសង្គមរបស់ស្ត្រីរូបនេះបានធ្វើឲ្យមានការភ្ញាក់ផ្អើលយ៉ាងខ្លាំង ខណៈគេបានដឹងថា លោក យុត្ថារ៉ា ឆានី ទើបតែបែកបាក់ចំណងអាពាហ៍ពិពាហ៍ជាង១០ឆ្នាំជាមួយអ្នកនាង ចន ច័ន្ទលក្ខិណា នោះ។
ជាមួយនឹងកាយវិការកៀកកិតបញ្ចេញស្នាមញញឹម ស្ត្រីមានត្រេមុខដូចកូនកាត់រូបនោះបានសរសេរថា៖«ហានី ណប់ចិត្ត!!!! ជិតរៀបការហើយខ្ញុំ បងប្អូនត្រៀមលុយចងដៃផង»។
ប៉ុន្តែយ៉ាងណា ចុងក្រោយនេះ មានការបញ្ជាក់ថា ការប្រកាសរបស់ភរិយាលោក សឹង ប៊ុណ្ណា អគ្គនាយកក្រុមហ៊ុនអចលនទ្រព្យ ប៊ុណ្ណា រៀលធីគ្រុប ថានឹងរៀបការជាមួយលោក យុត្ថារ៉ា ឆានី នោះគ្រាន់តែជាការសរសេរលេងសើចក្នុងនាមជាមនុស្សរាប់អានគ្នាជិតស្និទ្ធតែប៉ុណ្ណោះ ខណៈលោក ឆានី បានមកជជែករឿងការងារជាមួយនឹងប្តីរបស់អ្នកស្រី។
ជាមួយនឹងភាពភ្ញាក់ផ្អើលនៅពេលមានការយល់ច្រឡំពីសារព័ត៌មាននោះភរិយារបស់លោក ប៊ុណ្ណា ដែលដាក់ឈ្មោះលើហ្វេសប៊ុកថា Angel Moon បានធ្វើការបកស្រាយជាថ្មីលើហ្វេសប៊ុករបស់អ្នកស្រីថា៖«ព្រះជាម្ចាស់ហ្ហើយ…ថាមែន…មិនបាច់សុំការបកស្រាយពីបងខ្ញុំទេ (បង ឆានី) អ្នកសារព័ត៌មានអាចឆែកមើលរាល់រូបភាពដែលខ្ញុំបានផុសកន្លងមកលើ wall ខ្ញុំ។ ខ្ញុំចង់បញ្ជាក់ថា ថ្ងៃនោះ បងប្រុស (ឆានី) មកជជែករឿងការងារជាមួយស្វាមីខ្ញុំនៅក្នុងហាងរបស់ខ្ញុំ (Khmer Fashion) ទេ»។
ដោយមិនលាក់បាំង អ្នកស្រីបានបកស្រាយបន្តថា៖«ខ្ញុំមានស្វាមីហើយ គាត់ជានាយកក្រុមហ៊ុន ប៊ុណ្ណា រៀលធី គ្រុប (ទិញលក់ដីធ្លី) ខ្ញុំមានកូន៥នាក់ហើយ។អរគុណសម្រាប់ព័ត៌មានខាងលើ តែវាមិនមែនជាការពិតទេ»។
ដោយមិនមានអារម្មណ៍ខឹងសម្បា អ្នកស្រីបានសរសេរបែបលេងសើចបន្តថា៖«បងប្រុសខ្ញុំខូចឈ្មោះអស់អាលីងតាម្ម៉ង់ !!!!! រូបមួយ ខ្ញុំបានផុសជាប់ស្មាដៃអាវស្វាមីខ្ញុំ ដែលកំពុងជជែកគ្នារឿងជំនួញ។ ស្អប់ណាស់ធ្វើដូចអត់ស្គាល់គ្នាអ៊ីចឹងអ្នកព័ត៌មាន.!!!!»។
ជាមួយគ្នានោះនៅពេលភរិយារបស់លោក សឹង ប៊ុណ្ណា បង្ហោះពីគម្រោងរៀបការនោះ លោក យុត្ថារ៉ា ឆានី បានសរសេរតបថា៖ «អស់ផ្លូវហើយខ្ញុំ !!!»។
គេបានដឹងថា គ្រួសាររបស់លោក សឹង ប៊ុណ្ណា និងភរិយា មានភាពជិតស្និទ្ធបំផុតជាមួយលោក យុត្ថារ៉ា ឆានី និងអ្នកនាង ចន ច័ន្ទលក្ខិណា ហើយក្រៅពីនោះនៅក្នុងពិភពសិល្បៈភរិយារបស់លោក ប៊ុណ្ណា ក៏មានភាពជិតស្និទ្ធជាមួយអ្នកសិល្បៈជាច្រើនរូបទៀតផងដែរ៕
_________________
ប្រភពពីភ្នំពេញប៉ុស្តិ
