សពកៀបឆ្អឹងនឹងថ្មប្រាសាទបន្ទាយឆ្មារ មិនមែនជាសាកសពពីបូរាណទេ
បន្ទាយមានជ័យ:៖មន្ត្រីជំនាញវប្បធម៌ ពុំទាន់ហ៊ានសន្និដ្ឋាន វាយតម្លៃចំណាស់ឆ្អឹងសពមនុស្សម្នាក់ ដែលក្រុមការងារអភិរក្សប្រាសាទបន្ទាយឆ្មារ រកឃើញកៀបជាប់នឹងថ្មការដ្ឋានខ្លោងទ្វារស្ពានហាលខាងត្បូងនោះទេ។ ប៉ុន្តែមន្ត្រីជំនាញនោះ គ្រាន់តែអះអាងថា សាកសពនោះ មិនមែនជាមនុស្សពីជំនាន់បុរាណទេ។
លោក គឹម សុធិន ប្រធាននាយកដ្ឋានគាំពារ និងអភិរក្សសំណង់បូរាណ ក្រសួងវប្បធម៌ និងវិចិត្រសិល្បះ បាននិយាយថ្ងៃទី១៨តុលាថា យើងត្រូវទុកជូនអ្នកជំនាញបុរាណវិទ្យាពិនិត្យ វាយតម្លៃពីអាយុចំណាស់នៃឆ្អឹងសពនោះ ជាជាងខុសបច្ចេកទេស។
ប៉ុន្តែលោក គឹម សុធិន ពន្យល់ថា បើមើលភិនភាគឆ្អឹងសព គឺដេកដួល បែកលលាដ៏ក្បាល និងបាក់ឆ្អឹងកន្លែងផ្សេងទៀត។ គឺអាចថា មុនស្លាប់ អ្នកនោះ ជាជនល្មើស លួចរូបចម្លាក់ថ្ម ឬជាយុទ្ធជនប្រយុទ្ធ ឬជាអ្នកស្រុកពួនក្នុងថ្មប្រាសាទការពារសុវត្ថិភាព ហើយត្រូវគ្រាប ឬអ្វីមកធ្វើអោយរលំបាក់ថ្ម សង្កត់ស្លាប់ ហើយយកសពពុំបាន ឬមិនដឹង។ ព្រោះខ្លោងទ្វារ និងស្ពានហាលខាងត្បូងនេះ ត្រូវបោះបង់ចោល ដោយសារព្រៃដុះ និងបាក់រលំថ្ម ឆ្លងកាត់មិនបាន។ ទោះយ៉ាងណា សពនោះ មិនមែនជាសពបុព្វបុរសសម័យយូរលង់មកហើយទេ។ ជាសពអំឡុងទសវត្សទី៦០-៧០។
គួររំលឹកថា ក្រុមការងារបច្ចេកទេសការដ្ឋានអភិរក្សទី៣ ខ្លោងទ្វារស្ពានហាលខាងត្បូងប្រាសាទបន្ទាយឆ្មារ បានរើថ្ម ហើយឃើញឆ្អឹងសពមនុស្សម្នាក់ កៀបក្នុងថ្ម ដេកក្បាលទៅត្បូង កាលពីថ្ងៃទី១៦ ខែតុលា ឆ្នាំ២០១៤៕H/N
ប្រភពពី CEN
