តារាខ្មែរ ២ នាក់ ជាប់ពានមកពីក្រៅប្រទេសសុទ្ធតែបញ្ចេញគ្រឿងក្នុងទាំងអស់
ថ្មីៗនេះ តារាម៉ូដែលកម្ពុជាចំនួន ២ នាក់ គឺ កញ្ញា នូ ទឹមស្រីនៀត និង លោក Edwin សុទ្ធតែបានទទួលពានរង្វាន់ក្នុងកម្មវិធីប្រកួតផ្សេងគ្នាពីក្រៅប្រទេស។ ឆ្លងកាត់ការប្រកួតតារាទាំង ២ សុទ្ធតែ បញ្ចេញ ឈុតគ្រឿងក្នុងទាំងអស់។
កញ្ញា នូ ទឹមស្រីនៀត ទើបតែបានឈ្នះជយលាភីផ្នែកប្រជាប្រិយ (Miss Popular Vote Award) ក្នុងកម្មវិធី Miss Grand International ពីប្រទេសថៃ កាលពីដើមខែ តុលា នេះ។ ស្រីស្អាត កញ្ញា នូ ទឹមស្រីនៀត មានវ័យ ១៩ ឆ្នាំ មានកម្ពស់ ១៧៥ សង់ទីម៉ែត្រ មកពីស្រុកកៀនស្វាយ ខេត្តកណ្ដាល ត្រូវបានបញ្ជូនទៅចូលរួមប្រកួតសម្រស់ជាមួយពិភពលោកក្នុងកម្មវិធី Miss Grand International នៅទីក្រុងបាងកក ប្រទេសថៃ។ កម្មវិធីនេះ បានចាប់ផ្ដើមដំណើរប្រកួតតាំងពីថ្ងៃទី ១៧ ខែកញ្ញា ២០១៤ ហើយបានបញ្ចប់កាល ថ្ងៃទី ៧ តុលា កន្លងទៅ។ ជាលទ្ធផល ស្រីនៀត ទទួលបានពានរង្វាន់ផ្នែកប្រជាប្រិយ (Miss Popular Vote Award)។ ទឹមស្រីនៀត ជាអតីតជយលាភីលេខ១ ក្នុងកម្មវិធី Khmer Super Model រៀបចំដោយក្រុមហ៊ុន BKA Entertainment ។
ចំណែក លោក យិត មាសឧស្សាហ៏ ហៅ Edwin ដែលបានជាប់ពានរង្វាន់តារាញញឹមស្រស់ ជាងគេ “ Mr. Smiley Award in Mister Asia Contest 2014 ” នៅទីក្រុងហុងកុង កាលពីពេលថ្មីៗនេះ គឺជាតារាម៉ូដែលរបស់ក្រុម Sun Super Model Cambodia។ លោកមានកំណើតក្នុង រាជធានីភ្នំពេញ មានវ័យ ២០ឆ្នាំ កម្ពស់ ១៧៧ សង់ទីម៉ែត្រ ទម្ងន់ ៦៧ គីឡូក្រាម។ “Mr Asia Contest 2014 ” ពិភពលោក បានធ្វើនៅទីក្រុងហុងកុង និង ចិន ចាប់ផ្ដើមពីថ្ងៃ ទី ២២ ខែ កញ្ញា ឆ្នាំ ២០១៤ ដល់ថ្ងៃទី ១៧ តុលា ឆ្នាំ ២០១៤ ក្នុងនោះប្រទេសដែលចូលរួម មានចំនួន ១០ ប្រទេស ។ លោកត្រូវបានបញ្ជូនទៅចូលរួមប្រកួតតាមរយៈ FX Entertainment សហការជាមួយ Hamsa Entertainment Cambodia ។
ឆ្លងកាត់តាមវគ្គប្រកួត តារាម៉ូដែលរបស់ប្រទេសកម្ពុជាទាំង ២ សុទ្ធតែស្លៀកពាក់ បញ្ចេញខោទ្រនាប់ ដើរកាច់រាងមុខគណៈកម្មការ ក៏ដូចជា ទស្សនិកជនទាំងអស់។ ទោះបីមានការរិះគន់លើ វប្បធម៌ ប្រពៃណីមួយចំនួន ជុំវិញការស្លៀកពាក់យ៉ាងណាក្ដី ប៉ុន្តែតារាទាំង ២ សុទ្ធតែ នាំកិត្តិយសជូនប្រទេសកម្ពុជា ឲ្យពិភពលោក ស្គាល់កាន់តែច្បាស់មួយកម្រិតទៀត៕
អត្ថបទ៖ ខុត សីហា
