ខឹងម្តាយក្មេកស្តីបន្ទោសរឿងផឹកស៊ីបុរសម្នាក់ ចងកស្លាប់ ក្នុងផ្ទះ នៅភ្នំព្រឹក
បាត់ដំបង: បុរសម្នាក់ ស្លាប់នៅក្នុងផ្ទះ ដោយសារចងកជាប់នឹងឆ្នឹមផ្ទះ បន្ទាប់ពីម្តាយក្មេកស្តីបន្ទោសរឿងផឹកស៊ី ហើយខឹងសម្រេចចិត្តធ្វើអត្តឃាតខ្លួនឯង។
ហេតុការណ៍នេះ បានកើតឡើង កាលពីវេលាថ្ងៃទី១៤ ខែតុលា ឆ្នាំ២០១៤ ចំណុចភូមិបួរ ឃុំបួរ ស្រុកភ្នំព្រឹក ខេត្តបាត់ដំបង។
លោក សារ៉េត វិសេដ្ឋ អធិការងប៉ូលិសស្រុកភ្នំព្រឹក បានឲ្យដឹងថា បុរស ដែលចងកសម្លាប់ខ្លួននោះ ឈ្មោះ ប្រម នួន អាយុ ៣៤ ឆ្នាំ មានប្រពន្ធ និងកូនម្នាក់ រស់នៅក្នុងភូមិឃុំកើតហេតុ។
លោកអធិការង បានស្រង់សំដីសាក្សីមកបញ្ជាក់ថា បុរសរងគ្រោះ ជារៀងរាល់ថ្ងៃ ចេះតែដើរផឹកស៊ីមិនគឹតពីការងាររកស៊ីទេ។ កាលពីវេលាល្ងាចថ្ងៃទី១៣ ខែតុលា ម្ដាយក្មេកនិយាយប្រដៅណែនាំឲ្យផ្អាកការដើរផឹកស៊ី និងរកប្រាក់កាសជួយថែទាំកូនប្រពន្ធផង។
ប៉ុន្តែការស្ដីប្រដៅណែរនាំឲ្យល្អនេះ បែរជាធ្វើឲ្យកូនប្រសារ (បុរសរងគ្រោះ) ខឹងសម្បារទៅវិញ។ ក្រោយពីការណែនាំស្ដីបន្ទោសកូនប្រសារហើយ ស្រាប់តែកូនប្រសារ បានដើរចូលសម្ងំដេកក្នុងបន្ទប់បាត់។ ពួកគាត់ ដោយពុំឃើញ និងបាត់កូនប្រសារ (ជនរងគ្រោះ) យូរពេក ក្រុមគ្រួសារបានចូលទៅក្នុងបន្ទប់ ស្រាប់តែឃើញជនរងគ្រោះចងកនឹងធ្នឹមផ្ទះ ស្លាប់បាត់តែម្តង។
លោក សារ៉េត វិសេដ្ឋ បានបញ្ជាក់ថា ក្រោយពីធ្វើកោសលវិច័យ ឃើញថា ជនរងគ្រោះ ពិតជាធ្វើអត្តឃាតចងកសម្លាប់ខ្លួនឯងប្រាកដមែន៕H/N
ប្រភពពី CEN
