នារីវ័យក្មេងបម្រើការងារ តាមហាងផឹកស៊ី លួចលាក់គ្រឿងញៀន ក្នុងសំឡីអនាម័យ
រាជធានី
ភ្នំពេញ ៖ នារីបម្រើក្នុងហាងផឹកស៊ី ២នាក់
ត្រូវបានសមត្ថកិច្ច ប៉ូលិសប៉ុស្តិ៍ ទឹកល្អក់ទី១ ខណ្ឌទួលគោក
ធ្វើការឃាត់ខ្លួន និងចែកឆេរ រកឃើញថ្នាំញៀន ២កញ្ចប់
ដែលជនសង្ស័យ ទាំង ២នាក់នេះ លាក់ទុកក្នុងសំឡីអនាម័យ
ព្រមទាំងរកឃើញ ប្រដាប់ប្រដា
សម្រាប់ប្រើប្រាស់ថ្នាំញៀន មួយសម្រាប់ផងដែរ កាលពីរាត្រីថ្ងៃទី២៦
ខែតុលា វេលាម៉ោង ៩និង១០ នាទី នៅចំណុចផ្ទះជួលលេខ៨៩
បន្ទប់លេខ៨ផ្លូវរថភ្លើង សង្កាត់ទឹកល្អក់ទី១ ខណ្ឌទួលគោក ។ជនសង្ស័យ ដែលត្រូវបានឃាត់ខ្លួន មានឈ្មោះ រឿន ស្រីស្រស់ ភេទស្រី អាយុ ២៨ឆ្នាំ មុខរបរជាបុគ្គលិក បម្រើការងារ នៅក្នុងហាងផឹកស៊ី យីហោ ជួបគ្នាសំឡាញ់ ស្នាក់នៅក្នុងផ្ទះជួល បន្ទប់លេខ៥ និងជនសង្ស័យម្នាក់ទៀត មានឈ្មោះ ប៉ុន ចាន់ថុល ភេទស្រី អាយុ ១៩ឆ្នាំ ជាបុគ្គលិកបម្រើការងារ នៅក្នុងហាង រាត្រីពណ៌ស្វាយ ស្នាក់នៅក្នុងផ្ទះជួល បន្ទប់លេខ៧។ ក្រោយពេលឃាត់ខ្លួន ជនសង្ស័យទាំង ២នាក់នេះ ប៉ូលិសដកហូតបាន វត្ថុតាងមួយចំនួន ក្នុងនោះរួមមានថ្នាំញៀន ក្រាមពណ៌ស ២កញ្ចប់តូច ដាក់ក្នុងសំឡីអនាម័យ និងប្រដាប់ប្រដាសម្រាប់ ប្រើប្រាស់ថ្នាំញៀនមួយ។
សមត្ថកិច្ចបានឲ្យដឹងថា នៅមុនពេលកើតហេតុ ប្រជាពលរដ្ឋ បានរាយការណ៍ ប្រាប់សមត្ថកិច្ចថា នៅក្នុងទីតាំងខាងលើ មានមនុស្សប្រុសស្រី កំពុងប្រមូលផ្ដុំគ្នា សេពគ្រឿងញៀន។ ក្រោយទទួលបានព័ត៌មាននេះ កម្លាំងប៉ូលិស ក៏បានចុះទៅធ្វើការឆែកឆេរ និងរកឃើញវត្ថុតាង ថ្នាំញៀន និងប្រដាប់ជក់ ទើបប៉ូលិសសម្រេច ធ្វើការឃាត់ខ្លួន ជនសង្ស័យខាងលើ បញ្ជូនមកកាន់ប៉ុស្តិ៍ ដើម្បីចាត់ការទៅតាមច្បាប់ ដោយចោទប្រកាន់ពីបទ ប្រើប្រាស់គ្រឿងញៀន៕
