Lady Gaga ចុះពីយន្តហោះ អត់ពាក់អាវ មានតែសំបកគ្រំ គេផ្អើលមើលលាន់
តារាចម្រៀងប៉ុបអាមេរិក Lady Gaga បានធ្វើឲ្យអ្នកគាំទ្រទាំងអស់ភ្ញាក់ផ្អើលយ៉ាងខ្លាំង តាមរយៈការលេងម៉ូដយ៉ាងចម្លែក និងសិចស៊ី ពេលធ្វើដំណើរមកដល់រដ្ឋធានីអាតែន នៃប្រទេសក្រិក កាលពីយប់ថ្ងៃទី១៧ ខែកញ្ញា កន្លងទៅ។
ដោយមានអ្នករាំពីរនាក់ជាអ្នកសែងកាត់ហ្វូងមនុស្ស តារាចម្រៀងវ័យ ២៨ឆ្នាំរូបនេះ បានតុបតែងខ្លួនបែបនាងមច្ឆា ដោយប្រើតែសំបកគ្រំតែពីរបិទបាំងផ្នែកខាងលើ។ ឯផ្នែកខាងក្រោមគឺមានតែសំពត់សំណាញ់ពណ៌ផ្កាឈូកយ៉ាងខ្លី ដែលបង្ហាញឲ្យឃើញខោក្នុងច្បាស់ក្រឡែត។ អ្នកគាំទ្រជាច្រើនបានហែហមអមដំណើរម្ចាស់បទ “Do What You Want”រូបនេះ ស្របពេលដែលអ្នករាំទាំងពីរនាក់សែងនាងនៅលើស្មា។
ក្រោយទៅដល់សណ្ឋាគារ តារារូបនេះ បានសរសេរថ្លែងអំណរគុណអ្នកគាំទ្ររបស់ខ្លួនតាមរយៈ Tweeter ថា “អរគុណសម្រាប់ការស្វាគមន៍ដ៏កក់ក្ដៅ Athens។ យើងទាំងអស់គ្នាមកជាមួយក្ដីស្រឡាញ់ និងតន្ត្រី ដើម្បីចូលរួមអបអរប្រវត្តិសាស្ត្រដ៏អស្ចារ្យរបស់អ្នក ដែលជាទឹកដីនៃកំណើតសិល្បៈបុរាណ”។
Lady Gaga នឹងចាប់ផ្ដើមការប្រគំតន្ត្រីទេសចរណ៍ “ArtRave: The Artpop Ball” នៅពហុកីឡាដ្ឋានអូឡាំពិក ទីក្រុងនេះ នៅថ្ងៃសុក្រ។
នៅថ្ងៃទី២៣ ខែកញ្ញា ខាងមុខនេះដែរ ផលិតកម្ម Interscope Records នឹងចេញអាល់ប៊ុម “Cheek to Cheek” របស់នាងជាមួយតារាចម្រៀងជើងចាស់វ័យ ៨៨ឆ្នាំ Tony Bennett ៕
