តំណាងសហគមន៍ ឡពាងគ្រោងប្ដឹងម្ចាស់ ក្រុមហ៊ុនខេឌីស៊ីរឿង មូលប្បទានប័ត្រស្អុយ
តំណាង
សហគមន៍ភូមិឡពាង
ប្ដឹងតំណាងរាស្ត្រមណ្ឌលភ្នំពេញរបស់គណបក្សប្រជាជនកម្ពុជាអ្នកស្រី
ឡោក ខេង និងគ្រោងប្ដឹងម្ចាស់ក្រុមហ៊ុន ខេ ឌី ស៊ី
(KDC)ទៅសាលាដំបូងរាជធានីភ្នំពេញទៀត
ទាក់ទងនឹងការចេញមូលប្បទានប័ត្រមិនអាចបើកប្រាក់បាន។ អ្នកស្រី
ឡោក ខេង បានចេញមូលប្បទានប័ត្រដែលមានទឹកប្រាក់ចំនួន១ម៉ឺនដុល្លារ
ដល់តំណាងសហគមន៍ឈ្មោះ រាជ សីម៉ា
ជាថ្នូរនឹងការបញ្ឈប់សកម្មភាពតវ៉ារបស់លោក
និងឲ្យទៅសម្របសម្រួលពលរដ្ឋឈប់តវ៉ារឿងដីធ្លីជាមួយក្រុមហ៊ុន។
តើអ្នកស្រី ឡោក ខេង មានជាប់ពាក់ព័ន្ធអ្វីជាមួយម្ចាស់ក្រុមហ៊ុន ខេ ឌី
ស៊ី បានជាខំខ្នះខ្នែងចេញមុខ និងចំណាយប្រាក់ផ្ទាល់ខ្លួន
ដើម្បីរត់ការក្នុងរឿងដីធ្លីនេះ?អ្នកស្រី ឡោក ខេង ដែលបច្ចុប្បន្នជាតំណាងរាស្ត្រ និងជាសមាជិកគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា ត្រូវបានតំណាងពលរដ្ឋអះអាងថា មានជាប់ពាក់ព័ន្ធយ៉ាងជ្រៅក្នុងទំនាស់ដីធ្លីនៅភូមិឡពាង ខេត្តកំពង់ឆ្នាំង។ នៅមុនពេលអ្នកស្រី ក្លាយជាសមាជិកគណៈកម្មការទី១ នៃរដ្ឋសភានេះ អ្នកស្រី បានចំណាយប្រាក់ផ្ទាល់ខ្លួន និងចេញមុខយ៉ាងសកម្មក្នុងការសម្របសម្រួលតំណាង និងពលរដ្ឋដែលមានទំនាស់ដីធ្លីជាមួយក្រុមហ៊ុន។
ប្រជាពលរដ្ឋមានចម្ងល់ថាតើអ្នកស្រី ឡោក ខេង មានសម្ពន្ធភាពយ៉ាងណាជាមួយអ្នកស្រី ជា ខេង ដែលជាម្ចាស់ក្រុមហ៊ុន ខេ ឌី ស៊ី ហើយមានភាគហ៊ុននៅក្នុងក្រុមហ៊ុននេះដែរ ឬយ៉ាងណាបានជាខំខ្នះខ្នែងបញ្ចេញសកម្មភាពក្នុងរឿងនេះ? ចម្លើយពីខាងអ្នកស្រី ឡោក ខេង ចំពោះចម្ងល់នេះ គឺខ្លី និងងាយស្ដាប់បំផុត ប៉ុន្តែវាពិបាកឲ្យជឿ។ អ្នកស្រី បដិសេធថា មិនជាប់ពាក់ព័ន្ធអ្វីនឹងក្រុមហ៊ុនឡើយ ប៉ុន្តែការដែលអ្នកស្រី ធ្វើនោះ គឺចង់សងគុណអ្នកស្រី ជា ខេង ដែលត្រូវជាមិត្តភ័ក្ដិនឹងគ្នា និងជួយដល់ប្រជាពលរដ្ឋកំពុងជួបបញ្ហានៅភូមិឡពាង។
ការចរចា និងផ្ដល់មូលប្បទានប័ត្រទឹកប្រាក់ចំនួន១ម៉ឺនដុល្លារ ដល់លោក រាជ សីម៉ា ដោយស្ងាត់ៗរបស់អ្នកស្រី ឡោក ខេង បានបែកធ្លាយជាសាធារណៈកាលពីថ្ងៃទី២៦ ខែសីហា ឆ្នាំ២០១៤ គឺបន្ទាប់ពីលោក រាជ សីម៉ា ប្ដឹងអ្នកស្រី ទៅសាលាដំបូងរាជធានីភ្នំពេញពីបទឆបោក។ ការប្ដឹងនេះ គឺដោយសារតែលោកមិនអាចបើកប្រាក់តាមរយៈមូលប្បទានប័ត្រ ដែលអ្នកស្រី ឡោក ខេង បានផ្ដល់ជាថ្នូរនឹងការមិនឲ្យចេញមុខតវ៉ា និងតម្រូវឲ្យលោកទៅជួយសម្របសម្រួលក្រុមអ្នកភូមិឲ្យបញ្ឈប់ការតវ៉ា ប្រឆាំងនឹងក្រុមហ៊ុនបន្ដទៅទៀត។
អ្នកស្រី ឡោក ខេង មានប្រសាសន៍ថា ដោយដឹងថាជំនួយការ និងជាអ្នកបើកឡានឲ្យអ្នកស្រី ផ្ទាល់ គឺជាប្អូនជីដូនមួយរបស់លោក រាជ សីម៉ា ទើបអ្នកស្រី មានចិត្តចង់ជួយអ្នកភូមិឡពាងតាមរយៈលោក រាជ សីម៉ា ដែលជាតំណាងសហគមន៍នេះ។ ម្យ៉ាងអ្នកស្រី ចង់តបស្នងសងគុណដល់ម្ចាស់ក្រុមហ៊ុន ខេ ឌី ស៊ី គឺអ្នកស្រី ជា ខេង ផងនោះក៏សម្រេចចិត្តចំណាយប្រាក់ចំនួន១ម៉ឺនដុល្លារ ដោយមានធ្វើកិច្ចសន្យាជាមួយលោក រាជ សីម៉ា ព្រមទាំងបានទៅស្បថនៅចំពោះមុខព្រះអង្គដងកើទៀតថា នឹងរួមគ្នាដោះស្រាយបញ្ចប់វិបត្តិដីធ្លីនៅភូមិឡពាង៖ «នៅពេល ដែលខ្ញុំឈឺកើតជំងឺមហារីកលោកជំទាវ ជា ខេង បានលើកទឹកចិត្តខ្ញុំច្រើនណាស់ជារៀងរាល់ថ្ងៃអីចឹងគាត់មកលើក ទឹកចិត្តខ្ញុំរហូត ហើយខ្ញុំបានទទួលថវិកាពីគាត់ជួយខ្ញុំក្នុងនាមជាមិត្តភ័ក្ដិ អីចឹងទៅខ្ញុំបានប្រាប់រាជ សីម៉ា ខ្ញុំថាខ្ញុំចង់លួចសងគុណគាត់វិញ អីចឹងបើគាត់អត់ព្រមជាមួយឯង២ម៉ឺនដុល្លារទេគាត់ព្រមត្រឹម ប៉ុណ្ណឹង តែខ្ញុំជួយឯងប៉ុណ្ណឹងចុះ។ ឥឡូវខ្ញុំសុខចិត្តជួយ១ម៉ឺនដុល្លារ ប៉ុន្តែឯងត្រូវសន្យាជាមួយខ្ញុំថា ឈប់បង្កទំនាស់នៅលើដីហ្នឹង ហើយឯងធ្វើជាអ្នកសម្របសម្រួលមួយឲ្យល្អស្មោះត្រង់ជាមួយប្រជា ពលរដ្ឋ ហើយយកផលប្រយោជន៍ពលរដ្ឋជាធំ»។
ជម្លោះដីធ្លីរវាងក្រុមហ៊ុន ខេ ឌី ស៊ី របស់អ្នកស្រី ជា ខេង ភរិយាលោក ស៊ុយ សែម ជារដ្ឋមន្ត្រីក្រសួង រ៉ែ និងថាមពល ជាមួយពលរដ្ឋនៅឃុំតាជេស ដែលអូសបន្លាយអស់រយៈពេលជិត១០ឆ្នាំមកហើយនោះ បានកក្រើកឡើងវិញ បន្ទាប់ពីក្រុមហ៊ុនដាក់កម្លាំងកម្មកររាប់រយនាក់ ដើម្បីធ្វើរបងឲ្យខ្លួនកាលពីដើមកក្កដា ឆ្នាំ២០១៤។ ភាគីក្រុមហ៊ុន បានប្រើគ្រប់វិធីសាស្ត្រក្នុងការដោះស្រាយបញ្ហា គឺប្រើទាំងទិដ្ឋភាពច្បាប់ ការសម្របសម្រួលក្រៅប្រព័ន្ធតុលាការ និងពេលខ្លះមានប្រើអំពើហិង្សាផងក៏មាន។ នៅគ្រានោះហើយដែលលោក រាជ សីម៉ា ព្រមទទួលយកប្រាក់គោលនយោបាយពីក្រុមហ៊ុនចំនួន១០លានរៀល និងមានការសន្យាផ្ដល់ប្រាក់បន្ថែមចំនួន១ម៉ឺន៧ពាន់ដុល្លារទៀត នៅពេលលោកឈប់តវ៉ា និងដកខ្លួនចេញពីក្រុមអ្នកភូមិ។
លោក រាជ សីម៉ា ថ្លែងបញ្ជាក់ថានៅថ្ងៃទី៧ ខែកក្កដា ឆ្នាំ២០១៤ អ្នកស្រី ឡោក ខេង បានហៅរូបលោកឲ្យទៅទទួលមូលប្បទានប័ត្រចំនួនពីរសន្លឹកដែលមានទឹក ប្រាក់សរុប១ម៉ឺន៧ពាន់ដុល្លារ នៅក្នុងផ្ទះអ្នកស្រី ផ្ទាល់នៅរាជធានីភ្នំពេញ គឺ១សន្លឹកមានទឹកប្រាក់១ម៉ឺនដុល្លារចេញដោយអ្នកស្រីផ្ទាល់ ដែលត្រូវបើកនៅធនាគារពាណិជ្ជទី១ និង១សន្លឹកទៀត គឺចេញដោយម្ចាស់ក្រុមហ៊ុន ខេ ឌី ស៊ី ត្រូវបើកនៅធនាគារ អេហ្វ ប៊ី ស៊ី (FBC)។ លោកបន្តថា នៅថ្ងៃទី២២ ខែសីហា ឆ្នាំ២០១៤ លោកបានទៅបើកប្រាក់ចំនួន១ម៉ឺនដុល្លារនោះ ប៉ុន្តែបើកមិនបានឡើយដោយខាងធនាគារប្រាប់ថា មូលប្បទានប័ត្រមានស្នាមគូសលប់ឲ្យទៅសុំហត្ថលេខាពីអ្នកចេញ មូលប្បទានប័ត្រម្ដងទៀតទើបបើកបាន។
ក្រោយមកលោកមិនបានទៅសុំហត្ថលេខាពីអ្នកស្រី ឡោក ខេង ម្ដងទៀតឡើយ ប៉ុន្តែបានសម្រេចចិត្តប្ដឹងអ្នកស្រី ទៅតុលាការតែម្ដង។ នៅពេលឆាប់ខាងមុខលោកក៏គ្រោងនឹងប្ដឹងម្ចាស់ក្រុមហ៊ុន ខេ ឌី ស៊ី ដែរ ប្រសិនបើមូលប្បទានប័ត្រដែលមានទឹកប្រាក់៧ពាន់ដុល្លារមិនអាចបើក បាននៅថ្ងៃទី១ ខែតុលា ឆ្នាំ២០១៤ តាមកាលកំណត់ទៀតនោះ៖ «ខ្ញុំ អត់ចេញមុខទាមទារ ឬតវ៉ាដែលធ្វើឲ្យជំទាវហ្នឹងត្រូវប្លុកសែកខ្ញុំផង បើគេថតសកម្មភាពខ្ញុំគេថតក្នុងនាមខ្ញុំពាក់អាវកាក់ជាអ្នកឃ្លាំ មើលសហគមន៍ទេគេថតដាក់ក្នុងកាសែតមកហ្នឹងណា។ ហើយគេថតខ្ញុំបើកគោយន្តទៅហ្នឹងខ្ញុំថាទៅដឹកប្រជាជនមកផ្ទះទេ ប៉ុន្តែដល់ប្រជាជនថាខ្ញុំជួលឌុបខ្ញុំឲ្យហួសកន្លែងហ្នឹងតែម្ដង ទៅ ខ្ញុំថាបើទៅក៏ទៅៗអីចឹងខ្ញុំក៏ឌុបគាត់ទៅដាក់នៅព្រែកតាទែន ហ្នឹងទៅគាត់ក៏ដើរទៅទៀតទៅគាត់រកវត្តស្នាក់អីចឹងទៅខ្ញុំក៏ ត្រឡប់មកផ្ទះវិញមក»។
លោកអះអាងថា ទឹកប្រាក់សរុបចំនួន១ម៉ឺន៧ពាន់ដុល្លារ ដែលលោកត្រូវទទួលបាននោះ គឺបន្ទាប់ពីធ្វើកិច្ចសន្យាជាលាយលក្ខណ៍អក្សររវាងលោក និងអ្នកស្រី ឡោក ខេង ចំនួនពីរចំណុច គឺទី១មិនឲ្យចេញមុខតវ៉ា និងទី២បញ្ឈប់ការប្ដឹងផ្ដល់ភាគីក្រុមហ៊ុន។ លោកថា អ្នកស្រី ឡោក ខេង មានចេតនាបោកប្រាស់លោក ពីព្រោះក្រោយពីធ្វើកិច្ចសន្យានោះ គឺលោកមិនបានធ្វើអ្វីខុសពីកិច្ចសន្យា និងការស្បថនៅចំពោះមុខព្រះអង្គដងកើជាមួយអ្នកស្រីឡើយ។ យ៉ាងណាការប្ដឹងផ្ដល់លើកនេះលោកមិនសង្ឃឹមថា តុលាការនឹងរកយុត្តិធម៌ឲ្យនោះទេ ប៉ុន្តែលោកចង់បង្ហាញឲ្យឃើញកាន់តែច្បាស់ថា ប្រព័ន្ធតុលាការនៅកម្ពុជា គឺឋិតនៅក្រោមគំនាបរបស់អ្នកមានលុយ និងមានអំណាច។
ចំណែកអ្នកស្រី ឡោក ខេង មានប្រសាសន៍តបថា រហូតមកដល់ពេលនេះមិនទាន់បានឃើញខាងតុលាការកោះហៅអ្នកស្រី ទៅសួរនាំទាក់ទងនឹងរឿងក្ដីនេះនៅឡើយទេ ហើយអ្នកស្រី ក៏មិនចង់តតាំងអ្វីជាមួយលោក រាជ សីម៉ា ដែរគឺទុកឲ្យខាងតុលាការជាអ្នកធ្វើការងារនេះវិញ។ អ្នកស្រី បញ្ជាក់ថា ខាងក្រុមហ៊ុន បានថតរូបសកម្មភាពលោក រាជ សីម៉ា នៅតែបន្តចូលរួមតវ៉ា និងបានយកគោយន្តដឹកអ្នកភូមិទៅតវ៉ានៅរាជធានីភ្នំពេញប្រឆាំងនឹង ក្រុមហ៊ុនទៀតផង៖ «ខ្ញុំដាក់ឲ្យខ្ចី ដើម្បីខ្ញុំជាម្ចាស់សែកខ្ញុំមានសិទ្ធិឲ្យឯងខ្ចី ឬមិនឲ្យឯងខ្ចីនៅពេលណាដែលឯងមិនគោរពនូវកិច្ចសន្យាដល់ពេល ហ្នឹងគាត់ក៏ឯកភាពស៊ីញេ នេះគឺមានធ្វើកិច្ចសន្យានៅក្រោមសែកហ្នឹងឯង ក៏ប៉ុន្តែដល់ពេលគាត់ទៅប្ដឹងតុលាការគាត់អត់បានយកអាលិខិតហ្នឹង ទៅទេថាតើលុយមួយម៉ឺនបានមកដោយសារអី គាត់មានចុះកិច្ចសន្យាអីបានបានមួយម៉ឺនហ្នឹង គឺគាត់សន្យាថា គាត់មិនបង្កទំនាស់ហើយគាត់ខំសម្របសម្រួលជាមួយប្រជាពលរដ្ឋឲ្យ ត្រូវគ្នា នៅពេលថ្ងៃបន្តបន្ទាប់មកគាត់ចេះតែបង្កសកម្មភាពជាមួយនឹងប្រជា ពលរដ្ឋប្រឆាំងនឹង ខេ ឌី ស៊ី ទៀត។ គាត់(ក្រុមហ៊ុន)បានថតរូបថតមកឲ្យខ្ញុំ ហើយខ្ញុំចេះតេ(ទូរស័ព្ទ)ប្រាប់ថាកុំឲ្យធ្វើអីៗប្រយ័ត្នគេប្លុកសែកហ្នឹង ប៉ុន្តែគាត់នៅតែធ្វើ»។
មេធាវី នៃអង្គការក្រុមអ្នកច្បាប់ការពារសិទ្ធិកម្ពុជា(CDP)លោក ហុង គឹមសួន មានប្រសាសន៍ថា ការចេញមូលប្បទានប័ត្របើកប្រាក់មិនបាន គឺចាត់ទុកជាករណីឆបោក ប៉ុន្តែគេត្រូវពិនិត្យមើលលើកិច្ចសន្យា នៃការប្រើប្រាស់មូលប្បទានប័ត្រនោះ។ លោកបន្តថាបើអ្នកប្រើប្រាស់មូលប្បទានប័ត្រមានកិច្ចសន្យាជាមួយអ្នក ដែលចេញមូលប្បទានប័ត្រ ហើយបានធ្វើខុសនឹងកិច្ចសន្យា ការប្លុក ឬផ្អាកមិនឲ្យបើកប្រាក់បាន គឺជារឿងត្រឹមត្រូវ ប៉ុន្ដែគេត្រូវពិនិត្យឲ្យច្បាស់លាស់ទៅលើកិច្ចសន្យា និងសកម្មភាពចូលរួមរបស់តំណាងសហគមន៍នោះ៖«មិនចាំបាច់តែ តំណាងរាស្ត្រទេឲ្យតែមនុស្ស។ តំណាងរាស្ត្រ គឺគេសម្រាប់ជួយរាស្រ្តនៅក្នុងរឿងនយោបាយកសាងជាតិ តែកសាងចេញសែកមកនេះក្នុងនាមជាបុគ្គលឈ្មោះស្អីមួយទោះខ្លួនប្រើ ពាក្យថាតំណាងរាស្ត្រក៏ដោយបើរកទៅឃើញថា គាត់ជាអ្នកចេញសែកកុហកប្រជាពលរដ្ឋទេ អាហ្នឹងគឺគាត់ត្រូវទទួលរឿងព្រហ្មទណ្ឌអំពីរឿងកុហកបោកប្រាស់គេ ហើយ។ ដូចទាក់ទងចំនួនពីរដូចដែលខ្ញុំជម្រាបអំបាញ់មិញអីចឹងទី១ការចេញ សែកមកបើសិនបើកលុយអត់បាន គឺស្មើនឹងបោកប្រាស់គាត់ហើយណា ទី២ទៀតបើសិនជាមានកិច្ចសន្យាលាយលក្ខណ៍អក្សរត្រឹមត្រូវនោះ អាហ្នឹងគាត់ត្រូវដោះស្រាយជាមួយនឹងហេតុផល។ អាពាក្យថាចូលរួមហ្នឹងគេចូលរួមស្អីចូលរួមប្រឆាំង ចូលរួមតវ៉ា ចូលរួមប្ដឹង ឬក៏យ៉ាងម៉េច»។
បច្ចុប្បន្នគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា កំពុងស៊ើបអង្កេត និងសម្របសម្រួលករណីទំនាស់ដីធ្លីរវាងពលរដ្ឋនៅឃុំតាជេស ស្រុកកំពង់ត្រឡាច ខេត្ដកំពង់ឆ្នាំងសរុប៥៨គ្រួសារ ជាមួយក្រុមហ៊ុន ខេ ឌី ស៊ី។ ក្នុងនាមអ្នកស្រី ឡោក ខេង ជាសមាជិកគណៈកម្មការ និងបានទទួលពាក្យបណ្ដឹងពីប្រជាពលរដ្ឋផងនោះ អ្នកស្រីមានឱកាសកាន់តែច្រើនក្នុងការចូលខ្លួនដោះស្រាយក្នុងរឿងដី ធ្លីនេះ៕
ប្រភពពី វិទ្យុអាស៊ីសេរី
