ស្មានថាជាករណី គ្រោះថ្នាក់ចរាចរណ៍ ឃើញដួលម៉ូតូចូលភក់ ធ្លាយរឿងចោរកាច់កម៉ូតូ
ភ្នំពេញ
៖ ជនសង្ស័យម្នាក់បានធ្វើសកម្មភាពលួចកាច់ម៉ូតូរបស់ស្ត្រីកសិករ
ម្នាក់ពីខេត្ត តាកែវ ជិះមកដល់រាជធានីភ្នំពេញ
ហើយស្ត្រីម្ចាស់ម៉ូតូរងគ្រោះនោះគាត់ក៏បានទូរស័ព្ទប្រាប់ប្តី
របស់គាត់នៅផ្សារអូរឫស្សី
ក៏ជិះម៉ូតូចេញស្វែងរកតាមភិនភាគក៏ប្រទះឃើញជនសង្ស័យកំពុងជិះ
ពីត្បូងទៅជើង តាមបណ្តោយផ្លូវបេតុងលេខ២១៧ កំពុងតែស្ថាបនា
លុះមកដល់ចំណុចមុខសាលាខណ្ឌដង្កោ
ប្តីរបស់ស្ត្រីម្ចាស់ម៉ូតូក៏ទាញម៉ូតូផ្តួលចូលកប់ភក់
បង្កការភ្ញាក់ផ្អើលដោយគេស្មានថាជាករណីគ្រោះថ្នាក់ចរាចរណ៍
ប៉ុន្តែជាករណី ចោរកាច់កម៉ូតូទៅវិញ ។
ភ្លាមៗនោះជនសង្ស័យក៏បានព្យាយាមរត់
តែក្រុមសណ្តាប់ធ្នាប់ខណ្ឌដង្កោដេញចាប់បានប្រគល់ឲ្យសមត្ថ
កិច្ចនគរបាលព្រហ្មទណ្ឌខណ្ឌដង្កោយកមកសួរនាំ ។ហេតុការណ៍ភ្ញាក់ផ្អើលនេះបានកើតឡើងនៅវេលាម៉ោង៩និង៣០នាទី ព្រឹក ថ្ងៃទី២៧ ខែសីហា ឆ្នាំ២០១៤ នៅចំណុចមុខសាលាខណ្ឌដង្កោ ភូមិថ្មី សង្កាត់ដង្កោ ខណ្ឌដង្កោរាជធានីភ្នំពេញ ។
ជនសង្ស័យមានឈ្មោះ អូន សុខ ភេទប្រុស អាយុ២៩ឆ្នាំ មានទីលំនៅភូមិត្រពាំងស្រង៉ែ ឃុំអង្គតាសោម ស្រុកត្រាំកក់ ខេត្តតាកែវ ។ ចំណែកស្ត្រីម្ចាស់ម៉ូតូមានឈ្មោះ ផា សុខសន្តិភាព អាយុ២៨ឆ្នាំ និងបុរសជាប្តីមានឈ្មោះ ស៊ូ ផាន អាយុ៣៦ឆ្នាំ មុខរបរជាងធ្វើសោរ មានទីលំនៅភូមិចោមពល ឃុំឧត្តមសុរិយា ស្រុកត្រាំកក់ ខេត្តតាកែវ ។ ម៉ូតូដែលជនសង្ស័យលួចកាច់កម៉ាកហុងដាឌ្រីមស៊េរីឆ្នាំ ២០១១ ពណ៌ខ្មៅ ពាក់ស្លាកលេខភ្នំពេញ 1AX-1208 ។
ប្តីស្ត្រីម្ចាស់ម៉ូតូបានរៀបរាប់ឲ្យដឹងថា មុនពេលកើតហេតុ ប្រពន្ធរបស់គាត់បានជិះម៉ូតូនេះទៅច្រូតស្មៅវាលស្រែស្ថិតនៅ ក្នុងភូមិ ហើយបានចតម៉ូតូនៅលើផ្លូវ ស្រាប់ក្រឡេកមកមើលម៉ូតូក៏ឃើញជនសង្ស័យនេះលួចកាច់កជិះចេញទៅ ពេលនោះប្រពន្ធក៏ប្រាប់ឪពុកម្តាយ ហើយក៏បានទូរស័ព្ទមករូបលោកនៅធ្វើសោនៅផ្សារអូរឫស្សី ។ ភ្លាមៗនោះលោកក៏ជិះឡើងទៅផ្លូវជាតិលេខ២ ព្រោះបងប្អូននិងឪពុកម្តាយគាត់ជិះដេញរកតាមផ្លូវជាតិលេខ ហើយប្រពន្ធគាត់ក៏បានប្រាប់ថា ម៉ូតូដែលជនសង្ស័យលួចទៅនោះក៏ជិតអស់ប្រេងសាំងដែរ ហេតុដូច្នេះជិះមិនបានឆ្ងាយទេ ។ ស៊ូ ផាន បន្តថា ពេលដែលលោកជិះកាត់មកតាមផ្លូវជាតិលេខ២ ក៏បានប្រទះឃើញជនសង្ស័យ ដូចភិនភាគ ដែលប្រពន្ធគាត់ប្រាប់ ពេលនោះគាត់ក៏ជិះតាមជនសង្ស័យ ក៏ជិះត្រង់រហូតតាមផ្លូវបេតុង២១៧ រហូតលុះមកដល់មុខសាលាខណ្ឌដង្កោ រួចក៏ទាញម៉ូតូនោះផ្តួលទៅក្នុងភក់ ហើយក្រុមសន្តិសុខខណ្ឌបានរត់មកមើលស្មានថាជាករណីគ្រោះថ្នាក់ ចរាចរណ៍ តែគាត់បានប្រាប់ថា គឺជាចោរលួចកាច់កម៉ូតូរបស់គាត់ពីខេត្តតាកែវ ។ ភ្លាមៗនោះ ជនសង្ស័យក៏ព្យាយាមរត់ តែក្រុមសន្តិសុខខណ្ឌដង្កោដេញចាប់បានប្រគល់ឲ្យនគរបាលខណ្ឌតែ ម្តង ។
នៅចំពោះមុខសមត្ថកិច្ច ជនសង្ស័យបានសារភាពថា រូបគេបានដើរមកក៏ប្រទះឃើញម៉ូតូនោះទុកចោលនៅលើផ្លូវ ក៏លួចកាច់កជិះមកភ្នំពេញតែម្តងទៅ ។ ជនសង្ស័យថា រូបគេមិនដែលធ្វើដូច្នេះទេ ហើយនេះទើបតែជាលើកទី១ប៉ុណ្ណោះ ។ សមត្ថកិច្ចព្រហ្មទណ្ឌខណ្ឌដង្កោក៏បានឲ្យដឹងដែរថា សមត្ថកិច្ចកំពុងសួរនាំដើម្បីកសាងសំណុំរឿងបញ្ជូនទៅតុលាការ ៕
_____________________________
ប្រភពព័ត៌មានពី៖ នគវត្ត
