អ្នកចាំទី​និង​ ជា​ប្រធាន​ក្រុម​ជម្រើស​ជាតិ​បារាំង​ Hugo Lloris ​បាន​ស៊ីញេ​លើ​កិច្ចសន្យា​ថ្មី​រយៈ​ពេល​៥​ឆ្នាំ​ទៀត​ជាមួយ​ក្រុម​មាន់​ខ្នាយ ​មាស​ Tottenham Hotspur។​

កីឡាករ​វ័យ​ ២៧​ឆ្នាំ​រូប​នេះ​ដែល​នឹង​ធ្វើការ​ជាមួយ​អ្នកចាត់ការ​ថ្មី​ Mauricio Pochettino ​សម្រាប់​រដូវ​កាល​ថ្មី ​និយាយ​ថា​៖ “ការ​មក​ដល់​របស់​ Mauricio Pochettino ​គឺ​ជា​រឿង​សំខាន់។ ​ខ្ញុំ​មាន​អារម្មណ៍​ល្អ​ជាមួយ​គាត់ គាត់​មាន​មហិច្ឆតា​ខ្ពស់។ ​អ្វី​ៗ​មាន​ភាព​ច្បាស់​លាស់​ក្នុង​ក្បាល​របស់​ខ្ញុំ ​ហើយ​ការណ៍​ដែល​ខ្ញុំ​ចុះ​កិច្ចសន្យា​ថ្មី​គឺ​ពីព្រោះ​ខ្ញុំ​ទុកចិត្ត​ក្លឹប ​ហើយ​ខ្ញុំ​ច្បាស់​ក្នុង​ចិត្ត​ថា​ពួក​យើង​នឹង​រីកចម្រើន​ទៅ​មុខ​​យ៉ាង​​ វិជ្ជមាន”។​

អតីត ​យុវជន​ក្លឹប​ Nice ​ខាង​លើ​ត្រូវ​លោក​ Andre Villas Boas ​ទិញ​ពី​ Lyon ​ក្នុង​តម្លៃ​៨​លាន​ផោន​កាល​ពី​រដូវ​ក្ដៅ​ឆ្នាំ​២០១២​ ហើយ​មក​ទល់​ពេល​នេះ​ចូល​លេង​ឱ្យ​ Spurs ​បាន​៧៨​ប្រកួត​ហើយ៕​