ប៉ូលីសក្រុងតាខ្មៅ បង្ក្រាបកន្លែងកត់ឆ្នោតតូចតាច ឃាត់ខ្លួនស្រីៗ ៣នាក់ ឲ្យធ្វើកិច្ចសន្យា
ខេត្តកណ្តាល ៖ កម្លាំងសមត្ថកិច្ចនគរបាល ក្រុងតាខ្មៅ
បានចុះបង្ក្រាបទីតាំង កត់កន្ទុយលេខ
និងលេងល្បែងស៊ីសងខុសច្បាប់ មួយកន្លែង
និងឃាត់ខ្លួនមេកត់កន្ទុយលេខ ចំនួន ៣នាក់ ដោយបានរឹបអូស
យកវត្ថុតាងមួយចំនួន កាលពីល្ងាចថ្ងៃទី
៩ ខែកក្កដា ឆ្នាំ២០១៤ នៅចំណុចផ្សារតាខ្មៅចាស់ ភូមិសង្កាត់តាខ្មៅ
និងផ្សារតាខ្មៅថ្មី ភូមិសង្កាត់ដើមមៀន ក្រុងតាខ្មៅ។សមត្ថកិច្ចបានឲ្យដឹងថា ស្ត្រីទាំង ៣នាក់ ដែលសមត្ថកិច្ចឃាត់ខ្លួន រួមមាន ទី១-ឈ្មោះ នី ភានុត អាយុ ១៩ឆ្នាំ មានទីលំនៅបច្ចុប្បន្ន ភូមិដើមគរ សង្កាត់ដើមមៀន មុខរបរកត់កន្ទុយលេខ និងធ្វើក្រចក ទី២-ឈ្មោះ ឡុង គឹមស្រ៊ាង អាយុ ៤៩ឆ្នាំ មានទីលំនៅបច្ចុប្បន្ន ភូមិ-សង្កាត់ តាខ្មៅ មុខរបរកត់កន្ទុយលេខ និងទី៣-ឈ្មោះ តាត ណី អាយុ ២៦ឆ្នាំ ស្រុកកំណើត ភូមិកំពង់វាង ឃុំប្រឡាយ ស្រុកស្ទោង ខេត្តកំពង់ធំ មានទីលំនៅ បច្ចុប្បន្នផ្ទះជួល ភូមិព្រែកសំរោង សង្កាត់តាខ្មៅ មុខរបរកត់កន្ទុយលេខ។
សមត្ថកិច្ចក៏បានដកហូត វត្ថុតាងមួយចំនួន ក្នុងនោះមាន ក្រដាស់លទ្ធផលឆ្នោត ៦ដុំ ក្រដាស់សម្រាប់កត់កន្ទុយលេខ គ្មានលេខ ២ដុំ ក្រដាស់សម្រាប់ កត់កន្ទុយលេខ មានលេខ ៥ដុំ ម៉ាស៊ីនគិតលេខចំនួន ២គ្រឿង របស់របរមួយចំនួនទៀត។ មេកន្ទុយលេខទាំង ៣នាក់ ត្រូវបានសមត្ថកិច្ច យកទៅអប់រំ និងឲ្យធ្វើកិច្ចសន្យា ជាមួយសមត្ថកិច្ច ឈប់ប្រព្រឹត្តល្បែងស៊ីសង បែបនេះទៀត បើមិនដូច្នេះទេ នឹងចាត់ការតាមច្បាប់៕
