ជិះម៉ូតូបុកក្មេងប្រុស ដែលអង្គុយលេងលើចិញ្ចើមផ្លូវ ប៉ើងខ្ទាតជាច្រើនម៉ែត្រ សន្លប់ ២នាក់
ខេត្តកំពង់ឆ្នាំង ៖ បុរសម្នាក់បានជិះម៉ូតូ
ទៅបុកក្មេងប្រុសម្នាក់ ដែលកំពុងអង្គុយលេង
តាមចិញ្ចើមផ្លូវបណ្តាលឲ្យប៉ើង ជាច្រើនម៉ែត្រ
ហើយអ្នកបើកម៉ូតូ បានផ្លោងហោះបុកដី សន្លប់ស្តូកស្តឹង
កាលពីវេលាម៉ោង ៦ល្ងាចថ្ងៃទី២៩ ខែមិថុនា ឆ្នាំ២០១៤នៅចំណុចផ្លូវកោង ក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ។ជនរងគ្រោះជាអ្នកបើកម៉ូតូ មានឈ្មោះ រាជ សុគា ភេទប្រុស អាយុ ២២ឆ្នាំ រស់នៅភូមិម៉ុងបារាំង សង្កាត់ប្អេរ ក្រុងកំពង់ឆ្នាំង និងក្មេងប្រុសរងគ្រោះ ឈ្មោះ យ៉ាន់ សុភ័ក្រ អាយុ ៦ឆ្នាំ រស់នៅភូមិឃុំ កើតហេតុខាងលើ។ នៅមុនពេលកើតហេតុ បុរសឈ្មោះ រាជ សុគា បានជិះម៉ូតូ ម៉ាកហុងដា សេ១២៥ ពាក់ស្លាកលេខ កំពង់ឆ្នាំង 1E-0051 ពីជើងទៅត្បូងយ៉ាងលឿន ក្នុងស្ថានភាពស្រវឹង។
ពេលទៅដល់ចំណុចកើតហេតុ ដែលជាផ្លូវកោង ក៏បានជ្រុលទៅបុក ក្មេងប្រុសម្នាក់ដែលកំពុងតែលេង នៅក្បែចិញ្ចើមផ្លូវ បណ្តាលអោយប៉ើងខ្ទាត របួសធ្ងន់ ហើយអ្នកបើកម៉ូតូ បានដួលបោកទៅបង្គោល ស្លាកយីហោហាងស៊ុប បណ្តាលឲ្យរងរបួស សន្លប់ស្តូកស្តឹងតែម្តង ។ក្រោយពេលកើតហេតុ ជនរងគ្រោះទាំង ២នាក់ ត្រូវបានដឹកមកសង្គ្រោះ នៅមន្ទីរពេទ្យបង្អែក ខេត្ត កំពង់ឆ្នាំង៕
ប្រភពពី វត្តភ្នំ
