ព្រោះតែថ្ងៃខែខុសគ្នា នារីជាសង្សារសុំបែកផ្លូវ លេបថ្នាំបំពុលកុកសម្លាប់ខ្លួន ទាំងវ័យក្មេង
រាជធានីភ្នំពេញ ៖ បុគ្គលិកចាក់ប្រេង
បម្រើការងារនៅស្ថានីយ៍ប្រេងតេលា ម្នាក់បានសម្រេចចិត្ត
លេបថ្នាំធ្វើអត្តឃាត ពេលសង្សារទូរស័ព្ទប្រាប់ថា
ថ្ងៃខែឆ្នាំរបស់ពួកគេទាំង ២នាក់ មិនត្រូវគ្នា
បន្ទាប់ពីនារីជាសង្សារ បានទៅរកហោទស្សន៍ទាយ
មើលពេលាសម្រាប់រៀបការ បង្កឲ្យមានការភ្ញាក់ផ្អើល កាលពីវេលាម៉ោង
១៨និង២០ នាទី ថ្ងៃទី២៨ ខែមិថុនា ឆ្នាំ២០១៤ នៅភូមិបែកចាន
ស្រុកអង្គស្នួល ខេត្តកណ្តាល។យុវជនខូចចិត្តដែលលេបថ្នាំពុលសមា្លប់ខ្លួន ព្រោះតែរឿងសង្សារ ប្រាប់ថា ថ្ងៃខែមិនត្រូវគ្នានោះ មានឈ្មោះ នួន សារឿន អាយុ ២០ឆ្នាំ ជាបុគ្គលិកចាក់សាំង នៅស្ថានីយប្រេងឥន្ធនៈតេលា ស្នាក់នៅភូមិកើតហេតុខាងលើ មានស្រុកកំណើត នៅភូមិពោធិ៍រៀង៤ ឃុំពោធិ៍រៀង ស្រុកកំពង់លាវ ខេត្តព្រៃវែង ហើយជនរងគ្រោះ ទើបតែចូលមកធ្វើការ នៅស្ថានីយ៍ប្រេងតេលា នោះ បានជិតមួយខែប៉ុណ្ណោះ ដោយគេមិនសូវបានដឹង ពីទំនាក់ទំនងស៊ីជម្រៅ រវាងនារីជាសង្សារ ជាមួយជនរងគ្រោះ បែបណានោះឡើយ។
មុនពេលកើតហេតុ ជនរងគ្រោះបាននិយាយទូរស័ព្ទ ជាមួយសង្សាររបស់ខ្លួន រហូតដល់ម៉ោងជាង ៥ល្ងាច ថ្ងៃទី២៨ ខែមិថុនា ទើបឈប់ មិនដឹងថា និយាយសាសងគ្នា រឿងអីខ្លះទេ គ្រាន់តែឃើញ និយាយសើចសប្បាយ ជាមួយសង្សារ ប៉ុន្តែចុងក្រោយ ឃើញទឹកមុខស្រពោនហើយជនរងគ្រោះ បានដើរទៅខាងក្រោយភូមិ ទូរស័ព្ទទៅប្រាប់មិត្តភក្តិរបស់ខ្លួនថា គេផឹកថ្នាំបំពុលកុក សម្លាប់ខ្លួនហើយ ព្រោះគ្រូទាយប្រាប់ថា ខែឆ្នាំរបស់ពួកគេមិនល្អ មិនអាចយកគ្នា ជាប្តីប្រពន្ធបានទេ ហើយនាងក៏សុំបែកផ្លូវផងដែរ។
ក្រោយពេលនិយាយទូរស័ព្ទចប់ មិត្តភក្តិទំនងជាដឹងថា មានសភាពមិនស្រួល បានតាមមកមើល ក៏ប្រទះឃើញជនរងគ្រោះ ដេកបែកពពុះមាត់ទៅហើយ ធ្វើឲ្យមានការភ្ញាក់ផ្អើល ដល់អ្នកជិតខាង ទូរស័ព្ទហៅរថយន្ត របស់មន្ទីរពេទ្យបង្អែកអង្គស្នួល ដឹកយកទៅសង្គ្រោះ នៅមន្ទីរពេទ្យព្រះកុសុមៈ ។ ប៉ុន្តែជាអកុសល ដោយសារតែជាតិពុល ជ្រាបពេញខ្លួនអស់ទៅហើយ មិនអាចជួយសង្គ្រោះនោះទេ ពោលគឺជនរងគ្រោះ បានស្លាប់បាត់បង់ជីវិត យ៉ាងវេទនាបំផុត កាលពីព្រឹកថ្ងៃ ទី២៩ ខែមិថុនា ឆ្នាំ២០១៤ ហើយសាកសពត្រូវបាន សាច់ញាតិដឹកបញ្ជូន យកទៅប្រារព្ធពិធីបុណ្យ តាមទំនៀមទំលាប់ប្រពៃណី៕
ប្រភពពី វត្តភ្នំ
