ហៅម៉ូតូឌុបជិះ ដល់កន្លែងស្ងាត់ កាប់ប្លន់យកទៅបាត់
ភ្នំពេញ: បុរស
ជាអ្នករត់ម៉ូតូឌុបម្នាក់ ត្រូវជនសង្ស័យពីរនាក់
ជួលឌុបទៅកន្លែងស្ងាត់ ធ្វើសកម្មភាពកាប់ជាច្រើនពូថៅ
ប្លន់យកម៉ូតូបានសម្រេច បើកគេចខ្លួនបាត់ស្រមោល។ ហេតុការណ៍នេះ
បានកើតឡើងនៅវេលាម៉ោង ២:៣០នាទី រំលងអធ្រាត្រ ឈានចូលថ្ងៃទី១ ខែកក្កដា
ឆ្នាំ២០១៤ នៅចំណុចក្បែរវិទ្យាល័យ ហ៊ុន សែន ជម្ពូវ័ន
នៅតាមបណ្តោយផ្លូវជាតិលេខ៤ ស្ថិតក្នុងភូមិជម្ពូវ័ន សង្កាត់ចោមចៅ
ខណ្ឌពោធិ៍សែនជ័យ។សមត្ថកិច្ចមូលដ្ឋានបានឲ្យដឹងថា ជនរងគ្រោះ មិនទាន់ត្រូវបានស្គាល់អត្តសញ្ញាណនៅឡើយទេ ព្រោះកំពុងសង្គ្រោះបន្ទាន់នៅមន្ទីរពេទ្យ បើកម៉ូតូម៉ាកហុងដាឌ្រីមសេ១២៥ ស៊េរីឆ្នាំ ២០០៩ ឡើងតែម២០១៣។
ប្រភពព័ត៌មាននៅកន្លែងកើតហេតុ បានឱ្យដឹងថា នៅមុនពេលកើតមានជនសង្ស័យពីរនាក់ បានហៅម៉ូតូបុរសរងគ្រោះឱ្យឌុបពីស្កាយក្លឹប ទៅម្តុំកន្លែងកើតហេតុ ដោយឱ្យតម្លៃ ៨ពាន់រៀល ហើយបុរសរងគ្រោះ ក៏ព្រមឌុបជនសង្ស័យទាំងពីរនាក់ទៅ។ ខណៈពេលធ្វើដំណើរមកដល់ចំណុចកើតហេតុ ជនសង្ស័យបានដកពូថៅ កាប់ទៅលើជនរងគ្រោះជាច្រើនពូថៅ រួចប្លន់យកម៉ូតូ គេចខ្លួនបាត់តែម្តង។ ជនរងគ្រោះរបួសធ្ងន់ ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យ៕
ប្រភពពី CEN
