ដោយសារតែសត្វ ឆ្កែមួយក្បាល: ឡានតូចធំ៤គ្រឿង យកហ្វ្រាំងមិនទាន់ បុកបន្តកន្ទុយគ្នា
សាក្សីបានឲ្យដឹងថា ដំបូងឡើយមានរថយន្តមួយគ្រឿង បានបើកបុកឆ្កែ ទើបបណ្ដាលឲ្យរថយន្ត ៣គ្រឿងទៀត បើកពីក្រោយចាប់ហ្វ្រាំងមិនទាន់ ក៏ជ្រុលបុកបន្តកន្ទុយគ្នា ហើយរថយន្តចុងក្រោយ ជារថយន្តកុងតឺន័រ ម៉ាកនីសាន់ ឌីសែល ពណ៌ទឹកប្រាក់ ពាក់ស្លាកលេខ ភ្នំពេញ 3B-7720 ដែលទៅបុកគូថ រថយន្តហៃឡែនឌ័រ មួយគ្រឿង បណ្តាលឲ្យរអិល ធ្លាក់ផ្លូវចូលព្រៃ ទៅបុកគល់ត្នោត ខូចខាតយ៉ាងដំណំ ហើយភ្លាមៗនោះ ម្ចាស់និងព្រូ បានចុះរត់គេចខ្លួន បាត់ស្រមោល។
ក្រោយពេលកើតហេតុ រថយន្ត ២គ្រឿង ដែលនៅខាងមុខ បានសម្របសម្រួលគ្នា ចំណែករថយន្ត ២គ្រឿង ខាងក្រោយគឺរថយន្តហៃឡែនឌ័រ ត្រូវបានសមត្ថកិច្ច អូសយកទៅរក្សាទុក នៅអធិការដ្ឋាននគរបាល ស្រុកបរិបូរណ៍ ដើម្បីរង់ចាំធ្វើការដោះស្រាយ តាមនីតិវិធី។ សមត្ថកិច្ចបានស្រាវជ្រាវកោះហៅ ភាគីរថយន្តកុងតឺន័រ ឲ្យចូលខ្លួនមកដោះស្រាយផងដែរ ហើយករណីនេះ បានធ្វើឲ្យសមត្ថកិច្ច រវល់ជាច្រើនថ្ងៃផងដែរ៕ ដោយ វត្តភ្នំ
