World Cup៖ ប្រជាជនអាល្លឺម៉ង់រាប់ម៉ឺននាក់ បានចេញមកទទួលស្វាគមន៍ ក្រុមជម្រើសជាតិ របស់ខ្លួន ក្រោយពីត្រឡប់ មកបំពេញបេសកកម្ម អស់រយៈពេលជាង១ខែ នៅប្រទេសប្រេស៊ីល ជាមួយនឹងការឈ្នះពាន World Cup ឆ្នាំ២០១៤នេះ ។

គណៈប្រតិភូ ក៏ដូចជាកីឡាករអាល្លឺម៉ង់ទាំងអស់ បានចាកចេញពីប្រទេសប្រេស៊ីល ធ្វើដំណើរមកដល់ មាតុប្រទេសនៅ ទីក្រុងប៊ែឡាំង នាម៉ោង០៩ និង១៥នាទីព្រឹក (ម៉ោងនៅអាល្លឺម៉ង់) កាលពីព្រឹកថ្ងៃចន្ទ ទី១៤ ខែកក្កដា បន្ទាប់ពីបានឈ្នះ ពានបាល់ទាត់ពិភពលោក គម្រប់៤ដងរបស់ខ្លួន (១៩៥៤ ១៩៧៤ ១៩៩០ និង២០១៤) នៅក្រោយពេលយកឈ្នះអាហ្សង់ទីន នៅនាទីបន្ថែម១១៣ក្នុងវគ្គផ្តាច់ព្រ័ត្រ ក្រោមការដឹកនាំ ប្រកបទៅដោយចិត្តសាស្រ្តគ្រូបង្វឹក Joachim Loew អតីតខ្សែបម្រើប្រយុទ្ធអាល្លឺម៉ង់ ។

ដូចគ្នានោះដែរ ប្រជាជនអាហ្សង់ទីន ក៏បានចេញមកទទួលក្រុមជម្រើសជាតិរបស់ខ្លួនយ៉ាងច្រើនកុះករផងដែរ បើទោះ បីជាមិនបានឈ្នះជើងឯកជាលើកទី៣ក៏ដោយ ។ ក្រៅពីពាន World Cup ដែលអាហ្សង់ទីន មិនអាចឈ្នះក៏ពិតមែន ទោះក្នុងតំបន់របស់ខ្លួនក៏ដោយ ក៏អាហ្សង់ទីនបាន ឈ្នះពាន២ដែរ គឺមេដាយប្រាក់ ម្នាក់១ និងខ្សែប្រយុទ្ធ Lionel Messi បានឈ្នះបាល់មាស ក្នុងនាមជាកីឡាករលេងល្អបំផុតក្នុង FIFA World Cup ឆ្នាំ២០១៤ នេះជាមួយនឹងរង្វាន់អមជាទឹក ប្រាក់ចំនួន៦៨លានដុល្លារអាម៉េរិកទៀតផង ៕