មានការឃោសនាកុំឲ្យ ពលករជឿសង្គ្រោះជាតិ
បន្ទាយមានជ័យៈ សកម្មជន
គណបក្សកាន់អំណាចបានអំពាវនាវដល់ពលករចំណាកស្រុកដែលទើបតែវិល
ត្រឡប់មកពី ប្រទេសថៃ កុំឲ្យគាំទ្រគណបក្សសង្គ្រោះជាតិ ដោយឃោសនាថា
គណបក្សប្រឆាំងដែលឈ្នះបានចំនួន ៥៥ អាសនៈ ក្នុងរដ្ឋសភានេះ
ពុំបានធ្វើអ្វីដើម្បីជួយដល់ប្រជាពលរដ្ឋទេ
គឺបានតែនិយាយប៉ុណ្ណោះ។
យោងតាមលោក ចៅ វាសនា ជំទប់ ទី១
សង្កាត់ប៉ោយប៉ែត មកពីគណបក្សសង្គ្រោះជាតិបានអះអាង កាលពីម្សិលមិញថា
មានខិត្តប័ណ្ណរាប់រយសន្លឹកត្រូវបានសកម្មជនគណបក្សប្រជាជនចែកឲ្យ
ពលករចំណាកស្រុក កាលពីចុងសប្តាហ៍មុន នៅច្រកព្រំដែនអន្តរជាតិ
ប៉ោយប៉ែត ខេត្តបន្ទាយមានជ័យ។
លោក ចៅ វាសនា បានបន្ថែមថា៖
«ខ្ញុំមិនចាប់អារម្មណ៍លើខិត្តប័ណ្ណនេះទេ
ព្រោះប្រជាពលរដ្ឋមិនជឿលើខិត្តប័ណ្ណនេះទេ។ គណបក្សប្រជាជន
បានចេញខិត្តប័ណ្ណនេះ ព្រោះគណបក្សប្រជាជន គ្មានវិធីនិយាយទៀតទេ»។
លោកបានឲ្យដឹងទៀតថា
លោកបានមើលឃើញខិត្តប័ណ្ណនេះ នៅថ្ងៃ ទី២១ ខែមិថុនា ប៉ុន្តែ
ខិត្តប័ណ្ណពុំបានសរសេរឈ្មោះអ្នកណាម្នាក់ទេ។
ផ្អែកលើខិត្តប័ណ្ណដែលត្រូវបានបង្ហោះដោយ
វិទ្យុសំឡេងប្រជាធិបតេយ្យ វីអូឌី កាលពីថ្ងៃអាទិត្យ បានឲ្យដឹងថា
សកម្មជនគណបក្សប្រជាជន
បានអំពាវនាវដល់ពលករចំណាកស្រុកសូមឲ្យឈប់គាំទ្រគណបក្សសង្គ្រោះ
ជាតិ ព្រោះគណបក្សប្រឆាំងនេះ មិនបានជួយពលករចំណាកស្រុកទេ
ផ្ទុយទៅវិញតែងតែរិះគន់គណបក្សប្រជាជនដែលកំពុងជួយពលករ។
ខិត្តប័ណ្ណនោះបានសរសេរថា៖
«ពលករដែលទើបវិលត្រឡប់ពីថៃ សូមពិចារណា កុំជឿ
ហើយឈប់គាំទ្រគណបក្សសង្គ្រោះជាតិ ព្រោះគណបក្សនេះបានតែនិយាយ
ប៉ុន្តែមិនបានធ្វើអ្វីទេ»។ ទន្ទឹមនឹងនេះ សកម្មជនគណបក្សប្រជាជន
បានលើកឡើងអំពីចំណុចល្អរបស់គណបក្សប្រជាជន
ជាពិសេសលោកនាយករដ្ឋមន្រ្តី ហ៊ុន សែន
ដែលបានព្យាយាមជួយពលករចំណាកស្រុក ដោយផ្តល់ជំនួយបន្ទាន់
រាប់ទាំងថ្នាំពេទ្យ ការដឹកជញ្ជូន ម្ហូបអាហារ
និងសេវាកម្មដទៃទៀតដល់ពលករ។
ប៉ុន្តែ នៅពេលទាក់ទងកាលពីម្សិលមិញ លោក
ង៉ោ ម៉េងជ្រួន អភិបាល ក្រុងប៉ោយប៉ែត បានច្រានចោលការចោទប្រកាន់
និងការពារគណបក្សប្រជាជន។ លោក ង៉ោ ម៉េងជ្រួន ថ្លែងថា៖ «គណបក្សប្រជាជន
ជាអាជ្ញាធរ
មិនធ្វើអ្វីគ្មានប្រយោជន៍ដូចគណបក្សសង្គ្រោះជាតិចោទនោះទេ។
ដូច្នេះ សកម្មភាពដែលគណបក្សសង្គ្រោះជាតិកំពុងធ្វើ
គឺដើម្បីផលចំណេញនយោបាយ»។
កាលពីចុងសប្តាហ៍មុន អាជ្ញាធរ
ក្រុងប៉ោយប៉ែត
បានរារាំងក្រុមតំណាងរាស្ត្រជាប់ឆ្នោតគណបក្សសង្គ្រោះជាតិ
មិនឲ្យចូលទៅជួបសួរសុខទុក្ខពលករចំណាកស្រុកដែលត្រូវបានថៃចាប់
បញ្ជូនមករាប់ម៉ឺននាក់នោះឡើយ។
លោក គង់ សុជាតិ និងលោក ផល ប៊ុនធឿន
ពលករចំណាកស្រុកដែលទើបតែត្រូវបាននិរទេសមកពីថៃ កាលពីសប្តាហ៍មុន
បានបញ្ជាក់កាលពីម្សិលមិញថា ពួកលោក
បានអានខិត្តប័ណ្ណដែលទទួលបានពីសកម្មជនគណបក្សប្រជាជន ប៉ុន្តែ
ពួកលោកមិនចាប់អារម្មណ៍លើខិត្តប័ណ្ណទាំងនោះទេ។
លោក សុជាតិ ថ្លែងថា៖
«ខ្ញុំមិនខ្វល់អំពីគណបក្សនយោបាយទេ ប៉ុន្តែ
ខ្ញុំទាមទារសូមឲ្យគណបក្សសង្គ្រោះជាតិ ធ្វើតាមការសន្យា
ព្រោះខ្ញុំបានមើលឃើញគណបក្សនេះមានគោលនយោបាយល្អជាច្រើនសម្រាប់
ប្រជាជន។ គាត់មិនប្រើអំណាចមកគាបសង្កត់ប្រជាជនទេ»។
លោក សុជាតិ បានបន្ថែមថា
លោកនឹងទៅរកការងារធ្វើនៅថៃទៀត
ពេលគណបក្សប្រជាជនមិនអាចបង្កើតការងារឲ្យលោកធ្វើ
មានប្រាក់ឈ្នួលសមរម្យដើម្បីចិញ្ចឹមគ្រួសារ៕
_________________________
ប្រភពព័ត៌មានពី៖ ភ្នំពេញប៉ុស្តិ៍
ប្រភពព័ត៌មានពី៖ ភ្នំពេញប៉ុស្តិ៍
