ព្រះរាជអាជ្ញា បញ្ចប់ការសាកសួរលើមន្រ្តីសហជីពស៊ីខៅឌូ ទាំង ៨រូប នឹងបន្តនិតិវិធី នៅថ្ងៃនេះទៀត

5/25/2014 Aohyi Gamer 0 Comments A⁺ a^-

ខេត្តតាកែវ៖ ព្រះរាជអាជ្ញាសាលាដំបូង ខេត្តតាកែវ នៅវេលាម៉ោង ៦និង១០នាទី ល្ងាចថ្ងៃសៅរ៍ ថ្ងៃទី២៤ ខែឧសភា នេះ បានបញ្ចប់ការសាកសួរ លើមន្រ្តីសហជីពស៊ីខៅឌូចំនួន ៨រូប ដែលបានចាប់ មកឃុំខ្លួន កាលពីថ្ងៃទី២៣ឧសភា ហើយនឹងបន្តនិតិវិធី នៅថ្ងៃនេះបន្តទៀត។

សេចក្តីរាយការណ៍បានឲ្យដឹងថា កម្មករ-កម្មការិនី រោងចក្រ ជេ.អេ.សឌី ប្រមាណជាង២០០នាក់ បាននាំគ្នាទៅប្រមូលផ្តុំនៅមុខស្នងការនគរបាលខេត្តតាកែវ កាលពីវេលាម៉ោង ២និង៣០នាទីរសៀល ថ្ងៃទី២៤ ខែឧសភានេះ ដើម្បីធ្វើការ អុជធូក បួងសួង តវ៉ាទាមទារឲ្យមានការដោះលែងមន្ត្រីសហជីពស៊ីខៅឌូទាំង ៨រូប។ ការតវ៉ាទាមទារនេះ ត្រូវបានកម្លាំងអាជ្ញាធមានសមត្ថកិច្ចខេត្តតាកែវ បានធ្វើការរារាំងមិនឲ្យក្រុមកម្មករ សម្រុកចូលទៅក្នុងស្នងការខេត្តនោះទេ។

ប្រភពបានបន្តថា នៅវេលាម៉ោងជាង៣រសៀល ថ្ងៃទី២៤ ខែឧសភា នេះ មន្ត្រីសហជីពស៊ីខៅឌូ ចំនួន២នាក់ (ស្រីមួយ ប្រុសមួយ) ត្រូវបានកម្លាំងនៃស្នងការនគរបាលខេត្តតាកែវ បញ្ជូនខ្លួនទៅកាន់សាលាដំបូងខេត្តតាកែវ ដើម្បីឲ្យព្រះរាជ អាជ្ញាធរធ្វើការសាកសួរ អំពីដំណើររឿងធ្វើកូដកម្ម នៅមុខរោងចក្រ ជេ.អេស.ឌី ដែលស្ថិតនៅស្រុកបាទី ខេត្តតាកែវ។ បន្ចាប់មក មន្រ្តីសហជីពស៊ីខៅឌូ ២រូបបន្ថែមទៀត ត្រូវបានបញ្ជូនមកសាលាដំបូងខេត្តតាកែវសាកសួបន្ត។

ប្រភព បន្តទៀតថា នៅល្ងាចម៉ោង ៤និង៣០នាទី មន្ត្រីសហជីពស៊ីខៅឌូ ចំនួន ៤រូប ដែលមាន លោក សុត សៀម, លោក កែវ បេឿន, លោក អ៊ុល សំអេឿន និងលោក សេង សេឿង បានបញ្ជូនមកព្រះរាជអាជ្ញា សាលាដំបូងខេត្តតាកែវ ដើម្បី ធ្វើការសាកសួរបន្ត។

សេចក្តីរាយការណ៍បានឲ្យដឹងថា នៅវេលាម៉ោង ៦និង១០នាទី ល្ងាចថ្ងៃសៅរ៍ ថ្ងៃទី២៤ ខែឧសភា នេះ ព្រះរាជអាជ្ញា សាលាដំបូងខេត្តតាកែវ បានបញ្ចប់ការសាកសួរ លើមន្រ្តីសហជីពស៊ីខៅឌូចំនួន ៨រូប ដែលបានចាប់ មកឃុំខ្លួន ក្នុងស្នងការនគបាលខេត្តតាកែវ កាលពីល្ងាចម្សិលមិញ ដែលមានៈ លោក ណូ សាក់, កញ្ញ ឆែម ស្រីពៅ, លោក សៀង យ៉ូត, លោក ភិន សុភា, លោក សុត សៀម, លោក កែវ បេឿន, លោក អ៊ុល សំអេឿន និងលោក សេង សេឿង ហើយនឹងបន្តនិតិវិធី នៅថ្ងៃទី ២៥ បន្តទៀត។

មន្ត្រីសហជីពសហជីពប្រជាធិបតេយ្យកម្មករ កាត់ដេរកម្ពុជា ហៅកាត់ ស៊ីខៅឌូ ចំនួន ៨នាក់ ដែលដឹកនាំកម្មករ កម្មការិនី ធ្វើកូដកម្មនៅរោងចក្រ ជីអេសឌី ត្រូវបានកម្លាំងអាជ្ញាធរមានសមត្ថកិច្ចខេត្តតាកែវ ចាប់ខ្លួនកាលពីល្ងាចថ្ងៃទី២៣ ខែឧសភា ឆ្នាំ២០១៤ បញ្ជូនទៅឃុំខ្លួននៅស្នងការខេត្តតាកែវ ពាក់ព័ន្ធទៅនឹងការចោទប្រកាន់ ពីបទ ញុះញង់ និងបំផ្លិចបំផ្លាញ ទ្រព្យសម្បត្តិរោងចក្រ។