កម្មកររោងចក្រខេមបូហិនសាំ បន្តធ្វើកូដកម្មទាមទារដកសហជីព
កម្មករ
រោងចក្រ ខេមបូហិនសាំ (Cambo Handsome) ក្នុងសង្កាត់ពោធិ៍សែនជ័យ
ជាយរាជធានីភ្នំពេញ ធ្វើកូដកម្មអស់រយៈពេលជាង ១ខែមកហើយ
នៅមិនទាន់មានដំណោះស្រាយនៅឡើយទេ។
ចំណែកខាងភាគីរោងចក្រវិញសន្យាថា នឹងដោះស្រាយបញ្ហានេះ
តែស្នើសុំឲ្យកម្មករចូលធ្វើការជាធម្មតាឡើងវិញជាមុនសិន។
ក៏ប៉ុន្តែ
ក្រុមកម្មករបានហៅការពន្យាររបស់ខាងភាគីរោងចក្រនៅពេលនេះថា
ជាលេសដើម្បីគេចចេញពីការទទួលខុសត្រូវប៉ុណ្ណោះ។
00:00
កម្មកររាប់ពាន់នាក់ដែលបម្រើការនៅ
រោងចក្រ ខេមបូហិនសាំ
បានប្រមូលផ្តុំគ្នានៅខាងមុខរោងចក្រជារៀងរាល់ថ្ងៃ
ដើម្បីទាមទារលុយ ៥% បន្ថែមពីលើប្រាក់ខែដែលមានស្រាប់
និងប្រាក់អត្ថប្រយោជន៍មួយចំនួនទៀត ជាពិសេស
កម្មករក៏ស្នើឲ្យភាគីរោងចក្របញ្ឈប់សហជីពមន្ត្រីរាជការកម្ពុជា របស់
លោក ជួន មុំថុល ចេញ។
ថ្លែងនៅខាងមុខរោងចក្រ ខេមបូហិនសាំ
សាខាទី៣ កញ្ញា រាជ្យ សុភា ឲ្យដឹងនៅថ្ងៃទី២៤ ឧសភា ថា
មូលហេតុដែលកម្មករធ្វើកូដកម្មជាង ១ខែនេះ
ព្រោះតែពួកគេទាមទារអត្ថប្រយោជន៍មួយចំនួន ដូចជា លុយថ្លៃបាយ លុយ ៥%
និងថ្លៃធ្វើដំណើរ។ រាជ្យ សុភា បន្តថា បើទោះជានៅពេលនេះ
ការទាមទាររបស់កម្មករហាក់អស់សង្ឃឹម តែពួកគេនៅបន្តជម្នះបន្តទៀត
និងមិនរាថយឡើយ។ ការដែលមិនពេញចិត្តជាងនេះទៅទៀតនោះ រាជ្យ សុភា
ថ្លែងថា កម្មកររឹតតែមិនចង់បាន ហើយទទូចជាងប្រាក់អត្ថប្រយោជន៍
គឺស្នើឲ្យភាគីរោងចក្របញ្ឈប់សហជីពមន្ត្រីរាជការកម្ពុជា របស់ លោក
ជួន មុំថុល ប្រចាំនៅក្នុងរោងចក្រនេះចេញ ដោយចាត់ទុកថា
សហជីពនេះក្រៅពីមិនបានជួយអ្វីដល់កម្មករហើយ
ថែមទាំងប្រមាថដល់កម្មករថែមទៀតផង៖ «សូមដក លោក ឡូយ លន់
ពីព្រោះគាត់ហ្នឹងមិនបានជួយពួកខ្ញុំ
ហើយគាត់បែរនិយាយបរិហារពួកខ្ញុំថា ពេលពួកខ្ញុំមិនចូលធ្វើការ
អ្នកដែលធ្វើកូដកម្មហ្នឹង
ពេលរោងចក្របិទសុទ្ធតែទៅធ្វើស្រីសំផឹងទាំងអស់។
អ៊ីចឹងពួកខ្ញុំខំធ្វើការ ហើយមកជួប
ពេលគាត់បរិហារកេរ្តិ៍ពួកខ្ញុំ ហើយមើលងាយពួកខ្ញុំយ៉ាងហ្នឹង
អ្នកណាមួយក៏ខឹងដែរ ពេលគាត់និយាយអ៊ីចឹងនោះ»។
ការតវ៉ារបស់កម្មកររោងចក្រ ខេមបូហិនសាំ បានអូសបន្លាយជាង ១ខែមកហើយ ចាប់ពីថ្ងៃទី១៩ មេសា មក។
កូដកម្មនៅពេលនេះ
បានបន្តឡើងកម្ដៅបន្ថែមទៀតមួយកម្រិត ដោយហេតុថា
កម្មករបានបន្តប្រមូលកៀរគរពីក្នុងរោងចក្រផ្សេង ដែលជាសាខាតែមួយ
ដើម្បីជំរុញឲ្យភាគីរោងចក្រព្រមទទួលយកគោលការណ៍ដែលពួកគេស្នើឡើង។
ចាប់តាំងពីព្រឹកថ្ងៃទី២៤ ឧសភា
ក្រុមកម្មករមកពីរោងចក្រ ខេមបូហិនសាំ សាខាទី២
បានព្យាយាមទម្លាយទ្វាររបងរោងចក្រ ខេមបូហិនសាំ សាខាទី៣
ដែលកម្មករភាគច្រើននៅក្នុងសាខានេះ ព្រមចូលរួមធ្វើកូដកម្មដែរ
ក៏ប៉ុន្តែត្រូវបានភាគីរោងចក្រចាក់សោទ្វារមិនអនុញ្ញាតឲ្យកម្មករ
ចូលរួមឡើយ រហូតដល់ម៉ោងចេញពីធ្វើការ។
កងកម្លាំងបង្ក្រាបបាតុកម្ម
និងក្រុមសន្តិសុខអាវខ្មៅ ដែលប្រដាប់ដោយខែល និងដំបងគ្រប់ដៃ
ត្រូវគេដាក់ពង្រាយដើម្បីទប់ស្កាត់នៅខាងមុខរោងចក្រទាំងពីរសាខា។
ចំណែកអភិបាលរងខណ្ឌពោធិ៍សែនជ័យ
បានបញ្ជាឲ្យអ្នកយកព័ត៌មានវិទ្យុអាស៊ីសេរី ចេញក្រៅ
ដោយពុំអនុញ្ញាតឲ្យបានថតរូបសកម្មភាពកម្មករនៅក្នុងរោងចក្រនោះឡើយ។
តំណាងភាគីរោងចក្រ ខេមបូហិនសាំ
ជាជនជាតិកូរ៉េខាងត្បូង បានចេញមកអន្តរាគមន៍មួយសន្ទុះ
ដោយជួបក្រុមកម្មការិនីដែលទម្លាយទ្វាររបងចូលមកក្នុង
មុននឹងត្រឡប់ចូលរោងចក្រវិញ។ តាមរយៈអ្នកបកប្រែ
តំណាងភាគីរោងចក្រពុំបានបញ្ជាក់ពីជំហរក្នុងការដោះស្រាយឡើយ។
ផ្ទុយទៅវិញ បានបញ្ជាឲ្យកម្មករចេញពីបរិវេណរោងចក្រ
មុននឹងយកកម្លាំងបង្ក្រាបបាតុកម្មចូលមកដល់៖«យើងនាំគ្នាទៅក្រៅ
សិនទៅ។ គាត់និយាយថា អត់ចង់ឲ្យយើងធ្វើខុសទេ។ កុំរុញទ្វារគេ
កុំបំផ្លាញទ្រព្យសម្បត្តិគេ គឺវាខុសច្បាប់។
មិនមែនគេមិនដោះស្រាយទេ
តាមពិតទៅដល់ក្រុមប្រឹក្សាអាជ្ញាកណ្ដាលហើយតើ»។
ចំណែកច្រកទ្វាររបងរោងចក្រទាំងពីរសាខា
ត្រូវកម្មកររុញច្រានរហូតរបងសាខារោងចក្រ ខេមបូហិនសាំ ទី២
បានដួលរលំ ខណៈសាខាទី៣ ទ្រេតរៀបនឹងដួលរំលំ
ជាថ្នូរនឹងការទាមទារឲ្យភាគីរោងចក្រចេញមុខដោះស្រាយ។
វិទ្យុអាស៊ីសេរី ពុំអាចសុំការបំភ្លឺពី
លោក ជួន មុំថុល ប្រធានសហជីពមន្ត្រីរាជការកម្ពុជា និងលោក ឡូយ លន់
តំណាងសហជីពប្រចាំរោងចក្រ ខេមបូហិនសាំ បានទេ
ដោយព្យាយាមតាមទូរស័ព្ទជាច្រើនដង តែពុំមានអ្នកទទួល។
ពាក់ព័ន្ធបញ្ហានេះ កាលពីថ្ងៃទី២៣ ឧសភា
ក្រុមប្រឹក្សាអាជ្ញាកណ្ដាល
បានចេញបទបញ្ជាឲ្យកម្មករបញ្ឈប់កូដកម្មជាបន្ទាន់
ហើយចូលធ្វើឡើងវិញនៅថ្ងៃទី២៤ ឧសភា។
ប្រតិកម្មចំពោះសេចក្ដីសម្រេចនេះ ត្រូវបានក្រុមកម្មករអះអាងថា
ដរាបណាការតស៊ូមតិមិនបានជោគជ័យ ពួកគេនឹងមិនអនុវត្តឡើយ៕
ប្រភពពី វិទ្យុអាស៊ីសេរី
