ជនមិនស្គាល់មុខ គប់គ្រប់បែក ចូលក្នុងផ្ទះ ផ្ទុះផ្អើលទាំងយប់ សង្ស័យរឿងគំនុំ
បាត់ដំបង
: ជនមិនស្គាល់មុខ បានគប់គ្រាប់បែកដៃ មួយគ្រាប់
ចូលក្នុងផ្ទះមួយកន្លែង នៅក្នុងក្រុងបាត់ដំបង ដែលកំពុង់សាងសង់
ទាំងកណ្តាលយប់ ផ្ទុះកក្រើក។ សមត្ថកិច្ចដែលចុះអន្តរាគមន៍
បានសន្និដ្ឋាន ជំហានដំបូងថា ករណីបំផ្ទុះគ្រាប់បែកនេះ
បំណងសម្លាប់ម្ចាស់ផ្ទះ ប៉ុន្តែគ្មានមនុស្សស្លាប់ និងរងរបួសទេ
គ្រាន់តែអំបែងគ្រាប់ បែកខ្ទាត ត្រូវបែកកញ្ចក់ទូដាក់ខោអាវ
និងធ្លុះធ្លាយស័ង្កសី សង្ស័យជារឿងគំនុំផ្ទាល់ខ្លួន។ហេតុការណ៍នេះ បានកើតឡើង កាលពីម៉ោងជាង ១១ យប់ ថ្ងៃទី២៤ ខែឧសភា ឆ្នាំ២០១៤ នៅចំណុចផ្ទះមួយកន្លែង ដែលកំពុងសាងសង់ថ្មី ស្ថិតក្នុងភូមិ១៣មករា សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង។
លោក លួង ឡេង នាយប៉ុស្ដិ៍ប៉ូលិសសង្កាត់ព្រែកព្រះស្តេច បានឲ្យដឹងថា ផ្ទះដែលជនមិនស្គាល់មុខ គប់គ្រាប់ បែកចូលផ្ទះម្ចាស់ ឈ្មោះ គឹម អ៊ាវ អាយុ៦៨ឆ្នាំ ប្ដីនិងប្រពន្ធ ឈ្មោះ គឹម ង៉ោ អាយុ៤៧ឆ្នាំ រស់នៅភូមិ សង្កាត់កើតហេតុខាងលើ។ ក្នុងករណីនេះ មិនមានមនុស្សណាម្នាក់ ស្លាប់ និងរងរបួសទេ គ្រាន់តែអំបែងគ្រាប់បែក ខ្ទាតទៅត្រូវបែកកញ្ចក់ទូដាក់ខោអាវមួយផ្ទាំង និងធ្លុះជញ្ជាំងស័ង្កសី ជាច្រើនកន្លែងប៉ុណ្ណោះ។ ក្រោយធ្វើសកម្មភាពរួច ជនសង្ស័យ មិនស្គាល់មុខ ដែលមិនដឹងថា មានគ្នាប៉ុន្មាននាក់នោះ បានរត់គេចខ្លួន បាត់ទាំងយប់តែម្ដង។
លោក ឡាច ប្រុស នាយការិយាល័យស្រាវជ្រាវ បទល្មើសព្រហ្មទណ្ឌ អាវុធហត្ថ ខេត្តបាត់ដំង បានស្រង់សំដីរបស់ម្ចាស់ផ្ទះ រងគ្រោះ មកបញ្ជាក់ថា ផ្ទះរបស់គាត់ កំពុងតែសាងសង់ មិនទាន់រួចផង។ នៅយប់កណ្ដាលអធ្រាត្រ ថ្ងៃទី២៤ ខែឧសភានោះ ប្ដីប្រពន្ធគាត់ បាននាំគ្នាទៅដេក នៅផ្ទះរបស់ម្តាយ ដែលនៅជិតជាប់គ្នា។ កន្លងមក ប្តីប្រពន្ធគាត់ ធ្លាប់នៅដេកលើគ្រែ ជាន់ក្រោមផ្ទះរបស់គាត់ ដែលកំពង់សាងសង់ (កន្លែងដែលគ្រាប់បែកដៃធ្លាក់ផ្ទុះ) នេះ។
ប្ដីប្រពន្ធនេះ បានបញ្ជាក់ថា គាត់ធ្លាប់មានទំនាស់ជាមួយអ្នករស់នៅជិតខាង រឿងតភ្ជាប់បណ្ដាញទឹកប្រើប្រាស់ និងរឿងទំនាស់ព្រំដី។ នៅម៉ោងជាង ១១ យប់ ថ្ងៃទី២៤ ខែឧសភា ពេលពួកគាត់ ដេកលង់លក់ ស្រាប់តែឮសំឡេងផ្ទុះ យ៉ាងខ្លាំង កក្រើកដីក្បែរគ្រែដេក របស់គាត់។ ពួកគាត់ភ្ញាក់ឡើង ទាំងសើងមមើង ស្ទុះចេញមកខាងក្រៅផ្ទះ រកមើលតែមិនឃើញមានអ្វីសោះ។
ក្រុមសមត្ថកិច្ច បានរកឃើញអំបែងគ្រាប់បែកដៃ និងសន្និដ្ឋានថា ជាគ្រាប់បែកក្រឡាទៀប ដែលជនមិនស្គាល់មុខ ប្រើគប់ចូលផ្ទះសាងសង់ថ្មី មិនទាន់រួចមួយនេះ មិនបង្កឲ្យមានមនុស្សរបួស ឬស្លាប់ទេ។ ករណីនេះ សមត្ថកិច្ច បានសន្និដ្ឋានថា ជារឿងគំនុំផ្ទាល់ខ្លួន។
បច្ចុប្បន្ន សមត្ថកិច្ច ទាំងប៉ូលិស និងប៉េអឹមខេត្តក្រុង កំពុងស្រាវជ្រាវ កំណត់មុខសញ្ញា តាមប្រមាញ់ចាប់ខ្លួន ជនសង្ស័យ ដើម្បីយកមកផ្តន្ទាទោស ទៅតាមច្បាប់៕V/s
