លោក ហ៊ុន សែន ចំអកគណបក្សប្រឆាំងថាទទួលស្គាល់ លទ្ធផលបោះឆ្នោតក្រុមប្រឹក្សារៀបចំដោយ គជប
លោកនាយក
រដ្ឋមន្ត្រី ហ៊ុន សែន នៅថ្ងៃអង្គារនេះ
ថ្លែងចំអកគណបក្សសង្គ្រោះជាតិថា
ទទួលស្គាល់លទ្ធផលនៃការបោះឆ្នោតក្រុមប្រឹក្សារាជធានី ខេត្ត ក្រុង ខណ្ឌ
ស្រុក
ខណៈខ្លួនមិនទុកចិត្តគណៈកម្មាធិការជាតិរៀបចំការបោះឆ្នោត(គជប)។
ក្នុងពិធីចែកសញ្ញាបត្រដល់និស្សិត
សាកលវិទ្យាល័យភូមិន្ទភ្នំពេញ នៅកោះពេជ្រ លោក ហ៊ុន សែន ថ្លែងថា
ការបោះឆ្នោតក្រុមប្រឹក្សាកាលពីថ្ងៃទី១៨ខែឧសភា
ប្រព្រឹត្តទៅដោយរលូន និងគ្មានហិង្សា តែការឃោសនាវិញ គណបក្សមួយ
បានហែក្បួនតាមផ្លូវ បណ្តាលឲ្យកកស្ទះចរាចរណ៍។លោកបន្តថា
គណបក្សសង្គ្រោះជាតិ មិនពេញចិត្តនឹងគជប
តែនៅតែទទួលស្គាល់លទ្ធផលនៃការបោះឆ្នោតដែលរៀបចំដោយគជប។
លោក ហ៊ុន សែន មិនបានថ្លែងពីលទ្ធផលនៃការបោះឆ្នោតក្រុមប្រឹក្សាថាតើគណបក្សប្រជាជនកម្ពុជា ទទួលបានលទ្ធផលល្អឬយ៉ាងណា។គជប នឹងប្រកាសលទ្ធផលផ្លូវការនៃការបោះឆ្នោតក្រុមប្រឹក្សានៅវេលាម៉ោង៧និង៤០នាទី យប់ថ្ងៃអង្គារនេះ។
ក្រោយការបោះឆ្នោតក្រុមប្រឹក្សា លោក សម
រង្ស៊ី បញ្ជាក់ថា គណបក្ស ទទួលបាន៨៧អាសនៈ ដែលកាលពីអាណត្តិទីមួយ
ទទួលបាន៦១អាសនៈ និងលទ្ធផលបោះឆ្នោតក្រុមប្រឹក្សាក្រុងស្រុកខណ្ឌ
គឺទទួលបាន៦៧៧ ដែលកាលពីអាណត្តិទីមួយទទួលបានតែ៥១៨អាសនៈប៉ុណ្ណោះ។
លោកសម រង្ស៊ី
បានបូកសរុបលទ្ធផលបោះឆ្នោតក្រុមប្រឹក្សារាជធានីខេត្តក្រុងស្រុកខណ្ឌ
គឺគណបក្សសង្គ្រោះជាតិសរុបទទួលបានចំនួន៧៦៤អាសនៈ
កើនឡើងជាងអាណត្តិទីមួយ ចំនួន១៨៥អាសនៈ។ លោកបញ្ជាក់ថា លទ្ធផលនេះ
អាចទទួលយកបាន។
VOD
មិនទាន់អាចទាក់ទងអ្នកនាំពាក្យគណបក្សសង្គ្រោះជាតិ លោក យឹម សុវណ្ណ
និងមន្ត្រីផ្សេងទៀត ដើម្បីអត្ថាធិប្បាយលើបញ្ហានេះបាននៅឡើយទេ។
កន្លងទៅ គណបក្សសង្គ្រោះជាតិ
ប្រកាសមិនទទួលស្គាល់លទ្ធផលនៃការបោះឆ្នោតកាលពីថ្ងៃទី២៨ខែកក្កដា
ឆ្នាំ២០១៣ ដោយចោទថាគណបក្សប្រជាជនកម្ពុជា
បានលួចបន្លំសន្លឹកឆ្នោតតាមរយៈគជប។ គណបក្សប្រឆាំង
កំពុងជំរុញឲ្យកំណែទម្រង់គជប ដោយដាក់ជាស្ថាប័នធម្មនុញ្ញ៕
ប្រភពពី vodhotnews.com
