បាត់ដំបង៖ ព្រោះតែតូចចិត្តត្បិតប្រពន្ឋដែល បាន រួមរស់ជាមួយគ្នា អស់រយៈពេលជាច្រើនឆ្នាំមក ដោយបានបន្សល់ទុកនូវចំណងដៃនៃ អាពាហ៍ ពិពាហ៍ គឺបុត្រាបុត្រីចំនួន០៦នាក់ ទីបំផុតស្រ្តី ជាប្រពន្ឋដែលជាទី ស្រលាញ់ ពេញបេះដូង មាន ចិត្តឬស្យា ព្រៃផ្សៃ តណ្ហាដឹកមុខ អាក្រក់ជាង នាង កាកី រត់ចោល ស្វាមី និង កូនប្រុសស្រី ឲ្យរស់នៅ ខ្លោចផ្សា កណ្តាល មហាសាគរ ដ៏ធំល្វឹងល្វើយ គ្មានកោះគ្មានត្រើយ ធ្វើ អោយស្វាមី ដ៏កំសត់ទ្រាំ រស់មិនបាន ក្អួតឈាមដូច អុកសារ៉េន ក៏ សម្រេច ចិត្តធ្វើអត្តឃាតដោយចង ក សម្លាប់ខ្លួនតែម្តង។

ហេតុការណ៍ ដ៍សោកសង្រេងខាងលើនេះ បានកើតឡើងកាលពីវេលាម៉ោង ០៩ និង៣០នាទីថ្ងៃទី១៩ ខែឧសភា ឆ្នាំ២០១ ៤ នៅចំនុច ភូមិគំនរបេង ឃុំ សេរីមានជ័យ ស្រុកសំពៅលូន ខេត្តបន្ទាយមានជ័យ។ ជនរងគ្រោះ មានឈ្មោះ រឿន រក្សា ភេទ ប្រុសអាយុ៤៨ ឆ្នាំ ។ចំណែកស្រ្តីជាប្រពន្ឋ ដែលរត់ចោល ប្តី មានឈ្មោះ ចែ ជូចអាយុ៤២ឆ្នាំ ។

តាមការឲ្យដឹងពីលោក សម សារឿន មេភូមិគំនរបេង បានមានប្រសាសន៍អោយដឹងថា ជនរងគ្រោះ ក្រោយពីប្រពន្ឋ រត់ចោលទៅ ប្រទេសថៃ បាត់អស់រយៈពេល ជាងមួយឆ្នាំ ជនរងគ្រោះ ហាក់ក្រៀមក្រំ ទឹក មុខស្រពាប់ ស្រពោន ជា រៀងរាល់ថ្ងៃ ហាក់បីដូចជា គ្មានព្រលឹង នៅក្នុងខ្លួនអីចឹង​។លោកបន្តទៀតថា ទោះបីជាប្រពន្ឋរត់ចោលក្តី ក៏ប្តីរូបនោះ នៅតែខិតខំ រកស៊ីចិញ្ចឹមកូន ទាំង០៦នាក់ មិនអោយដាច់បាយឡើយ។ប៉ុន្តែជាអកុសល បែជាបុរសខាងលើគិតខ្លី សម្រេចចិត្តធ្វើអត្តឃាតសម្លាប់ខ្លួនចោលកូនប្រុស ស្រីឲ្យនៅកំព្រាដូចកូនរលកព្រៃត្រូវព្រានប្រហារមេបាឲ្យក្ស័យដូច្នេះ។

ក្រោយពេលកើតហេតុ សមត្ថកិច្ច ប៉ូលិសបានចុះទៅត្រួតពិនិត្យ លើសាកសពឃើញថា ជនរងគ្រោះ ពិតជាបានធ្វើ អត្តឃាត ដោយខ្លួនឯង ពិតប្រាកដមែន។ បច្ចុប្បន្ន សពជនរងគ្រោះ តំកល់ទុកនៅ គេហដ្ឋាន នៃសព រងចាំក្រុម គ្រួសារមកធ្វើបុណ្យតាម ប្រពៃណី៕ ដោយ បូរី

ប្រភពពី  Free Press Magazine