បញ្ជូនខ្លួននាយកក្រុមហ៊ុន ក្លែតហ្វ័រអលទៅតុលាការ ពីបទឆបោកប្រាក់
ជនសង្ស័យឈ្មោះ អេង ប៉ុងម៉ារឌី ប្រធានក្រុមហ៊ុន ក្លែតហ្វ័រអល ដែលជាក្រុមហ៊ុនផលិតសំបកដបទឹកផ្លាស្ទិក។
ភ្នំពេញៈ សមត្ថកិច្ចនគរបាល
ការិយាល័យអន្តរាគមន៍នៃក្រសួងមហាផ្ទៃកាលពីព្រឹកថ្ងៃ
ព្រហស្បតិ៍នេះ បានចាប់និងបញ្ជូនខ្លួនប្រធានក្រុមហ៊ុន ក្លែតហ្វ័រអល
ដែលជាក្រុមហ៊ុនផលិតសំបកដបទឹកផ្លាស្ទិក មានទីតាំង
នៅក្នុងភូមិព្រែកតានូ២ សង្កាត់ចាក់អង្រែលើ
ខណ្ឌមានជ័យទៅកាន់សាលាដំបូងរាជធានីភ្នំពេញ
ដើម្បីចាត់ការតាមច្បាប់ជាប់ពាក់ព័ន្ធទៅនឹងករណី«ឆបោកប្រាក់»
ចំនួន ៤០៦៦២, ៧៩ ដុល្លារអាមេរិក ប្រព្រឹត្តកាលពីឆ្នាំ២០១៣។
មន្ត្រីនគរបាលការិយាល័យអន្តរាគមន៍បានឲ្យ
ដឹងថា ជនសង្ស័យខាងលើនេះមានឈ្មោះ អេង ប៉ុងម៉ារឌី ភេទប្រុស អាយុ ៣២
ឆ្នាំ មានមុខរបរជាប្រធានក្រុមហ៊ុន ក្លែតហ្វ័រអល
និងមានប្រពន្ធឈ្មោះ មុំ កញ្ញារ៉ា អាយុ២៨ឆ្នាំស្នាក់នៅផ្ទះលេខ ៨៥បេ
ផ្លូវលេខ ៩៩ សង្កាត់បឹងត្របែក ខណ្ឌចំការមនរាជធានីភ្នំពេញ។
ជនសង្ស័យ ត្រូវបានប្តឹងដោយឈ្មោះ ង្វៀង យ៉ាំងយ៉ ភេទប្រុស អាយុ៤១ឆ្នាំ
ជាជនជាតិវៀតណាមស្នាក់នៅផ្ទះលេខ ២៦៧ សង្កាត់ទឹកល្អក់៣
ខណ្ឌទួលគោក រាជធានីភ្នំពេញនិងត្រូវបានចាប់ឃាត់ខ្លួន ដោយ
សមត្ថកិច្ចនគរបាលការិយាល័យអន្តរាគមន៍នៃក្រសួងមហាផ្ទៃកាលពីថ្ងៃ២៩
ខែមេសា ២០១៤ តាមដីកា បញ្ជាឲ្យចូលខ្លួនលេខ៨៤ អញយ ចុះថ្ងៃទី ២៨
ខែមេសា ២០១៤ របស់លោកហៀង
សុភក្តិព្រះរាជអាជ្ញារងអមសាលាដំបូងរាជធានីភ្នំពេញ។
មន្ត្រីសមត្ថកិច្ចនគរបាលបានបន្ថែមថា
ឥឡូវនេះ ជនសង្ស័យឈ្មោះ អេង ប៉ុងម៉ារឌី
កំពុងតែបន្តការសាកសួរពីតំណាងអយ្យការនៅឯសាលាដំបូងរាជធានី
ភ្នំពេញនៅឡើយ។
ជនសង្ស័យឈ្មោះ អេង ប៉ុងម៉ារឌី
និងភរិយាឈ្មោះ មុំ កញ្ញារ៉ា មិនអាចទាក់ទង
ដើម្បីសុំការបំភ្លឺបានឡើយនៅថ្ងៃព្រហស្បតិ៍ទី ១ ខែឧសភា ២០១៤នេះ៕
________________________
ប្រភពព័ត៌មានពី៖ ខ្មែរប៉ុស្តិ៍
ប្រភពព័ត៌មានពី៖ ខ្មែរប៉ុស្តិ៍
