វីជេ រតនា ធ្លាក់ខ្លួនឈឺក្រោយពីល្បីសន ផល្លិកា ប្រកាសប្តឹងបរិហារកេរ្តិ៍
សន ផល្លិកា និង វីជេ រតនា ចូលរួមកម្មវិធីសិល្បៈកន្លងមក។ រូបថត សហការី
ភ្នំពេញ : ខណៈគូស្នេហ៍ដែលធ្លាប់តែ
ផ្អែមល្ហែមក្រោមដើមទ្រូងរួមរស់ជាមួយ
គ្នាក្នុងដំបូលតែមួយអស់រយៈពេលបីឆ្នាំ និងត្រូវនាង សន ផល្លិកា
ប្រតិកម្ម និងប្រកាសប្ដឹងពីបទបរិហារកេរ្តិ៍
និងជ្រៀតជ្រែកជីវិតឯកជនរបស់នាងនោះ វីជេ រតនា
ក្រៅពីបង្ហាញពីជំហរទទួលស្គាល់កំហុសខ្លួននោះ នៅក្នុងគណនីហ្វេសប៊ុក
លោកក៏បានប្រកាសធ្លាក់ខ្លួនឈឺទៀតផង។
រហូតមកទល់ ពេលនេះ បើទោះគេដឹងថា
រឿងរ៉ាវស្នេហាតារាមួយគូ
ឈានដល់ដំណាក់កាលប្រុសប្រកែកស្រីប្រកាន់ក្តី
តែគេនៅមិនអាចស្នើសុំចម្លើយពីនាង សន ផល្លិកា បាននោះទេ។
ប៉ុន្តែមានប្រភពដែលអះអាងនៅជិតដិតនាងប្រាប់ថា៖ «ផល្លិកា
ពិតជាគ្រោងប្ដឹងវាយបកចំពោះ វីជេ រតនា ពិតមែន»។ ប្រភពនោះបញ្ជាក់ថា
ផល្លិកា នាងគ្រោងដាក់ពាក្យប្តឹង វីជេ រតនា បទបរិហារកេរ្តិ៍
និងជ្រៀតជ្រែករឿងរ៉ាវផ្ទាល់ខ្លួនរបស់នាង បើទោះជាវីជេ រតនា
សម្រេចចិត្តសុំទោសជាថ្នូរកុំឲ្យនាង សន ផល្លិកា ប្ដឹងប្ដល់ក្ដី។
ប្រភពដដែលបានប្រាប់ទៀតថា៖
«ទំនាក់ទំនងរវាងពីរនាក់នេះ មិនអាចត្រឡប់មកកាន់ដូចអតីតកាលនោះទេ
ហើយទំនងជាក្លាយជាគូបដិបក្ខផងក៏មិនដឹង»។
ជម្លោះ ដ៏ក្ដៅគគុករវាងពិធីករល្បីល្បាញលោក
វីជេ រតនា និងកញ្ញា សន ផល្លិកា តារាចម្រៀងមិនទាន់ចេញឌីសរបស់ហង្សមាស
បានក្លាយជាអណ្ដាតភ្លើងកាន់តែខ្លាំង។ ប៉ុន្តែ ភាគីខាងប្រុស
ដែលអ្នកណាក៏ដឹងថា បានបង្ហាញភាពឆេវឆាវ ព្រោះតែភ្លើងប្រចណ្ឌនោះ
បានបន្ទន់ចិត្តទទួលកំហុស និងបានប្រកាសពីការសម្រេចចិត្តសុំទោស
បន្ទាប់ពីមើលឃើញភ្លើងជម្លោះផ្ទុះរីក និងពិបាកទប់។
វីជេ រតនា បានឲ្យដឹងថា
លោកពិតជាព្រមសុំទោសជាសាធារណៈចំពោះនាងពិតមែន បន្ទាប់ពីមើលឃើញថា
បើបន្តការតតាំងគឺគ្មានចំណេញអ្វីក្រៅពីខាតទាំងមុខ និងការងារ។
វីជេ អភ័ព្វស្នេហ៍រូបនេះ
បានទទួលថាអ្វីដែលខ្លួនបានឆ្លើយឆ្លងជាមួយអ្នកសារព័ត៌មាន
ហាក់ដូចជាខុសឆ្គងចំពោះនាងមែន
រហូតឈានដល់ការព្រមានប្ដឹងពីខាងស្រី។
វីជេ រតនា បញ្ជាក់ថា បើសុំទោស
អាចបញ្ចប់ចម្រូងចម្រាសដែលបានផ្ទុះឡើង វាមិនមែនជារឿងអាក្រក់ទេ
ដើម្បីឲ្យ សន ផល្លិកា និងគ្រួសារព្រមទាំងឪពុកម្ដាយស្ងប់ចិត្តផង។
លោកពន្យល់ថា៖ «បើការចង់ឈ្នះ
ហើយឡើងតុលាការ តើវាចំណេញអី
ដូច្នេះខ្ញុំសុខចិត្តសុំទោសគាត់ជាសាធារណៈ
ម្យ៉ាងអ្វីដែលខ្ញុំធ្វើចំពោះគាត់ពិតជាជ្រុលខ្លះមែន
ក្នុងពេលកើតមានចម្រូងចម្រាសនោះ»។
យ៉ាងណាក្ដី ជម្រើសសុំទោសបញ្ចប់ទំនាស់របស់
វីជេ រតនា នោះ ត្រូវគេគិតថាជា
ដើម្បីលុបលាងនូវអ្វីដែលបានកើតឡើងក្នុងពេលប្រចណ្ឌនាង សន ផល្លិកា
ជាអតីតគូស្នេហ៍ដែលធ្វើឲ្យនាងបាក់មុខ
ជួយឲ្យលោកគេចផុតពីការប៉ះពាល់នៅក្លិបC2 ទូរទស្សន៍ CTN
និងប្រជាប្រិយភាពទាំងមូល ដែលជាឆ្នាំងបាយរបស់ខ្លួនដែរ។
បន្ទាប់ពីបន្ទន់ឥរិយាបថ សុំទោស នាង សន
ផល្លិកា នៅក្នុងគណនីហ្វេសប៊ុក របស់ វីជេ រតនា បានបង្ហោះរូបភាពលោក
ឈឺកោសខ្យល់ជាំពេញខ្លួន ជាមួយសារខ្លីៗសរសេរ៖ «Doctor ប្រាប់ថា
ខ្ញុំគ្រុនពោះវៀនត្រូវឲ្យខ្ញុំតមចំណី ញ៉ាំបានតែបបរទេ។
ហេតុអ្វីខ្ញុំស៊យម៉េស(ម្ល៉េះ)?ខ្លួនខ្ញុំដូចបាតឆ្នាំងនៅលើភ្លើង
អ៊ីចឹងក្ដៅណាស់លោកអើយ។ មិនដឹងថាខ្លួនឯងខ្យល់ដល់ថ្នាក់ហ្នឹងសោះ
អ៊ីចឹងបានជាប៉ុន្មានថ្ងៃនឹងចេះតែងងឹតមុខ ដើររកតែដួល»។
ជាមួយសាររៀបរាប់ពីអាការជំងឺពីក្នុង
មន្ទីរពេទ្យជ័យជម្នះនោះវីជេ រតនា
ដែលកំពុងរងនូវវិបត្តិស្នេហ៍ធ្លាក់ខ្លួនឈឺរូបនេះបានសរសេរ
បន្ដថា៖ «ពេលនេះជីវិតឯកាណាស់ មានតែខ្លួនឯងទេ
មិនមានអ្នកណាឈឺឆ្អាលនឹងយើងទៀតទេ
ពេលនេះមានតែម្តាយជួយនាំមកពេទ្យ»៕
_______________
ប្រភពពីភ្នំពេញប៉ុស្តិ
