ស្រវឹងស្រាសុំប្រពន្ធទៅដក ព្រលឹត២នាក់កូនតូចក្នុងស្រះ ក្រោយផ្ទះលង់ទឹកស្លាប់
ខេត្ត
បាត់ដំបង ៖ បុរសម្នាក់ផឹកស្រាស្រវឹងធ្លាក់ភ្នែក
ហើយបានសុំប្រពន្ធទៅដកព្រលឹតជាមួយ
កូនប្រុសតូចនៅក្រោយផ្ទះប្រហែល៣០០ម៉ែត្រក៏លង់ស្លាប់តែម្តង
កាលពីវេលាម៉ោង៦ល្ងាច ថ្ងៃទី២៦ ខែមេសា
ឆ្នាំ២០១៤ នៅក្នុងភូមិឈើទាល ឃុំសិរីមានជ័យ ស្រុកសំពៅលូន
ខេត្តបាត់ដំបង។តាមស្ត្រីឈ្មោះ ឈិន ប៉ាវ អាយុ៤៧ឆ្នាំ ជាប្រពន្ធចុងជនរងគ្រោះ បានអោយដឹងថា ប្តីរបស់គាត់មានឈ្មោះ យួន យ៉េន អាយុ៤៥ឆ្នាំ មានកូន៦នាក់ ស្រី២នាក់(កូនជាមួយប្រពន្ធដើម) ។ អ្នកស្រីបន្តថា មុនពេលកើតហេតុ ប្តីរបស់បានផឹកស្រាស្រវឹងដាបតាំងពីវេលាម៉ោង១០ព្រឹករហូតដល់ ម៉ោង៣រសៀល ពេលចប់ពីផឹកស៊ីគាត់បានសុំគាត់(ប្រពន្ធ)ទៅដកព្រលឹតជាមួយកូន ប្រុសឈ្មោះ ប៉ិល អាយុ៥ឆ្នាំ នៅក្រោយផ្ទះប្រហែល៣០០ម៉ែត្រ ។ អ្នកស្រីបន្តថា នៅម៉ោងប្រហែល៥ល្ងាច កូនប្រុសឈ្មោះ ប៉ិល បានមកប្រាប់ថា ពុកពេលចុះក្នុងស្រះទឹក គាត់និយាយនិងច្រៀងលេង មួយសន្ទុះក្រោយមកគាត់លិចបាត់ មិនព្រមងើបទេ ។ ក្រោយពីកូនប្រុសប្រាប់ដូច្នេះ មានការសង្ស័យទើបនាំគ្នាទៅរាវរកមើល ក៏ប្រទះ សាកសពប្តីតែម្តង រួចក៏រាយការណ៍ជូនសមត្ថកិច្ចមកពិនិត្យ ។
សមត្ថកិច្ចនគរបាលបានបញ្ជាក់ថា ជនរងគ្រោះពិតជាស្រវឹងស្រាលង់ទឹកស្លាប់ប្រាកដមែន ។ ហើយបានក៏បានប្រគល់សាកសពជូនក្រុមគ្រួសារធ្វើបុណ្យតាមប្រពៃណី ៕
- ប្រភពពីនគរវត្ត
