ឡានបែនដឹកដីរបស់ក្រុមហ៊ុនចិន បើកបុកម៉ូតូពីក្រាយយ៉ាងពេញទំហឹង ស្លាប់ទាំង ២នាក់
ខេត្ដ
កំពង់ចាម ៖ រថយន្ដបែនបានបើកបុកបុរស ២នាក់
ពេលកំពុងជិះម៉ូតូពីក្រោយ យ៉ាងពេញទំហឹង
បណ្ដាលឱ្យស្លាប់ម្នាក់នៅនឹងកន្លែង និងម្នាក់ទៀតស្លាប់
ពេលបញ្ជូនទៅកាន់មន្ទីរពេទ្យដល់ពាក់កណ្ដាលផ្លូវ
បង្កឲ្យមានការភ្ញាក់ផ្អើលកាលពី
វេលាម៉ោង ១រសៀល ថ្ងៃទី២៤ ខែមេសា ឆ្នាំ២០១៤ នៅចំណុចខាងត្បូង
សាលាស្រុកបាធាយ ចម្ងាយ ៤០០ម៉ែត្រ ស្ថិតក្នុង ភូមិ-ឃុំ-ស្រុក បាធាយ
ខេត្ដកំពង់ចាម ។ជនរងគ្រោះដែលស្លាប់ រួមមានឈ្មោះ ហូ ឈឿង ភេទប្រុស អាយុ ៣៦ឆ្នាំ ស្លាប់នៅនឹងកន្លែងកើតហេតុ និងឈ្មោះ ប៉ាវ រ៉ុន ភេទប្រុស អាយុ ៣៧ឆ្នាំ ស្លាប់ពេលបញ្ជូន ទៅមន្ទីរពេទ្យបានពាក់កណ្ដាលផ្លូវ អ្នកទាំង២ រស់នៅភូមិត្រពាំងឈូក ឃុំលាយបូរ ស្រុកត្រាំកក់ ខេត្ដតាកែវ ។ សាក្សីបានឲ្យដឹងថា នៅចំណុចកើតហេតុ ជាការដ្ឋានធ្វើផ្លូវ និងមានដីហុយយ៉ាងខ្លាំង ស្ទើរមើលគ្នាមិនឃើញ ហើយខណៈនោះទំនង អ្នកបើករថយន្ដមើលមិនឃើញ ជនរងគ្រោះកំពុងជិះម៉ូតូ ក៏បានបុកពីក្រោយ យ៉ាងពេញទំហឹងតែម្ដង ។
រថយន្ដបង្កគ្រោះថ្នាក់ខាងលើ ជាប្រភេទរថយន្ដបែនដឹកដី ចាក់បំពេញផ្លូវនៅការដ្ឋានមួយ ក្បែរចំណុចកើតហេតុ ជារបស់ក្រុមហ៊ុនចិន ហើយអ្នកបើកបរ ក្រោយពេលកើតហេតុ បានរត់គេចខ្លួនបាត់ស្រមោល ។ ចំណែកម៉ូតូជនរងគ្រោះ ត្រូវរថយន្ដកិនខូចស្ទើរទាំងស្រុង ម៉ាកសង់ កូរ៉េ គ្មានស្លាកលេខ ទាំងម៉ូតូនិងរថយន្ដ ត្រូវយកមករក្សាទុក នៅអធិការដ្ឋាននគរបាល ស្រុកបាធាយ រង់ចាំការដោះស្រាយ តាមផ្លូវច្បាប់ ហើយសាកសពជនរងគ្រោះ សមត្ថកិច្ចបានទាក់ទង ទៅសាច់ញាតិ ដើម្បីយកទៅធ្វើបុណ្យ តាមប្រពៃណី ៕
ប្រភពពី វត្តភ្នំ
